Kolose 4

1Yɔmma nyama, ku a fɛ kama ayen ni ta nyemagsika ale wensie dii meena ate ni a nye ni yɔmma jigi la. Nama mɛ abe a teeri ayen ni ta Nyɔnɔ mɛ kama wenŋmazuk.

2M ŋman diem weeni a sak ni kama ayen, ni kan basi Wen puusika, abe ni kpesi nidek ale ni puusaŋa, a nye Wen jiam. 3Ni maa puusi a te tama mɛ ayen Wen le te ti suik naluŋ ate ti baga a sak nuruba wa tomtomiŋ kaai ale a biisi a magsi chaab ale Kirisitawa waai mɛ ale chim wasusugi a te nuruba la. Boan nyiŋŋa, ka sinsaŋŋa de nyiŋ abe ale soa ate mi bo likka dɔk nna la. 4Ni maa puusi a te mu ayen Wen maari ate m mooli wa wanni ate ku ŋmasi lagri a sak ba. Dii nyiŋla, ku magsi ka m nye dila.

5Dii meena wuu ate ni a nye ale baai ale kan daa Kirisita bisa jigi la, ni a nye ale yam. Ni dan ga nya suik diipo meena, ni nyiem a kpabi nwuli ate ni nye wari dii ate ni a yaali ayen ni nye la. 6Ni basi ate ŋmanteka a bo ni biika po, abe ka masa, ate ni seba ni le nye dii a tulisi waai meena la.

7Tidek suoku Tikikus, waai ale ta wensie tuima meena po a maa tom a te Naawen la, wala le weeni ni dii meena ale boro la magsi chaab ale mi 8ka dila ale soa ate mi a tom wa ni jigi ayen wa weeni a sak ni tama mɛ ale bo dela a nye diila ate ku te ni popeentik. 9Tidek suok maŋka Onesimos waai ale ka nama po wanyi a ta siaka nna yegayega la a maa va Tikikus cheena kama. Bala ale maari chaab a weeni ni dii meena ale a nye dela la.

10Arisitaakus waai ale bo likka dɔk ale mi la, a puusi ni. Banabas suoku Maak mɛ a puusi ni. Mi a poli ayen m poom liŋ weeni ni ayen dai dii dai Maak a dan jam ni jigi, ni tuesi wa nalimnyiini. 11Josua waai yuei di choawa ale Jasitus la, a puusi ni. Nuruma de batawa, Arisitaakus ale Maak ale Josua nyiini ale Juuba a va Kirisitawa suiku a maari a tom Wen naamu tuimaŋa. Ba be kasim a maari mu ka nna yegayega. 12Epafiras waai ale ka ni po wanyi ale chim Yeezu Kirisita tomteerɔ la a puusi ni. Wa kasim a jɛ ka jiak wa puusa po a te ni, ayen ni zaani giŋgiŋ Kirisita yaalika meena po, ate ni pak abe ni seba chak. 13Mi dek pai nina maa nya wa tuimaŋa ate wa tom nalimnyiini dii Laodisia ale Erapolis tɛŋsaŋa po la kama. 14Ti tebirɔwa Luuk ale Diimas maari chaab a puusi ni. 15Puusi ti suataŋa ale bo Laodisia la, nalimnyiini a te mu. Mi a puusi Nimfa ale Kirisita bisaŋa ale a nye tuka wa yenni po la nalimnyiini. 16Ni dan karim gbaŋka nueri, ni pii nyiŋ ate ni basi ate Kirisita bisaŋa ale bo Laodisia la maari wom ka wieŋa. Fi dan nye dila mɛ, tuesi gbaŋ kaai ate Laodisia demma mɛ le te fu la a karim. 17Abe fi weeni Akipus mɛ ayen mi weeni wa ayen, <<Seba chak ate fi nueri tuin dii ate Naawen te fu ayen fi tom la a nueri.>>

18Ni a teeri chɔrimaŋa ate ba pai bobi mu la wie. Mi Pɔɔl dek ale pai m nisima a ŋmarisi wieŋa de ayen, Pɔɔl a puusi ni. M be ŋman a saalim ayen ti Wenni ŋmanteka a bo ale ni.

Currently Selected:

Kolose 4: BWU

Highlight

Copy

Compare