Daniel 3

1Naab Nebukadnezzar a jam sɛ ka ligmɔniŋ bɔgluk ate ku woglimmu a paari anamagib kook ale pisiye, ku labsimu mɛ a paari anamagib pi ale buye. Wa jam sɛ ku ka Dura ale bo Babilon tɛŋka po la. 2Wa wi tɛŋka niŋdeerɔma ale kpaŋŋa ale baai ale a sak naawa wie la ale baai ale a nya ligra zuk ale boteerɔba ayen ba jam ate ba piilim jaamu puusika. 3Niŋdeerɔma ale kpaŋŋa ale baai ale a sak naawa wie la ale baai ale a nya ligra zuk ale boteerɔba ayen ba jam ate ba tigsi jam ate ba piilim bɔglukku ate Nebukadnezzar a sɛ la puusika. 4Kpagni a yaa weeni ate ku jueli ayen, <<Ku ale a magsi ayen ni a nye diila ale nna: nuruba, tɛŋsa meena ale nuru meena ale biik buuri meena. 5Ase nama dan wom ale damunsa ale paampuuŋta ale dunduirisa ale bagansa ale kpanta ale wiisa ale jabuui meena ate ba pai a leni yiila la a nuemu, ku a magsi kama ayen ni koori tɛŋ a puusi ligmɔniŋka bɔglukku ate Naab Nebukadnezzar a sɛ la. 6Waai ale a zɛri a kan koori tɛŋ a puusi bɔglukku la, kula choa nyɔnɔwa ba yuk wa a basi ka bolimu po. 7Ase ba ale ga wom ale damunsaŋa ale paampuuŋtaŋa ale dunduirisaŋa ale bagansaŋa ale kpantaŋa ale wiisaŋa ale jabuui meena ate ba pai a leni yiila la a nak la, tɛŋ meena ale nuru meena a yaa jam lo tɛŋ a puusi ligmɔniŋka bɔglukku ate Naab Nebukadnezzar a sɛ la.

8Dila po baai ale a zamsi chiŋmarisa wie la a yaa poli ayen ba kaasi Juuma yuei. 9Ba weeni naab Nebukadnezzar ayen, <<Naaba, boro taam wuu! 10Fi weeni kama ayen waai meena a dan wom ale damunsaŋa ale paampuuŋtaŋa ale dunduirisaŋa ale bagansaŋa ale kpantaŋa ale wiisa ale jabuui meena ate ba pai a leni yiila a nak ba koori tɛŋ a puusi ligmɔniŋka bɔglukku, 11alege waai a dan zɛri an puusi ya, ku choa nyɔnɔwa ba yuk wa a basi bolim wuluku po. 12Alege Juuma gela baai ate fi a lueri ayen ba chim kpaga Babilon tɛŋsaŋa po la, Sadrak ale Mesak ale Abednego, bala a zɛri fi ale weeni diila kama Naaba. Bala an tom a te fi wenaŋa yaase ba puusi ligmɔniŋka bɔglukku ate fi a sɛ la.

13Nebukadnezzar sui yaa jam puuri. Wa yaa tom wi Sadrak ale Mesak ale Abednego ate ba yaa ta ba jo naawa jigi. 14Nebukadnezzar a bek ba ayen, <<Sadrak ale Mesak ale Abednego ka wensie ayen nama a kan tom a te mi wenaŋa yaase ni puusi ligmɔniŋka bɔglukku ate mi sɛ la? 15Nya kude ni dan wom damunsaŋa ale paampuuŋta ale dunduirisaŋa ale bagansaŋa ale kpantaŋa ale wiisaŋa ale jabuui meena ale a leni yiila la, ni dan gomsi ayen ni koori a puusi bɔglukku ku nala. Alege ni dan kan puusi ku, ba ale pai ni a nyo ka bolim wuluku po. Ka wen boa ale di vari ni mi nisa po a basi?>>

16Sadrak ale Mesak ale Abednego a yaa tulisi ayen, <<Nebukadnezzar ku an magsi ayen tama a nak nanpaga ale fu wanni de nyiŋŋa. 17Ase tama dan poom bo bolimu wuluku po Wen dii ate tama va la ale yeeri ti a ta nyini fi nisima po a nyini Naaba. 18Alege wa dan kan poom a yeeri ti, tama a yaali kama ayen fi seba Naaba, tama a kan tom a te fi wenaŋa yaase ti koori tɛŋŋa a puusi fi ligmɔniŋka bɔglukku ate fi a sɛ la.>>

19Nebukadnezzar sui a yaa puuri ate wa ninaŋa a deri tagri a ta va chaab ale Sadrak ale Mesak ale Abednego ale nye diila. Wa yaa weeni ayen ba basi ate bolimu a toliŋ ku naŋtuok nɔi buyopɔi a gaam ku ale poom ka diila. 20Dila ŋaaŋnyiŋ, wa yaa wi tugurik tɔŋdɔma ayen ba bobi Sadrak ale Mesak ale Abednego a yuk ba a basi bolimu po. 21Nuruma de ba jam yuk ba kama a basi bolimu po ale ba kɔlimaŋa. 22Naawa wanni a jam pagra kama, bolimu mɛ a toliŋ ate bu wuluku nyiini a ko tugurik tɔŋdɔma baai ale pai Sadrak ale Mesak ale Abednego a yuk basi bolimu po la. 23Ate nuruma de batawa ate ba jam bobi a yik nna giŋgiŋ la, ba jam yuk ba kama a basi bolimu po.

24Naab Nebukadnezzar yaa yiti zaani ŋmai nna nwuli a bek ba ayen daa nuruba bata ate tama a bobi a yuk basi bolimu po la? Ba yaa tulisi ayen mm.

25Wa yaa tulisi ayen, <<Nya, mi nya ka nuruba banaansi ale a cheŋ bolimu po. Ba waai waai la an bobi ya yaase wari a nye ba. Waai ale saari banaansiwa la a nye ase ka wenaŋa biik la.>>

26Nebukadnezzar yaa torisi paari bolimu ale na ayen, <<Sadrak ale Mesak ale Abednego Wen Dii Ale Bo Wenŋmazuk La tomteerɔma ni nyini a jam de!>> Sadrak ale Mesak ale Abednego yaa nyini bolimu po a nyini. 27Tɛŋka niŋdeerɔma ale kpaŋŋa ale baai ale a sak naawa wie la meena a yaa jam gilim ba. Ba yaa nya ale bolimu an dɛ ba nyiŋsaŋa yaase ba kɔbtaŋa. Ba gattaŋa mɛ an jam dɛ bolimoa ate bolim nyum mɛ ka ba nyiŋsaŋa.

28Nebukadnezzar a pai pimpauk a te Sadrak ale Mesak ale Abednego Wen, waai ale tom wa maarɔwa ate wa jam vari wa tomteerɔma a basi la. Ba ta siaka ale ba Wenni alege a zɛri mi ale weeni ba ayen ba nye diila. Ba siak ayen ba dam poom kpi a zunchoŋŋa ba ale puusi wen dii ale kan daa ba Wen la. 29M kan siak ate nuru a nyini tɛŋka po yaase buui diipo a weeni wari a kaasi ba Wenni. Nuru waai a dan nye dila, ti ale ko kula choa nyɔnɔwa kama ale wa yenni demma dii nyiŋla bɔgluk a ka pagrim a vari nuru a basi.

30Kude nyiŋ naawa yaa basi ate Sadrak ale Mesak ale Abednego a chim nuru kpienta Babilon tɛŋka po.

Currently Selected:

Daniel 3: BWU

Highlight

Copy

Compare