Ezekiel 16

1Naawen yaa biisi ale mi ayen, 2<<Saalɔ biiga, weeni Jerusalem demma ale ba nye bioku. 3Weeni ayen, Nyɔnɔwa Naawen ale weeni Jerusalem dii la ale nna: Ba jam biak ni ka Keenan demma tɛŋka: Ni kowa jam ka Amori demma denɔ, ate ni mawa a chim Yit demma denɔ. 4Dai dii dai ate ba biak fu la, ba an so fi nyiŋka, ba an gebi fi suiku. Ba an pai yesa a sa fu yaa ba pai gatta a pobi fu. 5Fi jiirim an dari waai ayen wa nye wieŋa de dii a te fu. Ba pai fu kama a yuk basi peelim, dii nyiŋla ba jam kisi fu kama da dii danni ate ba biak fu la,

6<<Mi ale a taam la, mi yaa nya fu dua ziimu po a tɔŋ, ate mi yaa weeni fu ayen, <Vuuk.> 7Mi basi kama ate fi chim ase viok la. Ate fi chim a waaŋ a nyaksi. Ate fi nyini biisa ate fi zuisaŋa a chim, alege fi ta chaboala a ka gatta.

8<<Ku ŋaaŋnyiŋ ate mi a taam a nya fu ale fi pak a magsi yaalika. Mi yaa pai m garukku a lik fi chaboalaŋa Ate mi puulim alege ate ti nye nɔiyeŋ ate m soa fu. Nyɔnɔwa Naawen ale weeni. 9Ate mi so fu ale nyiam ale sugri fi ziimu a sa fu ale kpaam. 10A pai garuk naluŋ sii ate ba pai garuk pein a yɔk la a jo fu ale pai gbaŋ maŋsa nuensa a su fu. A pai garuk kuui ale a nyaksi a pobi fu ale pai garuk kuui ale a sati a lik fu. 11A pai kpana a su fi ŋiri ale fi nisima, 12baŋ a su fi nyori, a pai tukpana a su fi tue, a pai naam zutɔk a vuk fi zuk. 13Fi yaa jo ligmɔniŋ ale kpana. Fi gattaŋa a jam a nyaksi kama alege a sati ale yɔk ale garuk pein. Fi jam a dɛ ka zom maŋ ale siita ale kpaam. Fi jam kasim nala kama ale chim nipok naab. 14Ate fi yuei yiti tɛŋsaŋa po, dii nyiŋla fi nala ka nna yegayega. Fi nalimu jam ka chekki, dii nyiŋla zuli ŋaai ate mi te fu la. Nyɔnɔwa Naawen ale weeni.

15<<Alege fi ta sebchakka ale fi nalimu. A yaa chim ja kaasuŋ, fi yuenni ale yiti la nyiŋ. Waai a daa taam fi deri goa ale wa. 16A pai fi gattaŋa gela a nye ate kaabka jigini a nye nna ŋmiriŋmiri. Dula jigini fi yaa tom kaasuŋ tuimaŋa. Wieŋa de m magsi ŋa a nye, ŋa poom kan boro. 17Mi ligmɔniŋka ale kpanaŋa ate m pai te fu ate fi nye ŋan naluŋ sii la fi ŋman pai nye ka bɔgta nidoaba a tom fi kaasuŋ tuimaŋa ale ti. 18Ate fi pai fi garuk naliŋsaŋa ate ba pai garuk peinni a yɔk la a lik bɔgtaŋa. A pai m kpaamu ale ŋan baai nyummu ale masa la a te bɔgtaŋa. 19Boroboroku, zommu, kpaamu ale siitaŋa ate mi pai a te fu ayen fi a dɛ la fi pai ba mɛ a kaab bɔgta. Dii ale nye la ale nna. Nyɔnɔwa Naawen ale weeni.

20<<Alege fi le a goa ale nidoama an diem magsi fu ate fi pai bisaŋa ale liema baai ale ka mi bisa la a kaab bɔgta. 21Fi ko m bisaŋa a pai ba ju bolim a te bɔgtaŋa. 22Fi ale a nye fi nye bioku ale nidoama bobi goomu la fi kan teeri diipo ate fi paala la a ta chaboala a ka gatta ate ba basi fu ziimu po la.

23<<Ku le bie! Ku le bie a te fu, Nyɔnɔwa Naawen ale weeni. Fi le nye biemu de meena la ŋaaŋnyiŋ, 24fi se ka jigi ayen fi a kaab bɔgta. Fi nye tɛŋ meena po kama bɔgta kaabka jigi. 25Fi se kaabka jiga kama tɛŋ meena piilimka jigi. Fi nye kama ate m kisi fi nalimu. Fi nidoama bobi goomu yaa kasim bie kama. 26Fi le Ejipiti demma jam bobi chaab a goa kama diipo ate ni jam bo ale chaab la. Ni jam a nye biem ale chaab. Fi nidoama bobi goomu a basi kama ate m sui a puuri. 27Dila mi yaa pai m pagrimu a tuesi ni tɛŋka gela. A basi ate baai ale kisi ni la a nak dɛ ni. Chivie jam ta Filistia nipooma kama ale ni wabaataŋa. 28Fi le Assiria demma a jam bobi chaab a goa diila fi kan chagi. Fi a goa ale ba kama alege fi kan chagi. 29Fi goa ale nuruba Kaldiya po, geruŋdɔma tɛŋka, alege fi diem a chagi ya.

30<<Kaasuŋ ale bo fi suinummu po, Nyɔnɔwa Naawen ale weeni. Fi a nye ka wie ŋaai meena ate nidoa yaali kaai tuiri ale kpari la a nye la. 31Fi se kab tii ate fi a kaab bɔgta la ka suik meena piilimka jigi ale tɛŋ meena po. Alege fi an jam a nye ase nidoa yaalik la fi le jam zɛri tutuna la.

32<<Fi ka pok waai ale nye kaasi ale kaboŋsaŋa nyeka. Fi a yaali ka nicham a gaam fi chorɔwa. 33Nidoama ale a tuni nipok kaasuŋta, alege fi a tuni baai meena ate fi a yaali la ate ba a jam fi jigi. Ate ba nyini jigi meena jam a goa ale fu. 34Dila nyiŋ fi ka fi tɔga ale nipok kaasuŋta. Waai an weeni fu ayen fi chim ja kaasuŋoa ate fi tuni ligra a te alege ba kan tuni a te fi. Fi ka fi tɔga.

35<<Dila nipok kaasuŋoa, wom Naawen ale a weeni la. 36Nyɔnɔwa Naawen ale biisi diila ale nna, Fi pai fi chaboalaŋa a sak tɛŋ yonsa. Fi an suk fidek ale fi nɔŋtaŋa goomu ale bɔgtaŋa ate mi kisi la kaabka. Fi ko fi bisaŋa a pai ba ziimu a kaab bɔgta. 37Dila m le tigsi fi nɔŋtaŋa ale baai ate fi a dɛ masim ale ba la. M le tigsi baai ate fi a yaali ale baai ate fi kisa la. M le tigsi ba ate ba gilim fu ate m yeeri fi chaboala ba niŋ ate ba nya fi chaboalaŋa. 38M le namsi fu ase nipooba ale nye kaboŋsa ate ba a namsi ba yaase nuru koorisa ate ba a namsi diila. M le ko fu dii nyiŋla m sui ale a puuri ale a dɛ nyuri. 39M le pai fu a te fi nɔŋtaŋa. Ba le kaasi fi kaabka jiŋŋa abe ba kaasi juijui meena ate fi a kaab bɔgta la. Ba le cheeri fi gattaŋa a yeeri fi ŋan baai fi su la alege basi fu chaboala. 40Ba le ta nuru boari jam ate ba siti fu a yuk fu ale tana abe ba gebi fu gela gela ale gebi kpieŋsa. 41Ba le ju fu yeeŋa abe ba namsi fu nipok boari niŋ. M le kpegli fi nidoama bobi goomu ate fi kan ŋman tuni baai ate fi a yaali la. 42Ate m yaa vuusi ale m suinni abe m kan ŋma a dɛ nyuri ya. M le nye diki m sui kan ŋman puuri.

43<<Fi kan teeri diipo ate fi jam ka biik alege basi ate m sui a puuri ale nyeka de meena la, m le tuni fu fi le nye diila. Nyɔnɔwa Naawen ale weeni. Fi an pai nidoaba bobi goom a gum fi wa yɔnaŋa ate m kisi la po?

44<<Nuru waai ale a biisi yam wie la ale biisi nna a te fu. <Liewa a nye ase ka wa mawa la.> 45Fi a nye ase ka fi mawa ale kisi wa chorɔwa ale wa bisaŋa la. Fi a nye ase ka fi suataŋa ale kisi ba chorɔma ale ba bisaŋa la. Fi mawa jam ka Yit denɔ, fi kowa jam ka Amori denɔ. 46Fi soa kpagni ka Samaria denɔ a kali wiilukku geŋka ale wa liema, alege baaŋka Sodom denɔ a kali yeseoku geŋka ale wa liema. 47Daa yen fi le va ba nyeka ate mi kisa la nyiini alege fi nye kama a gaam ba le a nye diila. 48Mi Nyɔnɔwa Naawen la ale a weeni ayen mi ka waai ale vua. Kude ka wensie. Fi suoku Sodom ale wa liema a jam tom dii ate fi ale fi liema a tom la.

49<<Fi suoku Sodom ale jam tom wabiok kuui la ale nna. Wa le wa liema jam ta ka kanjanta ale ta ŋandiinta yegayega a dɛ ate ba sue yɔk. Alege ba kan maari ŋanjaksaŋa ale baai ale bola kan ta la. 50Dila Sodom ale wa liema a jam ta ka kanjanta ale nye wie mi niŋ ate mi kisi la. Mi le nya ba ale nye diila mi deri gebi ba wie basi. 51Samaria an jam nye waba tii ate fi nye la geli ya. Fi nye wie ŋaai ate mi kisi la a gaam ba kama. Fi basi kama ate fi suataŋa ale ba biemu a diem a nye nna ase nuru maŋsa la. 52Fi le dɛ chivie, dii nyiŋla fi te fi suataŋa ka suik. Ba zunchoŋ fu kama. Fi wabaataŋa jam bie gaam ba kama. Te chivie yik fu, dii nyiŋla fi nye ate fi suataŋa a poli ba ka nuru maŋsa.

53<<Alege m le pai ŋan maŋ sii meena ate Sodom ale wa liema a jam ta la a ŋman te ba. M le pai ŋan maŋ sii meena ate Samaria ale wa liema a jam ta la a ŋman te ba. Fi ale jam ta ŋan maŋ sii la m pai te ba mɛ. 54Ate fi dɛ chivie a magsi chaab ale fi le nye dii meena la. Fi suataŋa ale ba biemu meena fi basi kama ate ba sue yɔk. 55Fi suataŋa Sodom ale wa liema ale Samaria ale wa liema ale pilim ŋmani ba daam kuuni. Fi mɛ ale fi liema ale pilim ŋmani ka ni daam kuuni. 56Fi an poom teeri fi suoku mɛ fi kanjantaŋa danni, 57dii nyiŋla fi biemu jam lik kama. Yɔgyɔgla Edom nipooma ale baai ale moata ba la kan zuli fu. Filistia nipooma a kan zuli fu. Baai ale gilim fu la a kisi fu. 58Fi ninammu ale nna dii nyiŋla fi wabaataŋa ale fi nyeka ate m kisi la. Naawen ale weeni.

59<<Nyɔnɔwa Naawen ale biisi diila ale nna. Fi le nye kaasi la, m le nye fu ka dila dek. Mi ale fu ale nye nɔiyeŋ kaai ate fi pɛ ayen fi le ta la, fi kisa, a yik kaasi. 60Alege m le teeri nɔiyeŋ kaai ate mi jam nye ale fu diipo ate fu diem paala la, abe m ŋman nye nɔiyeŋ kaai ale ka boro a cheŋ la, 61Ate fi teeri dii ate fi jam nye la ate chivie yik fu fi le jam tuesi fi suataŋa kpaŋŋa ale baansaŋa la. M le pai ba a te fu ase lieba la, alege da ayen ba maa bo ka nɔiyeŋka po. 62M le nye m nɔiyeŋka ale fu ate fi seba ayen ka Mi ale Naawen. 63Fi le teeri fi le nye diila ate chivie yik fu. Fi kan ŋman lak nɔiya chivieŋa nyiŋ ate m ni vɔŋ dii meena ate fi nye la a te fu. Nyɔnɔwa Naawen ale weeni.

Currently Selected:

Ezekiel 16: BWU

Highlight

Copy

Compare