Ezekiel 29

1Ba le yik tama a ta cheŋ la ben dii ale nye tama bena pi la, chiisa piwa po ka daa pi ale ŋaye dai ate Naawen a biisi ale mi ayen, 2<<Saalɔ biiga, zak nya Faaro Ejipiti naawa a mooli te wa le Ejipiti meena. 3Weeni wa ayen, <Nyɔnɔwa Naawen ale biisi diila ale nna, Mi ta ka chaab ale fi Faaro Ejipiti naawa. Fi a nye ase ka ŋauk tanjaŋini ale bo Nile benni po la. Fi weeni ayen Nile benni ka mi ale soa mi nye di a te ka m dek. 4Alege m le pai gɔtik a nyo fi chikpeeŋa po, ate m basi ate jumaŋa ale bo Nile benni po la a maŋ fi ganaŋa. M le dari fu yeeri fi belaŋa po ale juma ŋaai meena ale maŋ fi ganaŋa la. 5M le pai fu basi gɔnni po, fi ale fi jumaŋa meena ale bo fi belaŋa po la. Ni le bo kunkoŋŋa, ba kan pai ni ba be kan gu ni. M pai ni te ka gɔi duŋsaŋa ale wenzuk nuinsaŋa ayen si dɛ ni. 6Ate nuruma meena ale bo Ejipiti la a seba ayen ka Mi ale Naawen. Izirali a nye ka nyiŋbiiri a maŋ ni ayen ba nya maarika alege ni a nye ase ka kinkari dagbiok la. 7Ba le yik fi ale nisa la, fi wɛ kama a chub ba ŋmankpalaŋa a cheeri. Ba le sali fu la, fi wɛ kama ate ba ŋaaŋsaŋa a vuri.

8<< <Dila la Nyɔnɔwa Naawen ale biisi diila ale nna. M le basi ate dachaasa a siti fu a ko fi nuruma ale fi duŋsaŋa. 9Ejipiti ale chim ka tɛŋ koruk a doa. Ate ba yaa seba ayen ka Mi ale Naawen. Dii nyiŋla fi weeni kama ayen, <<Nile benni ka mi ale soa, mi abe le nye di. 10Mi ta ka chaab ale fu ale fi belaŋa. M le kaasi Ejipiti tɛŋka abe m basi ate ka chim tɛŋ koruk a nyini Migdol ale bo wiiluk geŋ la a ga paari Aswan ale bo yeseok geŋ la, a ta ga paari Kus tɛŋ banni. 11Nuru yaase duŋ a kan cheŋ va du a taamu, waai abe kan bo Ejipiti tɛŋka po a ga paari bena pisinaansi. 12M le te ti Ejipiti tɛŋka a chim tɛŋ kaai ate ba je ka basi tɛŋsa meena po. Ka tɛŋ kpieŋsaŋa ba le je si basi tɛŋsa meena po, a ta ga paari bena pisinaansi. M le basi ate Ejipiti demma a waaŋ a jo tɛŋsa meena po.

13<< <Nyɔnɔwa Naawen ale biisi diila ale nna, Bena pisinaansiwa ŋaaŋnyiŋ m le tigsi Ejipiti demma ale waaŋ bo tɛŋ sii meena po la. 14M le ta Ejipiti demma ba yik la a ŋmani. M le te ba ŋmani Patros ba le nyini juijui la. Ba yaa le chim tɛŋ wobsik. 15Ka le chim tɛŋ wobsik, ka kan ŋman ta pagrim tɛŋ yonsa zuwa. M le basi ate ka ŋmasi wobsa ka kan ta pagrim a ŋma nya tɛŋ yonsa zuwa. 16Izirali demma a kan ŋma nya Ejipiti a yaali maarika. Ejipiti demma ninammu ale teeri Izirali ba biemu ba le jam cheemu a nya Ejipiti a yaali maarika la. Ate ba yaa seba ayen Mi ale Nyɔnɔwa Naawen.> >>

17Ba le jam yik ti ta cheŋ la, bena pisiye ale ŋayopɔiwa po, piilimka chiika ka piilimka dai, Naawen yaa biisi ale mi ayen. 18<<Saalɔ biiga, Babilon naawa Nebukadnezzar ale wa tugurik tɔŋdɔma a chiib kpaliŋ kama ale Taaya. Tugurik tɔŋdɔ meena zuk a jam kpa kama ate ŋmankpala meena a muli. Alege Nebukadnezzar ale wa tugurik tɔŋdɔma an nya jaab jaab ba le kpaliŋ ale Taaya. 19Dila la Nyɔnɔwa Naawen ale biisi diila ale nna, Mi le pai Ejipiti tɛŋka a te Nebukadnezzar Babilon naawa. Mi le ta Ejipiti nuruma a cheŋ ate wa le jigsi ale ŋan baai meena a chim tugurik tɔŋdɔma tutuna la. 20Nebukadnezzar ale tom nna yegayega a te mu la nyiŋ m le pai Ejipiti tɛŋka a te wa ase tutuna la. Nyɔnɔwa Naawen ale weeni.

21<<Dila powa m le ŋman basi ate Izirali nya pagrim, ate m yaa te fi Ezekiel a biisi a te ba. Ate ba seba ayen Mi ale Naawen.>>

Currently Selected:

Ezekiel 29: BWU

Highlight

Copy

Compare