Teerika 5

1Moosis a tigsi Izirali demma meena a weeni ba ayen. Izirali demma, ni wom sinsaŋŋa ale wieŋa ate mi a weeni jinla de la. Ni zamsi ŋa abe ni seba a chak ayen ni va ŋa kama. 2Naawen dii ale ka ti Wen la a jam nye ka nɔiyeŋ ale ti Yoreb guuku. 3Ku be daa ti koma ate Naawen a jam nye nɔiyeŋka ale ba alege ka tama, baai meena ale vua a bo dela jinla de la. 4Naawen a jam biisi bolimu po ale ni ka nidek nimbie po guuku zuk. 5Diipo ate mi a jam zaani Naawen ale nama suŋsuŋ a pai wa wanni a te ni la dii nyiŋla ni jam yɔgsa kama ale bolimu ate ni an jueli guuku zuwa. Ate wa yaa weeni ayen. 6<<Mi ale Naawen dii ale ka fi Wen la, waai ale ta fu nyini Ejipiti a nyini yɔntidi tɛŋka po a nyini la. 7<<Kan ta wen yona a gum mi po. 8<<Kan nye bɔgluk ate ku a neesi jaab wenŋmazuk yaase tɛŋzuk yaase nyiam po a te fi dega. 9<<Kan koori tɛŋ a zuli ba yaase fi puusi ba, diila mi Naawen dii ale ka fi Wen la, ka nyuri Wen, a namsi bimbaansa ba koba biem nyiŋ a ta ga paari ba gaŋ sii ale a saari buta ale bunaansi la baai ale kisi mi la. 10Alege a sak ŋmanteka ale gaŋ sii ale saari tusidi a yaali mi ale ŋman ta m wieŋa la. 11<<Kan wi Naawen dii ale ka fi Wen la yuenni kinla, diila Naawen a kan basi waai ale a wi Wa yuenni kinla la. 12Kpesi Vuusum Danni abe fi basi ate di ta tuilum, ase Naawen dii ale ka fi Wen la ale weeni diila. 13Daa ŋayuebi fi pai tom fi tuimaŋa meena, 14alege daa ŋayopɔiwa danni ka Vuusum dai a te Naawen dii ale ka fi Wen la. Dai dila danni kan tom tuin yoŋŋoa. Fi dek kan tom yaase fi nidoabili yaase fi lie yaase tomteerɔ yaase dɔklie yaase fi lalik yaase boniŋ yaase fi duŋsaŋa kaai yaase nichaanɔ ale bo ale fi la. Dila ale ku basi ate fi tomteerɔwa ale dɔkliewa a vuusi ase fi la. 15Fi abe a teeri ayen fi jam ka yɔma a bo Ejipiti po ate Naawen dii ale ka fi Wen la a ta fi nyini ale wa nisima pagrim. Dila nyiŋla Naawen dii ale ka fi Wen la a weeni kama ayen fi a kpesi Vuusum Danni. 16<<A zuli fi ko ale fi ma ase Naawen dii ale ka fi Wen la ale weeni fi diila, ate fi goa a benni ate wari meena ale nye nalimnyiini a te fu tɛŋ kaai ate Naawen dii ale ka fi Wen la a te fu la. 17Kan ko nuru. 18Kan nye kaboŋŋa. 19Kan zu. 20Kan chim venta seerɔ a velim te fi vaanchoa. 21Kan ta kɔrisa ale fi vaanchoa powa, be kan ta kɔrisa ale fi vaanchoa yeri ya, yaase wa tɛŋŋa yaase wa tomteerɔ yaase wa dɔklie yaase wa lalik yaase wa boniŋa yaase jaabuuri meena ate fi vaanchoa a ta la.

22Sinsaŋŋa de ate Naawen weeni ale lueluk kpioŋ a nyini bolimu po ate tigsuŋku meena ale jam bo guuku zuk la a nyini chiŋmaaŋa ale legini po ale an ŋman gum wari du. Ate wa yaa ŋmarisi ŋa a dueni tintain paglaksa siye zuk a te mu.

23Ase nama ale ga wom lueluku legini po la, alege ate guuku zuk a dɛ ale bolim la, ni buuni po niŋdeerɔma meena a jam jam ka mi jigi. 24Ate ni yaa weeni ayen, <<Naawen dii ale ka ti Wen la a sak ti wa zulaŋa ale wa pagrimu kama ate tama me a wom wa lueluk bolimu po. Jinla ti nya kama ayen nuru a baga a boro kama ase Wen a nin poom a biisi ale wa. 25Alege yɔgyɔgla de, ka boa ale soa ate tama a kpi? Bolim kpiemu dɛ ale dɛ ti, ate ti kpi ase tama ale a wom Naawen dii ale ka ti Wen la lueluku ŋmana. 26Ka nuru wana ale diem wom Wen dii ale vua la lueluk ale ku a biisi bolim po ase tama la ale vua? 27Forisi moata ate fi wom dii meena ate Naawen dii ale ka ti Wen la a weeni la. Ate fi a yaa le weeni ti dii ate Naawen dii ale ka ti Wen la a weeni fu la. Tama ale wom abe ti va ŋa.>>

28Naawen a wom kama diipo ate nama a biisi ale mu la ate Naawen a yaa weeni mu ayen, <<M wom dii ate nuruma de a weeni fu la kama. Dii meena ate ba weeni la a nala kama. 29Mi dek a yaali kama ayen ba le chali mu yɔgsum ale ba suiniima meena abe ba ta m sinsaŋŋa diipo meena ate ku ale cheŋ nalimnyiini a te ba ale ba bisaŋa taam wuu!

30<<Cheŋ a ga weeni ba ate ba pilim a ŋman cheŋ ba viitaŋa po. 31Alege fi bo dela ale mi ate mi ale te fu wieŋa ale sinsaŋŋa meena ate fi ale sak ba ate ba ale va ŋa tɛŋ kaai po ate mi ale te ba la.>>

32Dila nyiŋla ni kpesi nidek ate ni nye dii ate Naawen dii ale ka ni Wen la a weeni ni la; ni kan viriŋ gala yaase juga. 33Cheŋ kauk kuui meena ate Naawen dii ale ka ni Wen la a weeni ni la, dii ale ku nye ate ni boro ale niaka ate nama a goa tɛŋ kaai ate nama ni tuesi la po a beni.

Currently Selected:

Teerika 5: BWU

Highlight

Copy

Compare