Daniel 9
9
1Bein dii ale dɛ niŋka ate Ayasuerus biika Darius a dɛ wa naamu la, ate wa nyini Miidi tɛŋka la. 2Bein dii ate wa piilim dɛ naamu la, mi Daniel a miŋ chak kama ayen Naawen wanni ate wa pai a te biisiteerɔwa Jeremaya ayen Jerusalem tɛŋka ale duak a paari bena pisiyopɔi. 3Mi yaa cheŋ Nyɔnɔwa Wen jigi a yaa saalim ale a puusi wa ale bobi nɔi a jo borisa gatta ale buntuem.
4M yaa puusi a te Naawen, m Wenni a juisi vɔŋteka ayen, <<Nyɔnɔwa, Wen dii ale zuak la, ale waai ate ba a chali wa la ale waai ale kasim ta wa nɔiyeŋka ale ŋmanteka ale waai meena ale a yaali wa la ale a zuli wa sinsaŋŋa la. 5Ti nyeka biem ale tom kaasi. Ti ka gaasa nyam ale zɛri fi nɔi, ti basi fi wieŋa ale fi buusaŋa kama. 6Tama an wom fi biisiteerɔma baai ale biisi fi yuenni a te ti nalimaŋa ale ti nabisaŋa ale ti nuruma meena tɛŋka po la.
7Nyɔnɔ, fi ka wayɔrisima nyɔnɔ alege daaŋa de po chivie ale yik ti. Juda ale Jerusalem ale Izirali demma meena baai ale bo niŋ ale fara tɛŋka meena ate fi a kati waaŋ dii nyiŋla ti ale kan ta wensie ale fi la nyiŋ. 8Naawen yaa, tama ale ti nalimaŋa ale ti nabisaŋa ale ti koma chivie ale yik ti dii nyiŋla ti tom a kaasi fu kama. 9Tama a zɛri wa kama ale ge ti Nyɔnɔwa Wen a ta jiirim kama ale diem a vɔŋ a te ti. 10Tama zɛri Naawen ti Wenni kama ale an va wa sinsaŋŋa ate wa te ti a ta va wa tomteerɔma biisiteerɔma la. 11Izirali demma meena a nye kaasi sinsaŋŋa kama ale zɛri ba an va fu, <<Dila nyiŋla kikaasa ale ŋmarisi Moosis Wen biisiteerɔwa gbaŋka po la a yaa jam ti jigi dii nyiŋla ti tom a kaasi fi kama. 12Fi a nye dii ate fi weeni a ta va chaab ale tama ale ti niŋdeerɔma la kama a ta kaasuŋ a jam ti jigi. Fi a namsi tama Jerusalem demma a gaam tɛŋ meena kama. 13Ase ku ale ŋmarisi dii Moosis sinsaŋŋa po la, kaasuŋku de meena a jam tama jigi kama, alege tama an diem gisi Naawen ti Wenni jiirimu a basi ti biemu ale va wensieŋa. 14Naawen an beni du ale namsi ti, tama Naawen ti Wen a kasim a nye ka dii ale nala la alege tama an diem a va wa.
15<<Nyɔnɔ ti Wen yaa, fi sak fi pagrimu kama a ta fi nuruma a nyini Ejipiti po a nyini ti kan baŋ fi pagrimu wari ya. Tama nyeka biem, tama a nye kaasi kama. 16Nyɔnɔ, ti le ta fi wayɔrisima nyeelaŋa meena la, basi fi suipuurumu ale Jerusalem, fi tɛŋka, fi tuilum guuku. Tama wabaataŋa ale ti koma tuimbaataŋa a basi kama ate Jerusalem ale fi nuruma a chim baai ate baai meena ale gilim ti la a la ti.
17<<Wen yaa, be wom m puusaŋa ale m saalimka. Pilim sɛ fi yenni, dii ale kaasi la pilim a sɛ di ate waai meena ale seba ayen fi ka Nyɔnɔwa. 18Wom ti Wen yaa, a nya ti, ate fi ale nya tama ale bo ninam buui po la, tɛŋ kaai ate ba pai fi Yuenni a te ka la. Tama a puusi kama dii nyiŋla fi ale ta jiirimu la daa ayen ka tama a nye a magsi kama. 19Nyɔnɔ wom ti. Nyɔnɔ vɔŋ a te ti. Nyɔnɔ wom ti abe fi tom ate ti dii ale ku nye ate waai meena ale seba ayen fi ka Wen. Kan beni. Tɛŋka ale nuruma ka fi ale soa ba.>>
20Ase mi ale diem boro a puusi a juisi mi biemu ale Izirali m nuruma biemu vɔŋteka ale Naawen m Wenni ayen wa pilim a sɛ wa yenni la, 21ase mi ale diem a puusi la, Gabriel nuru waai ate mi a poom liŋ nya m gɔdaasimaŋa po la, a yaa jam mi jigi nna mwuli diipo ate ba nye junɔinni kaabka la. 22Wa yaa weeni mi ayen, <<Daniel mi jam kama ayen m maari fu ate fi miŋ wanni kiri. 23A nyini dai dii danni ate fi a piilim a puusi Wen la. Wa tulisi fu kama. Wa a yaali fu kama, dila nyiŋla mi jam kama ayen m tulisi fu. Be ŋmasi a wom chak.
24<<Bakoa pisiyopɔi ate Wen a pai te ni nuruma ale ni tuilum tɛŋka, ayen ni basi wakaasima abe ni basi ate biem a kpeglim abe ni nye biem duisi basika gaasa nyiŋ abe ni ta wayɔrisima ŋaai ale kaa a kpeglim la a jam abe ni lik pa sakka ale moolika wie abe ni kpiiri kpaam Jigi Dii Ale Ŋmasi Ta Tuilum La a te Wen.
25Be seba abe fi miŋ nya kude a chak ayen, a nyini dai dii danni ate Wen a weeni ayen wa ale pilim a sɛ Jerusalem tɛŋka abe ku ge jigi ate Wen dek ale Lueri Waai La A Jam La, bena ŋayopɔi ale pisiyuebi ale buye a ta ga paari buyopɔi. Ku dan ga paari dila ba ale pilim sɛ Jerusalem ninammu daaŋa po. 26Pisiyuebi ale buye a ta ga paari ku naŋtuok nɔi buyopɔi wa ŋaaŋnyiŋ, Wen ale lueri niŋdeerɔ waai la ba ale ko wa. Niŋdeerɔwa nuruma baai ale ba jam la ale kaasi tɛŋka ale yenni. Kpeglimka po ku ale nyeka nna ase ŋmoruk ale a ni la, ate dila ale kasim ta kpaliŋ ale kaasuŋ kuui ate Wen a gomsi la a jam. 27Niŋdeerɔ wala ale nye nɔiyeŋ ale nuruba yegayega bena ŋayopɔi, bena ŋata ale geli a dan taam, kaabka ale jiam teka a kan ŋman boro. Wabiok kuui ale ku jam a basi ate nuruba a nam la ale jam bo Wen yenni po kama. Ku ale boro ka dila a ta ga paari diipo ate waai ale basi ate ku boro la a jam paari ku da kpeglimaŋa po ase Wen ale gomsi a magsi wa diila.>>
Currently Selected:
Daniel 9: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
