Ezekiel 30

1Naawen a biisi ale mi ayen, 2<<Saalɔ biiga, mooli a weeni ayen, <Nyɔnɔwa Naawen ale biisi diila ale nna. Kaari a weeni ayen, Da beoku danni a cheena. 3Danni a moata, Naawen buusa danni a moata. Di za di chim ka buusa dai ale diipo ate wa le bo tɛŋsaŋa buusa la. 4Dachiak ale siti Ejipiti, ate Kus nyiŋ a gɔk ale yɔgsum. Koka a dan piilim Ejipiti, wa le jigsi ale ŋan baai la ba le pai ta cheŋ, ate wa nyubaŋa meena a wɛ lo. 5Kus ale Put ale Liidiya ale Arabia meena ale Kub ale mi nuruma ale nye nɔiyeŋka la ale kpi kpaliŋka po ale Ejipiti.

6<< <Naawen ale weeni diila ale nna, Baai ale kpaliŋ a maari Ejipiti la ale kpi. Pagrim buui ate wa ta kanjantaŋa ale bu la ale bɛ. Nuruma ale bo Ejipiti la ale kpi kpaliŋka po a nyini Migdol ale bo wiiluk geŋka la a ga paari Aswan ale bo yeseok geŋka la. Nyɔnɔwa Naawen ale weeni.

7<< <Si le chim tɛŋ sii ate ba je si basi. Ejipiti tɛŋsa ale kaasi kama a bie a doa. 8Ate ba yaa seba ayen Mi ale Naawen ase m nin ju Ejipiti ale bolim ate tɛŋ sii meena ale a maari ba la a kaasi.

9<< <Dila po m le tom nuruba ale ŋaaruŋta ate ba nyigsi Kus ale a poli ayen wari a kan daani ba la. M dan boro a namsi Ejipiti, Kus nuruma nyiŋsa ale gɔk ate yɔgsum yik ba. Da dila danni abe za di jam kama.

10<< <Nyɔnɔwa Naawen ale biisi diila ale nna. M le ko nuruba yega Ejipiti po ale Babilon naawa Nebukadnezzar pagrim. 11Nebukadnezzar ale wa tugurik tɔŋdɔma ate ba nyeka a tua a gaam tɛŋsa meena la, m le ta ba jam ate ba kaasi tɛŋka. Ba le yeeri ba gebisaŋa a siti Ejipiti ate baai ate ba a ko la a sueri tɛŋ. 12M le basi ate Nile beli naŋsaŋa meena a kpeeri a ko, ate mi yaa pai tɛŋka a da te nuru baata. M le basi ate nicham pai ba pagrim a kaasi tɛŋka ale jaab meena ale bo ka po la. Mi Naawen ale biisi.

13<< <Nyɔnɔwa Naawen ale biisi diila ale nna. M le kaasi bɔgtaŋa abe m pai wenaŋa ŋanmɛɛntaŋa Memfis tɛŋka po a ta cheŋ. Niŋdeerɔ a kan ŋman bo Ejipiti tɛŋka po. M le basi a te yɔgsum a bo Ejipiti tɛŋka meena po. 14M le basi ate tɛŋka Patros a doa koruk abe m ju bolim Zoan abe m namsi Tebes. 15M le kpiiri m suipuurumu a basi Sin zuk. Dula ale chim Ejipiti jigi pagrik. M le basi ate nuruba yegayega Tebes po a kpi. 16M le ju Ejipiti ale bolim Sin ale bo ka nyiŋ doma po. Tebes parisaŋa ale wɛ lo. Memfis ale kasim ta ka daanika daa meena. 17On ale Pi Beset bi paalukku ale kpi kpaliŋ po abe ba yik ba gela a ta cheŋ. 18Dai dii dai ate mi a wɛ Ejipiti pagrimu la Tayapanes po ku le chim legi. Ate wa kan ŋman ta kanjanta ale wa pagrimu. Chiŋmari ale lik Ejipiti ate ka tɛŋ kpaŋsaŋa ba yik ta cheŋ. 19Dila la m le namsi Ejipiti ate ba seba ayen mi ka Naawen.> >>

20Ba le jam yik ti ta cheŋ la, bena pi ale dinyi wa po, chiik kaai ale a piilim la ka daa ŋayopɔi dai ate Naawen yaa biisi ale mi ayen, 21<<Saalɔ biiga, mi wɛ Ejipiti naawa Faaro nisaŋa ale pagra la kama. Ban pobi si dila nyiŋ si kan tomu. Ba an vili si ale garuk pali ya, dila nyiŋ si kan pagra a yik gebik kpaliŋ po. 22Dila la Nyɔnɔwa Naawen ale biisi diila ale nna. Mi ta ka chaab ale Ejipiti naawa Faaro. M le wɛ wa nisimaŋa. M le wɛ sii le pagra la ale sii ale wɛ la meena. Abe m basi ate gebika nyini wa nisaŋa po lo tɛŋ. 23M le basi ate Ejipiti demma a waaŋ tɛŋsaŋa po meena. Ba le waaŋ bo tɛŋsa tɔgatɔga po. 24M le basi ate Babilon naawa nisimaŋa a pagra a yaa pai gebik a nyo si po. Alege mi le wɛ Faaro nisimaŋa. Ate wa yaa dan tu Babilon naawa wa le kum ale nyiŋdomma ase waai ale boro a kpi la. 25Dila la m le basi ate Babilon naawa nisaŋa a pagra alege Faaro nisaŋa kan pagra. M dan pai gebika a nyo Babilon naawa nisa po ate wa siti Ejipiti naawa nuruba ale seba ayen ka Mi ale Naawen. 26Ate m yaa basi ate Ejipiti demma a waaŋ a bo tɛŋsa tɔgatɔga po. Ate ba seba ayen Mi ale Naawen.

Currently Selected:

Ezekiel 30: BWU

Highlight

Copy

Compare