Daniel 2

1Nebukadnezzar ale dɛ naamu a paari bena ŋayewa po la, wa yaa gɔdaasim ate wa popolaŋa a daani wa, yok kula wa an jam goa ya. 2Naawa a yaa wi wa sampoporisaŋa ale yam nyama ale baai ale a zamsi chiŋmarisa wie la ayen ba weeni wa gɔdaasimaŋa a sak wa. Ase ba yaa ale jam naawa niŋ la, 3wa yaa weeni ba ayen m gɔdaasim kama ate ku a daani mu ate mi a yaali ayen m miŋ ku kiri.

4Ba yaa tulisi ale ba tɛŋka biika Aramaik#2:4 Ba ŋmarisi Daniel 2:4-7:14 ale ka Aramaik biika. ayen, <<Naaba boro taam wuu. Tama ka fi tomteerɔba. Bi weeni ti fi gɔdaasimaŋa ate tama ale weeni ŋa kiri a sak fu.>>

5Naawa a yaa tulisi ba ayen, <<Mi ale a poli diila ale nna ni dan kan weeni mu m gɔdaasimaŋa ale ka diila ale ŋa kiri ya, mi ale gebi ni ka gela ate ni yeeŋa ale chim guura. 6Alege ni dan weeni gɔdaasimaŋa ale ŋa kiri ale ka diila a sak mu, mi ale te ni tiirim buui ale zuak la ale zula. Yɔgyɔgla de ni weeni gɔdaasimaŋa ale ŋa kiri a sak mu.>>

7Ba yaa tulisi ayen basi ate Naawa a weeni wa tomteerɔma wa gɔdaasimaŋa ate tama ale weeni wa ŋa kiri.

8Ate naawa a yaa tulisi ayen, mi seba nama a gisi ka suik, dii nyiŋla ni seba mi ale poli diila di za di nye kama. 9Ni dan kan baga a weeni mu gɔdaasimaŋa, wa yeŋ dekki ate mi a yaali ayen m nye ni. Nama ka velimvendisa. Nama a poli ayen wie ale tagri. Ni weeni mu gɔdaasimaŋa ate kula ale sak ayen ni baga a miŋ wie.

10Sampoporisaŋa yaa tulisi Naawa ayen nuru ka tɛŋka zuk a baga a tulisi Naawa ale bek diila, aaya Naaba, Nuru kpioŋ an diem bek yam nyama ale sampoporisaŋa ale baai ale a zamsi chiŋmarisa wie la fi beŋŋa nna chaaba. 11Naawa ale bek diila a melima kama. Waai karo a weeni a sak Naawa ka wenaŋa, ŋa be an bo ale nuruma mɛ.

12Kude yaa basi ate Naawa sui yaa puuri ate wa weeni ayen ba ko yam nyama meena Babilon tɛŋka po. 13Kaamka yaa jam ayen ba ko yam nyama meena. Ba yaa jam boro a gisi Daniel ale wa doama ayen ba ko ba.

14Naawa yenni kpagni Ariok a yaa le nyini ayen wa ko yam nyama Babilon tɛŋka po la, Daniel a yaa biisi ale wa ale yam. 15Wa bek Naawa nuru kpioŋku ayen, <<Ka boa ate Naawa a te suiku de choa?>> Ate Ariok yaa weeni wa dii ale nye la. 16Daniel a yaa nye nwuli a ga weeni Naawa ayen fi a dan te mi suik maga mi ale weeni fi gɔdaasimaŋa kiri a sak fu.

17Daniel yaa ŋman kuli yeri a ga weeni dii ale nye la a sak wa doama batawa Yanania ale Misael ale Azariya. 18Wa weeni ba ayen ni puusi ayen Wen dii ale a nya a nyini wenŋmazuk la a sak jiirim abe wa weeni wanni de kiri a sak ti, dii ale ku nye ate ba kan ko ti ale yam nuru baai ale bo Babilon tɛŋka po la. 19Yok kula po, Daniel a yaa miŋ wasusugni wa goom po. Daniel a yaa pak Wen dii ale bo wenŋmazuk la. 20<<Ti Wenni yuenni a nya zula taam wuu, yam ale pagrim ka wa ale soa. 21Wa ale basi ate wenkarik ale yoei a jam wa ale a bobi nalima ale a zɛri ba mɛ. Wa ale a te yam nyama miŋ chakka ale popola ate ba a miŋ wie. 22Wa ale pai wasusuŋŋa a sak ti, wa seba jabuui ale bo legini po la kama bolim abe bo ale ka wala. 23Mi a nye fi jiam ale a pak fu, m koma Wenni, fi a te mu yam ale pagrim ale basi ate m miŋ dii ate tama a bek fu la, fi basi ate ti seba Naawa gɔdaasimaŋa.>>

24Daniel yaa ŋman cheŋ Naawa nuru kpioŋku Ariok jigi waai ale jam a nya yam nuruma koka zuk la a weeni wa ayen, <<Kan ko nuruma de! Ta mi a cheŋ Naawa jigi mi ale weeni wa gɔdaasimaŋa kiri a sak wa.>>

25Ariok yaa nye nwuli a ta Daniel a cheŋ Naawa jigi a yaa weeni wa ayen, <<Mi nya ka Juda dem baai ale bo fi tɛŋka po la wanyi wala ale baga a weeni fi gɔdaasimaŋa kiri a sak fu.>> 26Naawa yaa bek Daniel ayen, <<Fi ale baga a weeni mu m gɔdaasimaŋa ale ŋa kiri ale ka diila a sak mu? 27Daniel yaa tulisi ayen, <<Yam nuru ale sampoporisaŋa ale baai ale a zamsi chiŋmarisa wie la a kan baga a weeni wasusugi dii ate Naawa a gɔdaasim nya la a sak wa. 28Alege Wen dii ale bo wenŋmazuk la, wala ale pai wa susuga a sak. Wa pai sak Naab Nebukadnezzar dii ale ku nye wa chum po la. Fi ale doa fi gaduokku zuk ate gɔdaasimaŋa a bo fi zukku po la ale nna.

29<<Ase fi ale doa la Naaba, fi popolaŋa a tulim boka wie ŋaai ale kala ŋa nye chum po, ate waai ale pai wasusuga a sak la a yaa pai sak fu dii ale ku nye chum po la. 30Mi jigi wa poom pai sak mi kama. Alege ku kan sak kama ayen mi a ta yam a gaam nuru vuk meena kama, alege fi Naaba, ku a magsi kama ayen fi a seba di kiri abe fi miŋ dii ale bo fi popolaŋa po la.

31<<Naaba ase fi ale nya jameemmu ale wa za fi niŋ a zuak ale a nyaksi la. 32Jaamu zukku ka ligmɔniŋ, wa kuusini ale wa nisimaŋa a jam ka kpana, wa lɔŋŋa ale wa kɔsutaŋa a jam ka kutuk mɔnuŋ. 33Wa naŋsaŋa ka kuta, ku naŋtaataŋa gela a jam ka kuta kabita mɛ a jam chim yak. 34Ase fi yaa le a nya la piuŋ yaa kasi a nyini wenzuk alege nuru nisima an tiri ku alege ate piuŋku a jam nak naŋsaŋa geŋsa a yaa kaasi kutukku ale yakka meena. 35Ate kutukku ale yakka ale kutuk mɔnuŋku ale kpanaŋa ale ligmɔniŋka a yaa jam muriŋ bɛ ase vɔtta ate ba yali a basi diila. Alege ate piuŋku a taari lik tɛŋka meena.

36<<Gɔdaasimaŋa ale la, ti yaa ale weeni di kiri a sak Naawa. 37Fi ka Nalima Naab. Wenŋmazuk Wenni ate fu ka pagrim ale zuaka ale zula. 38Ate wa yaa pai nuruba ale duŋsa ale nuinsaŋa a nyo fi nisima po. Kauk kuui meena ate ba boro la, fi ale a nya ba zuk. Fi abe le ligmɔniŋ zukku.

39<<Fi ŋaaŋnyiŋ, naam bu choa ale ŋman yiti bula a kan pagra ase fi la. Bu choa ale ŋman yiti a saari buta buta ale ŋman nya pagrim tɛŋka meena zuk. 40Kpeglimka po, buui ale saari sinaansiwa po la, bula ale pagra kama ase kutuk la. Ase kutuk ale pagra a kaasi jaab meena la, naam bula ale kaasi m tila meena. 41Ase fi ale nya ale naŋsaŋa kabta a chim yak alege kabta mɛ kuta la, naamu mɛ a za ka poori ka dila. Bu ale diem ta pagrim magadega ase kutuk la, ase fi ale nya ale kutuk ale yak ale gum chaab diila. 42Ase naŋsaŋa kabta ale chim kutuk, kabta mɛ a chim yak la, naamu kauk ale pagra alege kauk a wobsa. 43Ase fi ale nya ale kutuk ale yak a damu chaab la, ku a sak kama ayen nuruma mɛ ka tɔgatɔga a dam chaab. Ba ka nɔiyeŋ ase yak ale kutuk ale ka diila.

44<<Nalimaŋa de daaŋa po, Wen dii ale bo wenŋmazuk la ale basi ate naam bu choa a jam bula a kan maara kaasi yaase naam bu choa a nya pagrim ka zuwa bula ale kaasi naam tila meena ate bu poom kan maa boro. 45Gɔdaasimaŋa kiri ale nna ase fi ale nya ale piuŋ a kasi alege ate nuru nisima an tiri kula. Piuŋku a nak kutukku ale jabuui ale a nye ase kutuk mɔnuŋ la ale yakka ale kpanaŋa ale ligmɔniŋka a kaasi la. <<Wen dii ale zuak la a pai sak Naawa dii ale ku nye chum po la kama, gɔdaasimaŋa ka wensie.>>

46Naab Nebukadnezzar a yaa lo tɛŋ Daniel niŋ a te wa zula. 47Naawa a weeni Daniel ayen, << Fi Wenni ka wena meena Wen ale ŋman chim nalima meena Nyɔnɔ waai ale pai wasusuga a sak, fi a baga a weeni wasusugni de kama.

48Naawa yaa te Daniel tiirita nna yegayega wa jam basi ate wa chim ka nuru kpioŋ Babilon tɛŋka po ale basi ate wa a nya nuru baai meena ale ta yam la zuk. 49Daniel yaa bek ate Naawa a lueri Sadrak ale Mesak ale Abednego ate ba mɛ a chim kpaga Babilon tɛŋka po alege ate Daniel dek a wari bo naab yenni po.

Currently Selected:

Daniel 2: BWU

Highlight

Copy

Compare