Teerika 32

1Wom wenŋmazuk wa, mi a yaa m biisi kama; wom tɛŋŋa, wieŋa m nɔnni po. 2Basi ate m sinsaŋŋa a lo ase ŋmoruk, ale a ni la abe m wieŋa mɛ a siŋ ase maglim, ale a lo diila, ase ŋmoruk ale a ni wuuk paaluk zuk la. Ase ŋmoruk kpioŋ ale a ni ŋan bula zuk la. 3M le mooli Naawen yuenni, ate wa nuruma a weeni wa zuaka ale ka diila. 4Wa ka piuŋ wa tuimaŋa kaasuŋ a ka du wa suitaŋa a nye cheri. Naawen dii ale ta wensie la, waai ale kan nye wari a kaasi. Wa ka waai ale ta wayɔrisima ale nye a magsi. 5Ba an nye dii ate wa a yaali ayen ba nye la; chivie a yik ba kama dii nyiŋla ba ŋman daa wa bisa. Ba ka wabaata nyam ale nuru baai ale kan ta wensie. 6Ka ku le magsi ni nye Naawen diila ale la? Ni ka betta, nuru baai ale kan ta yammoa. Wa daa nama Ko ale ni Nyeerɔ? Daa wa ale nye ni a basi ate ni boro? 7Ni teeri dila po wieŋa bena ŋaai ale taam la. Ni bek ni nyama ate ba weeni dii ale jam nye la. Ni bek nuru kpagsa ate ba weeni wieŋa a sak ni. 8Wen Dii Ale Bo Wenŋmazuk La ale a te tɛŋsa ba le magsi ba soa juijui la; Wa le poori nuru bisa la, Wa te ba ka bana a magsi Izirali bisaŋa nɔi ale ka diila. 9Naawen nuruma ka wa a le soa, Jekob ŋaaŋbisaŋa ka wadek ale soa. 10Wa jam nya ba zuk kama diipo ate ba jam bo gɔnni po a ka jigi la. Wa jam a nya ba zuk kama ale ta jiirim ale ba ase wa le a nya wadek zuk diila. 11Ase jiiruk ale a sak ku bisa yiri ka dii ale chɔgsi si dii ale ku kinkaŋŋa ate si kan lo tɛŋ diila, Naawen mɛ a nya Izirali demma zuk ka dila ate ba kan lo. 12Naawen dek wa nyiini ale dɛ wa nuruma niŋ, wa jam kan yaali bɔgluk chaŋsa maarika. 13Wa jam basi kama ate ni nya pagrim tɛŋsaŋa zuk. Ni tattaŋa mɛ a jam ta ŋandiinta. Olivi tiisaŋa mɛ a jam a chim tɛŋ kaai ale ta tintana la po, alege basi ate siita a bo pinaŋa po ate ni a dɛ. 14Ba niiŋa ale ba booŋa a jam a te ba ka biisim nna yegayega; ba jam ta ka pa ŋaai ale bo ŋaai ale naa ŋaai ale chim duŋ maŋsa la. Ba jam maa ta ka za ale daam. 15Naawen nuruma a jam jigsi kama alege ta tukpari; ba jam kasim a biik kama ba le ta ŋandiintaŋa la nyiŋ ate dila a nye ate ba baŋ ba Wenni, waai ale nye ba la wari ale zɛri ba Varibasidɔwa, waai ale ka Piuŋ la. 16Ba bɔgtaŋa a jam basi kama ate Wen a dɛ nyuri alege ba biemu mɛ a nye ate wa sui a puuri. 17Ba jam a kaab a te ka chichirik sii ale kan daa Wen yaa, bɔgluk tii ate badek a zɛ ti, bɔgluk chaŋsa tii ale boro daaŋa dɛ la tii ate ba koma an jam a chali ti yɔgsummoa. 18Ba baŋ ba Wen dii ale ka Piuŋ la kama ba varibasidɔ kpioŋku waai ale te ba nyuvuri la. 19Ase Naawen ale nya kude la wa sui a yaa puuri ate wa zɛri wa bisaŋa ale wa liema. 20Mi a kan ŋman a maari ni diipo diipo wa ale weeni diila a ni la m le nya dii ale ku nye tukpari nyama ale nuru baai ale kan ta siaka la. 21Ba basi kama ate mi a dɛ nyuri ale jabuui ale kan daa wen ya. A basi ate m sui a puuri ale bɔgluk kayaata. M le basi ate baai ale kan daa nuruba a nye ate ba a dɛ nyuri. M le basi ate tɛŋ kaai ale kan ta miŋka la a nye ate ba sue a puuri. 22M suipuurumu ale nye ase bolim la a dɛ jaab meena tɛŋka zuk bu le paari tɛŋka meena a dɛ jaab meena. 23M le ta kaasuŋ kuui ale ka maara kpeglim la a jam ba jigi abe m tɔŋ ba ale m peemaŋa. 24Ba le kpi ale kɔm ale nyiŋtui baata. Ba le kpi ale nyiŋtuila ŋaai ate ŋa wie a pagra la m le basi ate duŋ sii nyeka ale tua la a yik ba abe waapiisa mɛ a dom ba. 25Kpaliŋ ale ta kum a jam tɛŋka po. Zueba ale jo ni yeeŋa po a vari ni. Nidoabilisa ale nipokbilisa baai ale paala la ale kpi. Bi fiisa ale ŋankpagsa meena ale kpi. 26M weeni kama ayen m ti waaŋ ba kama ale yeeri ba nurubisa suŋsuŋ, 27alege mi chali ka dachaasaŋa suiniima nakka, ba kan miŋi a weeni ayen, ba nya ka pagrim, daa Naawen ale nye nnawa meena. 28Izirali tɛŋka demma ka baai ale kan ta popola; ba bola ka yam ale magadek mɛ la. 29Ba an miŋi jabuui nyiŋ ate ba nak a yik ba la; ba kan miŋ wa dii ale nye la. 30Ka boa ale soa ate nuru yeŋ a baga a nya pagrim nuruba tusidi zuwa yaase nuruba tusa ŋaye (2,000) a baga a nya pagrim tusa pi (10,000) zuwa? Ka ba Piuŋku a nin pai ba da, ka Naawen a nin pai ba a te. 31Ba dachaasaŋa a seba kama ayen badek bɔgtaŋa a wobsa kama, ti an pagra ase Izirali Wenni la. 32Ba dachaasaŋa a bie kama ase Sodom ale Gomora demma la alege a nye ase tiib sii yɔna ale tua ase choŋ la. 33Ba a nye ase ka daam ate ba pai waapiik sim a nyoro la. 34Naawen a teeri dii ate ba dachaasaŋa a nye ba la kama; wa a limisi kama ayen di danni a paari ate wa namsi ba. 35Ku ka mi wari ate m nye wari tuni baai ale a tom biem tuima la. M be le nye kama. Dai a cheena ate ba kan nya suik a nye ba le a yaali diila; ba ninammu daaŋa a moata kama. 36Naawen ale bo wa nuruma buusa. Wa le ta jiirim ale ba ase wa nin nya ale ba pagrimu a nueri ya, ate waai an tali ya, baai ale ka yɔm ale baai ale kan daa yɔm la. 37Ate Naawen a yaa le bek wa nuruma ayen, <Bɔgluk kpieŋ tii ate ni ta siaka ale ti la a boka bɛ? 38Ni jam kasim a kaab ti ale ka duŋ sii ale biik a ta kpaam mɛ la ale a te ti daam ate ti a nyu; ni basi ate ti jam maari ni yɔgyɔgla de ni basi ate ti chali a jam vari ni a basi. 39Mi dek nyiini ale Naawen. Wen yoŋ a ŋman karo a gum mi po. Mi ale a ko ale a te nyuvuri mɛ. Mi ale a te nuruba tuem mɛ abe le ŋmaa tebi ba mɛ ate waai a karo a zɛri dii ate mi a nye la. 40Ase mi ale ka Naawen dii ale vua la, mi zak ka m nisaŋa ale pɛ ayen, 41m le saasi ka m gebika kaai ale a nyaksi la a nye dii ale magsi la. Mi ale nye a tuni m dachaasaŋa ale nye diila abe m namsi baai ale kisi mu la. 42Mi peeŋa ale feri ba ziimu po abe m gebika mɛ ko baai meena ale a zɛri mu la, baai ale kɔni la ale baai ate ba yik lik likka diina po meena la ale kpi. 43Tɛŋsa ku a fɛ kama ayen ni pak Naawen ale wa nuruma. Wa nye tuni wa dachaasaŋa ale nye wa diila kama alege a vɔŋ wa nuruma biemu a te ba.>>

44Moosis ale Josua Nun biika a yaa pilim kariŋ yiini de a sak ba ate Izirali demma a wom di. 45Ase Moosis ale jam sak Naawen nuruma a ga nueri la, 46Wa weeni ayen, <<Ni seba a chak ayen ni a va sinsaŋŋa de meena ate mi a te ni jinla de la. Ni ŋman pai ŋa a sak ni bisaŋa, dii ale ku basi ate ba va Naawen sinsaŋŋa meena. 47Sinsaŋŋa de a daa sinsak koruta; ŋa ka ni nyuvooŋa. Ni va ŋa ate ni goa a beni tɛŋ kaai ate ni le lo Jodan benni jueli a bo ka po la.>>

48Da dila danni dek ate Naawen a weeni Moosis ayen, 49<<Cheŋ Abarim guutaŋa zuk Moab tɛŋka po ate ka le Jeriko a kala a tuk chaab la; jueli Nebo guuku zuk a nya Keenan tɛŋka a te mi a yaali m pai ate Izirali demma la. 50Fi ale kpi ka guuk kula zuk ase fi suoku Aaron ale jam Yor Guuku zuk a kpi la, 51dii nyiŋla ni nɔi niyema a jam ka siaka ale mi Izirali demma niŋŋa. Ni le jam Meriba nyaataŋa jigini ate ku moata Kades Zin gɔnni po la, ni an jam a nye mi ase waai ale ta tuilum la. 52Fi le zaani ka niŋ a nya tɛŋka, alege fi kan jo tɛŋ kaai ate mi a yaa m pai te Izirali demma la.>>

Currently Selected:

Teerika 32: BWU

Highlight

Copy

Compare