Daniel 5

1Kude ŋaaŋnyiŋ Belsazzar yaa jam chim naab Babilon po. Wa yaa nye tigi a te wa nuruma ale paari tusidi la ale nyu daam ale ba. 2Ase wa ale boro a nyu la, wa yaa weeni ayen ba ta ligmɔniŋ ale kpana beerisaŋa ate wa kowa Nebukadnezzar a jam pai a ta nyini Wen yenni Jerusalem po la a ta jam. Wa jam a yaali ayen ka wa ale wa nuruma ale wa pooma ale wa nɔŋtaŋa a nyu si po. 3Ba yaa ta beerisaŋa sii ate ba pai a ta nyini Wen yenni Jerusalem po la a jam ayen Naawa ale wa nuruma ale wa pooma ale baai meena ale tom a te wa la a pai si nyu daam. 4Ase ba ale buk la, ba yaa pai pimpauk a te ligmɔniŋ ale kpana ale kutuk mɔnuŋ ale kuta ale daata ale tintana wenaŋa.

5Ku an beni ya nuru nisima yaa jam boro a ŋmarisi siak nyiŋ a moata zeuŋku ale jam za kauk kuui la ate naawa mɛ a nya nisimaŋa ale a ŋmarisi la. 6Wa ninaŋa a deri tagri ate wa nyiŋka a gɔk ate wa dunaŋa mɛ a nak chaab wa an jam baga a zaani.

7Naawa yaa wi sampoporisaŋa ale baai ale a zamsi chiŋmarisa wie la ale baanɔba a weeni Babilon yam nyama de ayen, <<Waai ale baga a kariŋ ŋmarisika de ale a weeni mu ka kiri la mi ale te wa naam garuk ŋmiŋmirita. M le pai ligmɔniŋ chɔrinni a su wa ŋinni po ate kula nyɔnɔwa ale chim buta nyɔnɔ a pai a vi mi ŋaaŋ tɛŋka po.

8Naawa yam nuruma meena a yaa jam alege ba waai an jam baga a kariŋ yaase ba weeni Naawa ku kiri ale ka diila. 9Naab Belsazzar yaa ŋmasi jam yɔgsa ate wa ninaŋa mɛ a ŋmasi a tagri a gum du. Ku jam cha wa nuruma kama.

10Naawa mawa ale wom naawa ale wa nuruma luelutaŋa tigini dɔkku po la, wa yaa weeni ayen, <<Naaba, boro taam wuu, kaa chali yɔgsummoa, yaase fi kaasi nina! 11Nuru ale bo fi tɛŋka po wala a ta wen weleŋsaŋa chiika wa po, fi kowa daaŋa po wala ate ba nya ate wa seba ale ta yam ase wenaŋa la. Ate fi kowa Naab Nebukadnezzar, fi kowa Naawa yaa basi ate wa chim sampoporisa ale baai ale a nya chiŋmarisa wie la ale baanɔba meena naab. 12Daniel wa de, waai ate Naawa a wi ayen Beltesazzar la, wala ale ba jam nya ate wa ta popola ale miŋ chakka a baga a weeni gɔdaasima ale wakperikaliisa kiri. Wi Daniel ate wa ale weeni fu ŋmarisika kiri ale ka diila.>>

13Daniel yaa jam naawa niŋ ate naawa a weeni wa ayen, <<Ka fi ale Daniel baai wanyi ate m kowa naawa a ta nyini Juda po a jam la?

14M wom kama ayen wenaŋa chiika a bo ale fu kama ate fi ta popola ale yam. 15Yam nyama ale chichirik wiirisaŋa ale baai ale a zamsi chiŋmarisa wie la ale sampoporisaŋa meena a jam kama alege ba an weeni mu ŋa kiri ya. 16Yɔgyɔgla mi wom kama ayen fi baga a weeni mu ŋa kiri ale baga a yik wa pagrisa a niak. Fi a dan baga a kariŋ ŋmarisika ale a weeni mu ku kiri, m le pai naam garuk ŋmiŋmirita a jo fu abe m pai ligmɔniŋ chɔrinni a su fi ŋinni po. Fi ale chim buta nyɔnɔwa a pai va mi ŋaaŋ tɛŋka po.

17Daniel yaa tulisi Naawa, ayen, <<Fi baga a ta fi tiirimu kama yaase fi pai a te nuru yoŋ. Alege m le kariŋ ŋmarisika a te fu abe m weeni fu ku kiri.

18<<Naaba, Wen Kpienni a basi ate fi kowa Nebukadnezzar a zuak kama ale chim nuru waai ale ta pagrim ale zula ale pimpauk. 19Wa ale basi ate wa chim nuru kpioŋ, nuru meena ale tɛŋ meena ale buuri meena a jam a chali wa kama. Baai ate Naawa a yaali ayen wa ko ba la wa a ko ba kama. Baai ate wa a yaali wa basi ate ba vua la, wa basi ate ba vua kama. Baai ate wa a yaali wa gum kpaŋta du a te ba la wa gum du kama. Baai mɛ ate wa a yaali wa ta ba a siŋ tɛŋ la wa ta ba a siŋ kama. 20Alege wa ale jam nye tukpari ale kanjanta la wa jam jɔk wa naamu ale wa zulaŋa kama. 21Wa popolaŋa a jam nye ase ka duŋ la, wa jam bo ale ka bon sii ale waara la ale a dɛ wuuk ase naab la. Maglim mɛ a jam kasim a lo wa ase duŋ la a ta ga paari diipo ate wa ale miŋ ayen Wen Dii Ale Bo Wenŋmazuk La ale soa naata tɛŋzuk de meena a baga a pai a te waai ate wa a yaali la.

22<<Alege fi wa nidoabinni, Belsazzar fi a seba wieŋa de meena kama alege an ta fidek a siŋ tɛŋa. 23Fi yaa zak fidek a zaani wenŋmazuk Nyɔnɔwa niŋ, fi weeni ayen ba ta wa yenni beerisaŋa a jam te fi ale fi nuruma ale fi pooma ale baai ale tom a te fu la a pai si a nyu daam. Fi a pak kpana ale ligmɔniŋ ale kutuk mɔnuŋ ale kuta ale daata ale tintana wenaŋa ŋaai ale ka a nya yaase ŋa a wom yaase a miŋi wie la, alege fi an zuli Wen dii ale ta fi nyuvunni wa nisima po la. 24Dila nyiŋ ate wa tom nisaŋa ate si ŋmarisi siaka nyiŋla.

25<<Wa ale ŋmarisi diila abe le nna, <Mene, Mene, Tekel, Parsin>.

26<<Wieŋa de kiri abe le nna: Mene: Wen a chiimu fi daaŋa kama fi naamu ale kpeglim. 27Tekel: Ba magsi fu kama ate fi an magsi ya. 28Peres: Fi naamu ale labi kama a te Miidi ale Persia demma.

29Belsazzar a weeni ate ba pai naam garuk ŋmiŋmirita a jo Daniel ale pai ligmɔniŋ chɔrinni a su wa ŋiri ate wa saari buta nyɔnɔwa waai ale pai a vi wa ŋaaŋ naamu po la.

30Yok kula dek Kaldiya Naawa Belsazzar ba ko wa kama. 31Darius Miidi denɔwa a yaa chim naab wa jam taka bena pisiyuebi ale ŋaye.

Currently Selected:

Daniel 5: BWU

Highlight

Copy

Compare