Piilimka 37

1Jekob jam bo ka tɛŋ kaai ate wa kowa jam boro la, Keenan tɛŋka.

2Jekob wie ale nna. Josefi waai ale jam ka nidoa paalik a ta bena pi ale ŋayopɔi la, a jaa nya ka piisa ale wa suataŋa. Wa suataŋa, Bilya nidoabilisaŋa ale Zilpa nidoabilisaŋa, wa kowa pooma. Wa jam weeni wa kowa biem buui wa nya ale ba nye la.

3Izirali jam yaali Josefi a gaam wa nidoabili sinsila kama dii nyiŋla wa jam biak wa ka wa kpaŋsa po. Wa yaa nye garuk kuui ale nala a te wa. 4Wa suataŋa ale nya ayen wa yaali wa a gaam ba kama la ba yaa kisi wa a kan biisi wamaŋa a te wa.

5Josefi yaa goa daasim. Wa le weeni sak wa suataŋa la ba yaa ŋmasi kisi wa yega. 6Wa weeni ba ayen, <<Ni wom gɔdaasimaŋa de ate mi a gɔdaasim la. 7Ti boro a bobi kpari ŋanta laŋka po ate mi kpari ŋantaŋa deri yiti zaani, alege ate nama bobaŋa a zaani gilim mi koori tɛŋ di niŋ.>> 8Wa suataŋa yaa weeni ayen, <<Fi a yaali ayen fi a dɛ naam tama zuk kama? Fi le sum a nya tama zuwa? Ate ba yaa ŋmasi kisi wa yega wa gɔdaasimaŋa nyiŋ ale wa le weeni diila nyiŋ. 9Josefi yaa ŋman gɔdaasim a weeni wa suataŋa. Wa weeni ayen, <<Ni wom mi ŋmana, mi gɔdaasim kama. Yɔgyɔgla de wenbinni ale chiika ale chiŋmarisa pi ale kanyi ale koori a zuli mi.>> 10Wa le weeni wa kowa ale wa suataŋa la, wa kowa yaa toariŋ wa ale weeni ayen, <<Ka boan gɔdaasima? Fi mawa ale mi ale fi suataŋa ale sum jam koori tɛŋ fi niŋŋa?>> 11Ate wa suataŋa a jaa dɛ nyuri ale wa alege wa kowa a ta ku wa popola po. 12Josefi suataŋa yaa ta ba kowa piisaŋa a cheŋ ayen ŋa dɛ a moata Sikiim. 13Izirali yaa weeni Josefi ayen, <<Ase fi le poom seba la, fi suataŋa a ta piisaŋa a moata ka Sikiim ate ŋa a dɛ. Jam, mi a yaali ayen m tom fu kama ba jigi.>> 14Wa yaa weeni wa ayen, <<Cheŋ ga nya ase wari meena a cheŋ nalimnyiini ale fi suataŋa ale piisaŋa abe fi jam weeni mu.>> Ate wa yaa tom wa ate wa zaani Yebron Viaka a cheŋ. Josefi ale ga paari Sikiim la, 15nuru yaa nya wa bo laŋsaŋa po a nyiem a gilim a yaa bek wa ayen, <<Fi a gisi ka boa?>> 16Wa yaa weeni wa ayen, <<Mi a gisi ka m suataŋa. Fi baga a dak ba le ta ba piisaŋa a bo juijui ate ŋa a dɛ la?>> 17Nuruwa yaa tulisi wa ayen, <<Ba nyini dela a cheŋ kama, mi wom ba weeni ayen, ti cheŋ Dotan.>> Dila Josefi yaa saŋ wa suataŋa ŋaaŋ a ga nya ba Dotan. 18Alege ba zaani niŋ a nya wa. Alege ate wa paari ba la, ba deri zɔk kama ayen ba ko wa. 19Ba weeni chaab ayen, <<Gɔdaasima nyɔnɔwa ale la cheena.>> 20Ba weeni ayen, <<Ni jam ate ti ko wa a pai nyo viliŋa de dinyi po abe ti weeni ayen gɔi duŋ ale yik wa. Ate ti yaa nya wa gɔdaasimaŋa ale ŋa nye diila.>> 21Aruben ale wom nna la, wa yaa pii nyiŋ ayen wa vari wa ba nisima po a basi. Wa weeni ayen, <<Ni kan te ti ko wa.>> 22Wa ŋman weeni ayen, <<Ni kan tiri ziimoa. Ni yuk wa basi vinni de po gɔnni po dela. Ni kan pai nisa a tiri wa a ko wa.>> Aruben a weeni nna la ayen ka wa vari wa ba jigi a ta wa a ga te wa kowa. 23Josefi ale jam wa suataŋa jigi la, ba yaa yeeri wa garuk naliŋka ate wa jo la. 24Ba yaa pai wa basi vinni po. Vinni a jam ka vili koruk, nyiam jam ka di po. 25Ba le kali a dɛ ba ŋandiinta la, ba yaa nya Ismael dem a bo ba toroko po a nyini Gilead a cheena. Ba laalaakomima a ji ka ŋan baai nyum ale masa la, ale ŋan baai ate ba dan pai sa jaab wa kan kaasi la ale tiib sim, a cheŋ Ejipiti. 26Juda yaa weeni wa suataŋa ayen, <<Ka boan nyuenta ate ti le nya ase ti nin ko ti yua baaŋka alege lik wa ziimu? 27Ni jam, ni te ti pai wa da te Ismael demma abe ti kan pai nisa ko wa, wa ka ti suok, tidek nyiŋ lam ale ziim. Wa suataŋa a yaa siak. 28Midian geruŋdɔma ale jam paari la, wa suataŋa yaa dari Josefi yeeri vinni po a pai wa da kpana ligbie pisiye a te Ismael demma ate ba ta wa cheŋ. 29Aruben ale ŋman cheŋ vinni a nya ale Josefi karo la, wa yaa dari wa gattaŋa cheeri. 30Wa yaa ŋman cheŋ wa suataŋa jigi a weeni ba ayen, <<Biika karo. Mi m cheem va ka bɛ?>> 31Ba yaa pai Josefi garukku, a tɔgri buuk a pai garukku a lusi ziimu po. 32Ba yaa ta Josefi garuk naliŋka a cheŋ wa kowa jigi a weeni wa ayen, <<Tama ale nya diila ale nna. Kpesi nya ase ka fi biika garukku ale la ya.>> 33Wa yaa miŋ ku a weeni ayen, <<Ka m biika garukku ale la. Gɔi duŋ ale yik m biika. Ka sum dari Josefi a passi ka zɔna zɔna.>> 34Jekob yaa dari wa gattaŋa cheeri a pai garuk zagsik a jo a kum wa biika da boari. 35Wa nidoabilisaŋa ale wa liema a jam ayen ba yik wa ate wa sui yɔk, alege wa zɛri. Wa weeni ayen, <<Aaya, mi a kum kama ayen m ga siŋ vɔrup a cheŋ m biika jigi.>> Dila wa kowa a yaa kum wa biika. 36Alege dila meena, Midian demma a pai Josefi a da ka Ejipiti a te Potifar, Faaro niŋdeerɔma wanyi, limisidɔma kpagni.

Currently Selected:

Piilimka 37: BWU

Highlight

Compare

Copy