Ezekiel 20

1Ba le yik ti a ta cheŋ la, ku bena ŋayopɔi wa chiisa sinuwa po ka da pi dai ate Izirali niŋdeerɔma a jam kali mi niŋ a bek Naawen wie.

2Naawen yaa weeni mi ayen, 3Saalɔ biiga, weeni Izirali niŋdeerɔma ayen, <<Nyɔnɔwa Naawen ale biisi diila ale nna. Ni jam ayen ni bek mi ka begaa? Ase mi ale sum vua la, mi kan te ni suik ate ni bek mi bega. Nyɔnɔwa Naawen ale weeni.

4<<Fi le bo ba buusa? Fi le bo ba buusa, saalɔ biiga? Basi ate ba seba wie ŋaai ate mi kisa ate ba kokpieŋsaŋa a nye la. 5Weeni ba ayen, <Nyɔnɔwa Naawen ale biisi diila ale nna, Mi ale lueri Izirali la, Mi puulim kama ale Jekob ŋaaŋbisaŋa. Mi pai m dek a sak ba Ejipiti po ate ba seba mu. A puulim ayen mi ka Naawen ni Wenni. 6Dila po mi puulim kama ayen m le ta ba nyini Ejipiti tɛŋka a nyini ate ba ga jo tɛŋ kaai ate mi yaali te ba. Ka ka tɛŋ kaai ale ta poosuk ale nala tɛŋka meena po. 7Mi weeni ba kama ayen, waai meena a yuk bɔgluk tii ate mi kisa ate ni nya ale a yaali la a basi. Ni kan daŋ nidek ale Ejipiti bɔgtaŋa. Mi ka Naawen ni Wenni.

8<<Alege ba tulim ta chaab ale mi ale zɛri ba kan wom mi. Ba an yuk bɔgluk tii ate mi kisa ate ba nya a yaali la basi ya. Ba an pai Ejipiti bɔgtaŋa a basi ya. Ate mi sui a kasim a puuri ni ba nna yegayega ale ba diem bo Ejipiti. 9Alege Mi an nye dii ale di basi ate tɛŋ sii po ate Izirali demma a boro la mi kan nya zula la yaase ku kaasi m yuei la. Mi pai m dek a sak Izirali demma kama ale puulim ayen m le ta ba nyini ate tɛŋsaŋa meena a nya. 10Ate mi yaa yeeri ba Ejipiti a ta ba jam gɔnni po. 11Mi yaa pai m ŋmarisika a te ba ale weeni ba m buusaŋa ate ba daa zuli ŋa abe ba baga a boro. 12Mi yaa te ba Vuusum Daaŋa ase magsa la ayen mi ale ba suŋsuŋ ba seba ayen ka mi Naawen ale basi ate ŋa chim da weleŋsa.

13<<Alege gɔnni po Izirali tulim ta chaab ale mi. Ba an va mi ŋmarisika ale zɛri m buusaŋa, ŋaai ale ŋa basi ate ba vua ase ba le a zuli ŋa. Ba kan zuli Vuusum Daaŋa. Ate mi sui a jam a puuri nna yegayega ate mi a ko ba gɔnni po. 14Alege mi nye dila ka mi yuenni nyiŋ. Dila ale basi ate tɛŋ sii ale a nya la a kan kaasi mi yuei ya, ase m le jam ta Izirali demma a nyini Ejipiti po a nyini la. 15Mi Naawen yaa pɛ ayen mi kan ta Izirali demma a jam jo tɛŋ kaai ate mi a te ba la po. Ka ta ka poosuk ale nala tɛŋka meena po. 16Dii nyiŋla ba zɛri m buusaŋa ale m ŋmarisika kama an va ŋa. Ba an zuli Vuusum daaŋa ale a yaali ba bɔgtaŋa kaabka. 17Alege mi jam ta jiirim ale ba. Mi an jam ko ba yaase m tuk ba gɔnni po. 18Mi yaa weeni ba bisaŋa gɔnni po ayen, ni kan va ni nyama ŋmarisika, yaa ni va ba buusaŋa. Ni kan daŋ nidek ale ba bɔgtaŋa. 19Mi ka Naawen ni Wenni. Ni va m ŋmarisika, a chali m buusaŋa abe ni va ŋa. 20Ni basi ate m Vuusum Daaŋa a welema ate ku chim wa dii ale bo mi ale nama suŋsuŋ. Ate ni seba ayen Mi ale Naawen ni Wen.

21<<Alege bisaŋa a tulim ta chaab ale mi. Ba an va m ŋmarisika, ba be kan kpesi a chali m buusaŋa ate nuruba a boro ase ba nin va ŋa. Ba an zuli m Vuusum Daaŋa. Ate mi sui yaa puuri nna yegayega ale ba gɔnni a po. 22Alege mi yik m suinni. Mi ale toalim ta ba nyini Ejipiti tɛŋka po nyini la ate tɛŋsaŋa a nya la ba kan kaasi m yuei ya. 23Gɔnni po mi yaa pɛ ayen mi le basi ate Izirali demma waaŋ tɛŋsaŋa meena po, 24dii nyiŋla ba an chali m buusaŋa. Ba zɛri m ŋmarisika alege an zuli m Vuusum Daaŋa alege a kaab ba nyama bɔgta. 25Mi mɛ yaa te ba suik ayen ba va ŋmarisika kaai ale kan nala ale buusaŋa ŋaai ate ba kan baga a boro la. 26Mi yaa basi ate ba daŋ badek ale ba bi kpaŋŋa ate ba kaab a te ba bɔgtaŋa ase tiirita la. Mi yaali kama ayen m te yɔgsum yik ba ate ba seba ayen Mi ale Naawen.

27<<Dila saalɔ biiga, biisi te Izirali demma. Weeni ba ayen, <Nyɔnɔwa Naawen ale biisi diila ale nna. Ni kokpieŋsaŋa a biisi kaasi mi kama ale ka siaka ale mu. 28Mi ale ta ni jam tɛŋ kaai ate mi puulim ayen mi le te ni la ate ni ga nya guuk woŋtaŋa ale tiisaŋa la ni deri nye kaabka dula. A nye kaab kaai ale basi ate m sui a puuri nna yegayega. Ni pai ŋan baai mɛ nyum ale masa ale daam a kaab. 29Ate mi yaa weeni ayen ka boan jigi ale jueli nna ate ni a cheŋŋi?>> Ba a wi dula ayen ka Bama #20:29 Bama kiri ale juijui ale jueli. a ta paari jinla.

30<<Dila weeni Izirali demma ayen, <Nyɔnɔwa Naawen ale biisi diila ale nna. Ni a yaali ayen ni daŋ nidek ase ka ni kokpieŋsaŋa ale jam nye diila? Ni a yaali ayen ni kan ta siaka abe ni yaali bɔgluk tii ate mi kisa la? 31Ase ni dan pai ni bisaŋa a kaab bolim po ase ni tiirim la, ni a daŋ ka nidek ale ni bɔgta meena a ta jam paari jinla. Dila la Izirali demma m basi ate ni a bek mu begaa? Mi Nyɔnɔwa Naawen ale a weeni ayen mi ale vua la, mi kan siak beŋŋa.

32<<Ni ale a yaali diila a kan nye. Ni weeni ayen nama a yaali ayen ni a nye ase ka tɛŋ yonsa la. A yaali ayen ni a nye ase nuruba ale bo tɛŋ yonsa a nye diila. Ti a yaali ayen ti a kaab ka bɔgluk tii ate ba pai daata ale tana a nye. 33Mi Nyɔnɔwa Naawen ale a weeni ayen mi ale toalim vua la, m le pai m pagrim kpiemu ale suipuurumu a basi ni zuk. 34M le yeeri tɛŋ yonsa ate ni waaŋ boro. M le pai m pagrim kpiemu ale suipuurum a ta ni nyini tɛŋ sii ate ni jam waaŋ boro la a jam jigi yeŋ. 35M le ta ni jam tɛŋsaŋa gɔnni po ate dula ti le tu chaab. Dula jigini m le bo ni buusa. 36M le jam bo ni kokpieŋsaŋa buusa gɔnni po Ejipiti diila, m le bo nama mɛ buusa ka dila dekdega. Nyɔnɔwa Naawen ale weeni. 37Mi le chiini ni ase piisa la a ta jam jigi yeŋ ate ti nye nɔiyeŋ ale chaab. 38Mi gebi baai ale zɛri a kan zuli mi ale tulim ta chaab ale mi la a basi. Tɛŋ kaai ate ba boro nna, m le ta ba nyini ka po nyini. Ba kan jo Izirali tɛŋka po. Ate ni yaa seba ayen ka Mi ale Naawen.

39<<Nyɔnɔwa Naawen ale biisi diila ale nna. Izirali demma, ni ga kaab ni bɔgta yɔgla, waai meena. Alege ŋaaŋnyiŋ ni le wom mu. Ni kan kasim a kaasi m tuilum yuenni ale ni tiiritaŋa ale ni bɔgtaŋa. 40Mi tuilum guuku zuk Izirali guuk kuui ale woŋŋa la, Izirali demma meena ale puusi mi. Mi Nyɔnɔwa Naawen ale weeni. Dula jigini m le tuesi ni. M le limisi ni tiiritaŋa ale ni ale dɛ niŋ a che ŋan baai la, ale ni tuilum ŋantaŋa meena. 41M le tuesi ni ase kaab kaai nyum ale masa la ase m nin ta ni nyini tɛŋ yonsa po a nyini a ta ni nyini tɛŋ sii, ate ni waaŋ boro la a jam jigi yeŋ. Nama jigi m le sak mi le ta tuilum dii ate tɛŋsaŋa a nya. 42M dan ta ni jam jo Izirali tɛŋka po, tɛŋ kaai ate mi puulim ayen m le te ni kokpieŋsaŋa la, ni le seba ayen mi ka Naawen. 43Dula jigini ni le teeri dii meena ate ni jam nye a daŋ nidek la. Ate ni kisi nidek biem buui meena ate ni nye la nyiŋ. 44Mi le nye ale ni m yuenni nyiŋ, daa yen ka ni biemu yaase daŋta wieŋa nyiŋŋa. Izirali demma ate ni seba ayen ka Mi ale Naawen. Nyɔnɔwa Naawen ale weeni.>>

45Naawen yaa biisi ale mi ayen, 46<<Saalɔ biiga, nya yeseok geŋka. Mooli te yeseoku ale Negev tiiku ale bo dula la. 47Weeni Negev tiiku ayen ku wom Naawen wanni. Nyɔnɔwa Naawen ale biisi diila ale nna. M gomsi kama ayen m ju fu ale bolim ate bu dɛ tiyɔgsaŋa ale tikosisaŋa meena. Bolim ŋiaka a kan kpimsi. A zaani yeseoku a ga paari wiiluk bolim tuilukku ale paari jigi meena. 48Ate nuruma meena yaa nya ayen ka mi Naawen ale ju bolimu. Bu kan kpimsi.>>

49Mi yaa weeni, <<Nyɔnɔ Naawen yaa, nuruma a biisi ka mi wie ayen, <Tin ka wa ale a suelim sunsuelimaŋa la yaa?> >>

Currently Selected:

Ezekiel 20: BWU

Highlight

Copy

Compare