Teerika 33

1Niaka de Moosis Naawen nuruwa a biisi te Izirali demma alege kpi, 2Naawen a yaa jam Sinai guuku zuk; wa jam a yiti ase wenbinni ale bo Seir tɛŋka zuk diila a yaa jam a nyaksi diipo ate wa nuruma a jam bo Paran guuku zuk la. Maarɔba tusa pi ale jam bo ale wa, ate bolim ŋiak a jam bo wa juga nisaŋa po. 3Naawen a yaali wa nuruma kama ale a kasi baai ate wa soa la. Dila nyiŋ ti a koori ka wa niŋ abe ti wom wa sinsaŋŋa. 4Ti le va sinsaŋŋa ŋaai ate Moosis a te la, ti tɛŋka tuilum jaab a magsi ta ka. 5Naawen a jam chim ka wa nuruma Izirali demma Naab diipo ate ba dɔkku ale niŋdeerɔma a jam tigsi chaab la.

6Moosis a yaa jam weeni Aruben ayen, Aruben dɔkku a kan kpi meena, ba an soa diiya alege ba le boro.

7Juda dɔkku mɛ wa weeni ayen, Naawen a wom ba kaarika abe wa maari ba; basi ate ba ta nɔiyeŋ ale buura m ŋala. Naawen, kpaliŋ a te ba.

8Wa weeni Livai dɔkku ayen, Fi, Naawen pai dii ate fi a yaali la a sak ba a ta va Urim ale Tummim zuk fi tomteerɔwa waai ale ta siaka ale fu la. Fi jam nye ba kama a nya diipo ate ba jam bo Massaya la ale weeni ba fi wensieŋa Meriba nyiamu jigini. 9Ba jam sak ba yaali kpieŋka ale fu kama a gaam ba nyam ale ba suata ale bisaŋa ate ba ta yaalika ale ba diila. Ba an jam zɛri fi wieŋa. Ba jam ta siaka ale fi nɔiyeŋka kama. 10Ba le sak fi nuruma ate ba kan zɛri fi sinsaŋŋa; ba le nye kaabka fi yenni po a te fu. 11Naawen maari ba buuni po ate ba chim abe ba ta pagrim. Ta suipeentik ale dii meena ate ba a nye la. Ko ba dachaasaŋa meena kan basi ate ba ŋman yiti.

12Wa le weeni Benjamin dɔkku mɛ diila ale nna. Dɔkku de ka buui dii ate Naawen a yaali ale a kasi ba la; wa kasim a nya ba zuk ka dila daa meena ale kasim a bo ale ba mɛ.

13Wa weeni Josefi dɔkku mɛ ayen, Naawen a niak ba tɛŋka ale ŋmoruk abe nyiam mɛ a bo tɛŋ a yɔk tɛŋka. 14Basi ate kantueŋ a nak ba tɛŋka po ate ba tiisaŋa yɔnaŋa a bɛ. Diipo meena ba kasim a ta yɔn maŋsa. 15Ba guutaŋa zuk a kasim a ta ka yɔna ŋaai ate ba a yaali la. 16Ba tɛŋka a kasim a sueri ale ka ŋan maŋsa meena ale niaka a nyini Naawen jigi, waai ale jam bo bolimu ale a dɛ gɔnni po a biisi la. Niaka de abe jam Josefi dɔkku jigi dii nyiŋla wala ale niŋdeerɔ wa suataŋa zuk. 17Josefi pagrimu a jam a nye ase ka lalik ale a kpa la ate wa pagra ase ka Ɛfraim dɔkku tugurik tɔŋdɔba tusa pi la, alege a nye ase Manasa dɔkku tugurik tɔŋdɔba tusa la.

18Wa weeni Zebulun dɔkku ayen, Ni ta suipeentik ase nama ale a nyini peelim alege a weeni Isaka dɔkku ayen nama mɛ ale jigsi ni yeeŋa po. 19Ba le wi nuruba ate ba jam guuku zuk ate ba nye kaab maŋ dula jigini. Ba le nya ba ŋanta ka nyakpiemu po ale tintain busuŋ bu po.

20Gad dɔkku mɛ wa weeni ba ayen, Pak Naawen waai ale nye ate Gad dɔkku a piisi la. Gad a bo dula kama ase gbeŋli la ayen wa kaasi. 21Ba jam lueri ka tɛŋ kaai ale nala la a te badek, Niŋdeerɔma mɛ a jam nya ka tɛŋ maŋ a te ba dɔkku. Ba jam zuli Naawen kama a maari buuri yɔnaŋa.

22Dan dɔkku mɛ wa weeni ba ayen, Fi ka gbeŋ paali; fi nyini ka Basan.

23Nafitali dɔkku wa weeni ba mɛ ayen, Naawen a niak fu kama ale wa jiirim maŋka; Ba tɛŋka paari Galili nyakpiemu kama.

24Asɛ dɔkku wa weeni ba ayen, Asɛ a nya niaka a gaam buura m ŋala meena kama. Wa nyeka abe masa a te wa suataŋa abe wa tɛŋka po kpaam tiisa a kasim a boro. 25Wa tɛŋka a nye ase ka kuta tuok ale lik la ate wa le kasim boro ale suiyɔgni.

26Wen a karo ase Izirali Wenni la, waai ale nyini wenŋmazuk a maari ni la. 27Wen ale kasim a maari ni; wa nisaŋa a kasim a maari ni kama. Wa ale yiak ni dachaasaŋa a basi, ni ale weeni ayen ni ko ba meena. 28Dila nyiŋ Jekob ŋaaŋbisa ni boro ale suiyɔgni wari a kan daani ni. Tɛŋka ka za ale damasik ale bo ka po, dula jigini maglim ale nyini chiŋmaaŋa po a lo tɛŋka. 29Izirali demma nya suipeentik kaai ate ni ta la! Waai a karo a nye ase nama la. Ni ka tɛŋ kaai ate Naawen a vari basi. Wadek ale ni kasidɔ ale ni maarɔ ale ni gebik a nya ni zuk. Ni dachaasaŋa ale jam a saalim ayen ni ta jiirim ale ba ate ni le ko ba.

Currently Selected:

Teerika 33: BWU

Highlight

Copy

Compare