Ezekiel 21

1Naawen yaa biisi ale mi ayen, 2<<Saalɔ biiga, nya Jerusalem geŋ a biisi a te jigi weleŋka. Biisi a te Izirali tɛŋka. 3Weeni Izirali ayen, <Naawen ale weeni diila ale nna, Mi ta ka chaab ale ni. M le yeeri m gebi kpieŋka ka fooku po a ko baai ale tom a kaasi ale baai ale tom a magsi la. 4Mi ale a yaali ayen m ko baai le tom a magsi ale baai ale kan tom a magsi la nyiŋ, m le yeeri m gebika fooku po a siti nuruba meena a nyini yeseoku geŋ a ga paari wiilukku geŋ. 5Ate nuruba meena ale seba ayen ka mi Naawen ale yeeri m gebika fooku po. Mi gebika abe kan ŋman su fooku po.>

6<<Dila nyiŋ saalɔ biiga a kum ale suinum kaasuŋ ale niniga. A kum nuruma niŋ. 7Ba dan bek fu ayen, <Ka boa ale soa ate fi a kum?> Weeni ba ayen, <Mi ale wom dii ale za ku nye la nyiŋ. Ku dan nye yɔgsum ale yik waai meena ate nisima a kpi limalima. Yɔgsum ale yik waai meena, duna ale gbariŋ.> Be nya ku cheena, ku be le nye. Nyɔnɔwa Naawen ale weeni.>>

8Naawen yaa biisi ale mi ayen, 9<<Saalɔ biiga, mooli a weeni ayen, <Naawen ale weeni diila ale nna. Gebik, gebik ate ba nye ate ka ta nɔi ale a nyaksi. 10Ba nye ate ka ta nɔi a magsi ka koka. Ba salisi ka ate ka a nyaksi ase ka wen ale a nyaksi la. Ni sue an peenti ale namsi beoku dɛ ale gebika. Alege mi biika Juda an tagri ya ba le jam a nak wa ale doari la. 11Ba salisi gebika. Ka magsi ka nisa po yikka. Ka ta ka nɔi ale salisi, a magsi koorɔwa yikka. 12A kaari a kum, saalɔ biiga, gebika a magsi ka mi nuruma, ale niŋdeerɔma meena ale bo Izirali la. Ba le ko ba ale gebika ale mi nuruma. Dila nyiŋ ni a nak ni kuusa ale sui kaasima.

13<< <Chanisi nyaka ale jam. Ate Juda waai ate Babilon tugurik tɔŋdɔma a kisa la a kan beni. Nyɔnɔwa Naawen ale weeni.>

14<<Dila nyiŋ saalɔ biiga mooli abe fi a nak nichaala Basi ate gebika a che buye, buta. Ka nye magsi ka koka, ka magsi ka koka yegayega. Gebika de a gilim ka nuruma ayen ka ko. 15Yɔgsum ale yik ba ate nuruba yega a kpi. M pai gebik kooŋka a basi ka tuok meena nɔi. Ba nye gebika kama ate ka a nyaksi ase wen ale a nyaksi la. Ba yik ka magsi ka koka. 16Gebika, gebi juga geŋ abe fi gebi gala geŋ. Gebi kauk kuui ate fi nɔnni a tuk la. 17Mi mɛ ale nak nichaala, abe m pai suipuurum a tom. Mi Naawen ale weeni.

18Naawen yaa biisi ale mi ayen, 19<<Saalɔ biiga, daani suita tiye, tii ate Babilon naawa ale wa gebika ale va la. Suitaŋa tiyewa dɛ a piilim tɛŋ yeŋ po. Nye daana ate ti poori ate kunyi a cheŋ tɛŋka. 20Daani ate suiku kunyi a sak ate wa pai wa gebika a cheŋ Arabba Ammon demma tɛŋka. Daani ate m kula mɛ a sak ku le a cheŋ Juda ale Jerusalem ate parik pagrisaŋa a gilim la. 21Babilon naawa yaa jam juijui ate suiku a poori la, a yaa pai kperisa a tom. Wa yaa pai peemaŋa a nak gbaŋ ale pai wa dɔkdemma bɔgtaŋa a bek bega. Abe wa nya duŋ kaai ate wa pai kaab bɔgluk a yaa pai paŋni a seba wa le wa cheŋ juijui la. 22Gbaŋka ale bo wa juga nisaŋa po la a yaa weeni wa ayen wa cheŋ Jerusalem. A weeni wa ayen wa pai chibsa a chubi tuataŋa a wɛ, abe wa kaari kpaliŋ kaarik a te suik ate ba a ko, abe wa se bimbima a ta jueli paari parisaŋa ŋmai ate ba baga a siti ba. 23Jerusalem nuruma yaa nye nɔiyeŋ ale tɛŋ yonsa ayen ba maari ba ate ba kpaliŋ ale Babilon. Ba le poli ayen ka venta popola, alege ku a sak ka biemu ale ka diila, ate ba yik ba.

24<<Dila nyiŋ Nyɔnɔwa Naawen ale biisi diila ale nna, <Ni ale ta chaab ale mi la, ni sak ni biemu ale ka diila kama. Wie ŋaai meena ate ni a nye la a sak ni biemu kama. Kude nyiŋ, dachaasaŋa ale yik ni.

25<< <Izirali niŋdeerɔ daŋtika nna, ba le ko fu. Diipo ale magsi ba namsi fu la a paari ya. 26Nyɔnɔwa Naawen ale biisi diila ale nna, lati fi jabuui fi pai vili fi zukku la, abe fi lak fi naam zutɔkka. Wie ale tagri. Nuru kpienta ale chim nuru fiisa ate nuru fiisa a chim nuru kpienta. 27Kaasuŋ, kaasuŋ. M le basi ate ku kaasi. M kan basi ate ba ŋman se dela, se ka waai a nin jam magsi naab chim ka. Ate m yaa te wa suik kula.>

28<<Alege fi saalɔ biiga, mooli a weeni ayen, Nyɔnɔwa Naawen ale weeni dii a magsi chaab ale Ammon nuruma ale ba leetaŋa la ale nna. Ayen, gebik, gebik ate ba yeeri ka fook po. Ba nye ate ka a nyaksi kama a magsi ko ka ale kaasika. Ka a nyaksi ase ka wen ale a nyaksi la. 29Biisiteerɔba a nya ka venta wie a magsi chaab ale fu ale a mooli venta wie a te. Ba le pai gebika a vi ka nuru baataŋa ale nuru daŋtisaŋa ŋie zuk. Ba buusaŋa danni a paari kama. Ba namsika danni a paari kama. 30Pa gebika a ŋman su ka fooku po. M le bo fi buusa ka juijui ate ba jam nye fu la. Tɛŋ kaai po ate ba jam biak fu la. 31Mi le sak m suipuurumu ale fu. M suinni ale dɛ fu ka nna ase bolim la. M le pai fu te nyeka tuem nyam, baai ale potim seba yik kaasika. 32Fi za fi a nye ase ka kpaam la a te bolimu. Fi le kpi tɛŋka po. Ba kan teeri fi wari ya, dii nyiŋla, Mi Naawen ale biisi.>>

Currently Selected:

Ezekiel 21: BWU

Highlight

Copy

Compare