Daniel 10

1Persia Naawa Sairus ale jam dɛ wa naamu a paari bena ŋatawa la, Daniel, waai ate ba jam a wi wa ayen Beltesazzar la, a yaa jam gɔdaasim a nya wasusugi. Wanni a jam ka wensie a ta va chaab ale kpaliŋ. Wa jam miŋ wanni kiri ka wa gɔdaasima po.

2Dila po mi, Daniel a jam a kum kama a ti ku ga paari daa pisiye ale dinyi. 3Mi an dɛ ŋandiinta, m be an ŋɔbi lammoa yaase daam a tiri m nɔngbanvaataŋa yaase mi sa kpaammoa, ate daa pisiye ale dinyiwa meena a ga taamu.

4Chiik kaai ale dɛ niŋka la ka daa pisiye ale ŋanaansiwa danni, ase mi ale jam za beli kpienni ate ba a wi di ayen Tigris kuŋkuŋku zuk la, 5mi yaa zak nya ŋmai ale ka nuru ale za mi niŋ a jo garuk ate ku a nyaksi ale pai ligmɔniŋ gbain a bobi wa chiaka. 6Wa nyiŋka jam a nye ase ka tintain salima la. Wa nimbidiaka mɛ a nye nna se bolim la wa ninaŋa mɛ a nyaksi ase bolim ŋaasa la wa nisimaŋa ale wa naŋsaŋa mɛ a jam maari a nyaksi kama alege ate wa lueluku a nye ase nuru boari lueluta la.

7Mi Daniel, nyiini ale waai ale jam nya wanni de, nuru baai ale jam bo dula ale mi la an jam nya wanni de. Kude a jam nye kama ate yɔgsum a yik ba ate ba yaa chali a suk. 8Mi dek m nyiini ale jam tali za dula jigini a nya wakpienni de. Pagrim a ŋman jam ka mi jigi ya. M ninaŋa a jam tagri kama nna ase m kpi kama la. Maarika a ŋman jam ka mi jigi ya. 9Mi a yaa wom ale wa a biisi. Ase mi ale a wom wa la, mi yaa deri doa po nyiŋ a goa.

10Ate nisa a yaa tiri mi a zak mu a zaani alege mi nyiŋka diem a gɔk. 11Ate wa weeni mi ayen Daniel Wen a yaali fu kama zaani nalimnyiini a wom dii ate mi a yaali ayen m weeni sak fu la, ba tom mu kama fi jigi. Ase wa ale weeni dii ale mi la, mi yaa yiti zaani ate m nyiŋka a gɔk.

12Wa ŋman weeni mi Daniel ayen m ka a chali yɔgsummoa a zaani dai dii danni ate fi piilim a zɛri fidek ale a puusi ayen fi miŋ wanni kiri la, Wen a wom fi puusaŋa kama m jam kama ayen m tulisi fu puusaŋa. 13Alege maarɔ waai ale a nya Persia tɛŋka zuk la a yaa kasi mu suik ate ku paari daa pisiye ale dinyi. Ate Maakil maarɔma kpagni dinyi a yaa jam a maari mu. M beni dula kama dii nyiŋla Persia maarɔwa ale kasi mu la nyiŋ. 14Yɔgyɔgla de mi jam kama ayen m weeni wanni kiri a sak fu dii ale a yaali ku nye fi nuruma chum po la. Wa dii ale a yaali di nye ase gɔdaasimaŋa ale weeni diila a diem bo ka ŋaaŋ cheena.

15Ase wa ale boro a weeni mi wanni de la, mi yaa koori a pai m ninaŋa a vuk tɛŋ chorototo. 16Ate waai ale a nye ase nidoa la yaa tiri mi nɔngbanvaataŋa ate mi a jam lak m nɔnni a yaa piilim a biisi. Mi yaa weeni waai ale za m niŋ la ayen, <<Gɔdaasimaŋa de a basi kama ate m nyiŋka a kasim a gɔk.>> 17Mi fi tomteerɔwa, mi a yaa m nye ka sɛ a biisi ale fu m nyɔnɔ? M ŋman ka pagrimoa mi an baga a vuusi.>>

18Ate waai ale a nye ase nidoa la a yaa ŋman tiri mu a te mu pagrim. 19Kan chali yɔgsummoa. Wen a yaali fu kama, kan basi ate fi nyiŋ a gɔgi.

20Ate wa yaa weeni ayen, <<Fi seba dii nyiŋ ate mi a jam fi jigi la? Ku kan beni m le pilim ŋmani a ga kpaliŋ ale maarɔ waai ale a nya Persia tɛŋka zuk la, ase m dan ga cheŋ nueri maarɔ waai ale a nya Girik tɛŋka zuk la mɛ ale jam. 21Alege dii ale dɛ niŋ la mi a yaali m weeni ka dii ale ŋmarisi Wensie Gbaŋka po la. Waai an jam maari mi ate mi a kpaliŋ ale ba, ka Maakil waai ale a nya Izirali zuk la.

Currently Selected:

Daniel 10: BWU

Highlight

Copy

Compare