Daniel 6

1Ku yaa nye Darius masim ate wa yeeri nuruba kook ale pisiye tɛŋka po meena, 2Ale nuruba bata ayen ba a nya ba zuk. Ba wanyi a jam le Daniel. Nuruma de a jam maari wa kama ale basi ate naawa a kan namu. 3Wa ale a tom nalimnyiini a gaam mbala meena la ale soa ate naawa a lueri wa ayen wa a nya tɛŋsa zuk. 4Mbala a yaa jam a gisi suik ayen ba velim a te naawa ayen wa kan tom wa tuimaŋa a magsi. Alege ba an jam nya suiwa. Dii nyiŋla wa tom kama nalimnyiini. Dii ale magsi ayen wa nye la wa jam nye kama. 5Kpeglim ka po, ba yaa weeni chaab ayen, <<Tama a kan baga a velim a te Daniel. Ka ti nin ta va Daniel Wenni sinsaŋŋa.>>

6Ba meena a yaa cheŋ naawa jigi a weeni wa ayen, <<Naab Darius, boro taam wuu. 7Tɛŋka niŋdeerɔma, baai ale a sak naawa wie la ale kpaŋŋa la a nye ka nɔiyeŋ ba nye kisuk ayen waai a kan puusi wen yoŋŋoa yaase nuru yoŋ a gum chaab ale naawa bɔglukku. 8Naaba basi ate ku nye abe fi ŋmarisi ku a ta va chaab ale Miidi ale Persia wieŋa ale ka diila ate ba kan baga a tagri.>> 9Naab Darius mɛ yaa ŋmarisi kaamka.

10Ase Daniel ale wom dii ate ba weeni la, wa yaa kuli yeri a jueli gboŋ wa dɔkku po a lak tuokpattaŋa a basi Jerusalem geŋka a kpi duna tɛŋ a puusi a te wa Wenni jiam ase wa nyiem ale jam a nye diila. 11Nuruma de yaa tigsi chaab a yaa nya ale Daniel a puusi a bek Wen ayen wa maari wa. 12Ba yaa cheŋ Naawa jigi a bek wa ayen, <<Fi a weeni kama ayen waai a kan puusi wen yoŋ yaase nuru yoŋ a gum chaab ale fi wenni a ta ga paari daa pisita la, waai ale a zɛri la ba yuk wa a basi gbeŋmaŋa dɔkku po la?>> Naawa a siak, <<Mm, mi ale weeni diila ale la. Miidi ale Persia wieŋa ale weeni diila ale la, ŋa kan tagri.>>

13Ba yaa weeni Naawa ayen, <<Juuwa ate ba a wi wa ayen Daniel la, waai ale bo dela ase yɔma la, a zɛri kama wa an va fi ale weeni dii ate fi a ŋmarisi la. Wa diem a puusi ka wa Wenni buta dai yeŋ.>> 14Ase Naawa ale wom dila la, ku yaa daani wa. Wa jam kasim a gisi ka suik ayen wa vari Daniel a basi.

15Nuruma yaa tigsi chaab a cheŋ Naawa jigi a yaa weeni wa ayen Naaba a teeri ayen Miidi ale Persia tɛŋka wieŋa ale weeni diila Naawa a kan baga a tagri ŋa.

16Darius yaa weeni ayen ba ta Daniel a jam yuk basi gbeŋmaŋa dɔkku po. Naawa a weeni Daniel ayen, <<Fi Wenni dii ate fi a va la ale vari fu a basi.>>

17Tintain ate ba jam pai lik gbeŋmaŋa dɔkku nɔnni. Darius ale wa nuruma a yaa ŋmarisi ba yueŋa ate ku a sak ayen gbaŋka an baga a tagri Daniel ale nye diila. 18Yok kula meena Darius an daliŋ ale waai ya wa bi an goa ya.

19Vari ale veenti la, Naawa a yiti saluik a cheŋ gbeŋmaŋa dɔkku. 20Ase wa ale moata dɔkku la wa yaa kaari wi Daniel nna tuotuowa ayen, <<Daniel Wen dii ale vua la tomteerɔwa, fi Wen dii ate fi a va la an gomsi ayen wa vari fu a ta nyini gbeŋmaŋa jigi a basi?>>

21Daniel yaa tulisi ayen, <<Naaba boro taam wuu. 22Mi Wenni a tom ka maarɔ ate wa lik gbeŋmaŋa noaŋa ŋa an baga a nye mu wari ya, dii nyiŋla mi an nye wari a kaasi fu Naaba.

23Naawa sui yaa peenti ate wa weeni ayen ba lak Daniel ate wa nyini gbeŋmaŋa dɔkku po a nyini. Ba ale lak wa la ba an nya lauŋ wa nyiŋka dii nyiŋla wa ta sebchakka ale wa Wenni kama.

24Naawa a weeni ate ba pai baai ale velim a te Daniel la ale ba pooma ale ba bisaŋa a nyo gbeŋmaŋa dɔkku po. Alege jigi ate ba paari dɔkku tɛŋka la gbeŋmaŋa a poom labi ba ka gela gela.

25Naab Darius a tom ayen ba weeni nuru meena ale tɛŋ meena ale buuri meena ayen ka wa ale a puusi ba. 26Mi weeni kama ayen waai meena m tɛŋka po, ku a magsi kama ayen ni a chali abe ni a zuli Daniel Wenni. Dii nyiŋla wa ka Wen vuk ale boro taam wuu. Wa naamu a kan maara a taamu wa pagrimu mɛ a ka kpeglimka. 27Wa ale vari a basi wa a tom wakperikaliisa wenŋmazuk ale tɛŋzuk de. Wa vari Daniel a ta nyini gbeŋmaŋa jigi a basi.

28Daniel a jam nya ka niaka diipo ate Darius ale Sairus Persia demma a jam chim nalima la.

Currently Selected:

Daniel 6: BWU

Highlight

Copy

Compare