Piilimka 38

1Va ŋala po, Juda yaa basi wa suataŋa ale cheŋ a ga bo le nuru ate wa nyini Adullam tɛŋka. Wa yuei jam le Yira. 2Dula Juda yaa tu Keenan denɔ lie. Keenan denɔwa yuei jam le Sɛyua. Wa yaa faari wa. Wa yaa goa ale wa, 3ate wa yik lɔgi a biak nidoabili ate ba te wa yuei ayen Ɛri. 4Wa ŋman yik lɔgi a biak nidoabili ate ba te wa yuei ayen Onan. 5Wa ŋman biak nidoabili wa choa ate ba te wa yuei ayen Sɛla. Ba jam biak wa ka Kezib tɛŋka.

6Juda jam yaali ka nipok a te Ɛri waai ate wa liŋ biak la. Nipowa yuei jam le Tamara. 7Alege Juda bikpagni Ɛri le jam nye diila a bie kama Naawen nimbie po, dila nyiŋ Naawen yaa ko wa.

8Juda weeni Onan ayen, <<Goa ale fi suoku powa a tom dii ale magsi la ase fi suok pok la a biak a te fi suoku.>> 9Alege Onan seba ayen bisaŋa a kan chim wa bisa, dila wa nyiem yaa le boro a goa le wa suoku powa la wa yaa sam basi tɛŋ ate wa kan biak a te wa suoku. 10Wa le jam nye diila a bie kama Naawen nimbie po, dila wa yaa ko wa mɛ.

11Juda yaa weeni wa sampowa Tamara ayen, <<Bo fi kowa yenni ase pukɔgi la ate m biika Sɛla pak.>> Diila wa poli kama ayen, <<wa mɛ ale kpi ase wa suataŋa la.>> Dila Tamara yaa cheŋ ga bo wa kowa yenni.

12Ku ŋaaŋnyiŋ ku le jam beni la, Juda powa Sɛyua liewa yaa kpi. Juda suinni ale ga yɔk la wa yaa cheŋ Timnaya nuru baai ale jaa che wa piisaŋa kɔbtaŋa la jigi. Wa doawa Adullam denɔwa Yira jam va wa cheŋ kama.

13Ba le weeni Tamara ayen, <<Fi ŋiak nidoawa a bo ka suik a cheŋ Timnaya ayen wa che wa piisaŋa kɔbtaŋa la, 14wa yaa yeeri wa pukɔgi gattaŋa, ale lik wadek ale garuk nyaara nyaara ayen ba kan miŋ wa. Wa yaa kali nansuiŋku ale a cheŋ Enaim la, juijui ale bo Timnaya suiku po. Diila wa nya kama ayen Sɛla a chim kama yɔgla, ba an pai wa te wa ase wa pok la.

15Juda ale nya wa la wa pai wa chim ka nidoa yaalik, diila wa lik wa nimbidiaka kama. 16Wa an miŋ ayen ka wa sampowa ale la, wa yaa cheŋ wa jigi suiku nɔi a weeni ayen, <<Jam yɔgyɔgla a goa ale mu.>> Wa yaa bek wa ayen, <<Fi le te mu ka boa abe fi goa ale mu?>>

17Wa yaa tulisi ayen, <<M le te fu buuk a nyini m duŋsaŋa po.>> Nipowa yaa ŋman bek wa ayen, <<Fi le te mu jaab ase pumpuulima la ate fi ga tom te?>> 18Wa yaa weeni ayen, <<M te fu boan jaab pumpuulima? Wa yaa tulisi ayen, <<Fi nifelinni ale di miika ale fi nisa po doani.>> Wa yaa pai te wa ale goa ale wa ate wa yik lɔgi. 19Nipowa ale basi wa la ŋaaŋnyiŋ, wa yaa yeeri wa garukku ale jo wa pukɔgi garukku ŋmana.

20Juda a jam tom ka wa doawa Adullam denɔwa ale buuk ayen wa tuesi wa tachekka ate wa pai te wa la, alege wa doawa an jam nya wa. 21Wa jam bek ka nuru baai ale bo dula la ayen, <<Bɔgluk taabuka a bo ka be waai ale bo Enaim suiku nakpiaka la.>> Ba yaa tulisi ayen, <<Bɔgluk taabuk a ka dela.>>

22Wa yaa ŋman cheŋ Juda jigi a weeni ayen, <<Mi an nya wa. Nuruma ale bo dula la ayen, <Bɔgluk taabuk a ka dela.>>> 23Ate Juda ayen, <<Basi ate wa tanla jabuui ate wa ta la kan daa di, ba le nye ti a la kama. Dila meena ŋaaŋnyiŋ m tom ka bu paaluk a te wa, alege fi an nya wa.>>

24Chiisa sita ŋaaŋnyiŋ ba jam weeni Juda ayen, <<Fi sampowa Tamara ka taabuk, wa be nya ku tutuna kama, wa ta ka puuk.>> Ate Juda ayen, <<Ni ta wa a nyini a ju wa ko.>>

25Ase ba le ta wa a nyini la, wa yaa tom tomtomiŋ a weeni wa ŋaandɔwa ayen, <<Mi ta ka puuk ale nuru waai ale soa ŋantaŋa de la. Nya ase fi a nin baga a miŋ ase ka wana nifelinni ale miik ale wa tachek ale nna.>>

26Juda yaa miŋ ŋantaŋa ale weeni ayen, <<Wa welema a gaam mi kama, ase m le kan pai wa a te m biika Sɛla la.>> Wa kan ŋman a goa ale wa.

27Ase ku le paari wa biamu la, nidoabilisa yibsa ale jam bo ponni po. 28Wa le boro a biak la, wanyi yaa yeeri nisa, ate nipok waai ale nya ate nipooba a biak la a yaa pai garuk miik mɔnuŋ a bobi wa nisa ale weeni ayen, <<Wade ale dɛ niŋ a nyini.>> 29Alege wa le ŋman ta wa nisaŋa a jo la, wa suoku yaa nyini ate wa weeni ayen, <<Fi ale biisi dii ate ku nyini la ale nna.>> Ate ba te wa yuei ayen Perezi. 30Ate wa suoku waai ale ta garuk miik mɔniŋka wa nisa po la a yaa nyini ate ba te wa yuei ayen Zera.

Currently Selected:

Piilimka 38: BWU

Highlight

Compare

Copy