1 Tesalonika 1

1Mi Pɔɔl ale a ŋmarisi gbaŋka de ate mi ale Silas ale Timoti a puusi nama baai ale a va Yeezu Tesalonika tɛŋka po la. Ti Nyɔnɔwa Yeezu Kirisita ale ti Kowa Wen ale soa ni. Ŋmanteka ale suiyɔgni a bo ale ni.

2Ti a te Wen jiam ale a puusi a te wa kama daa meena nama nyiŋ, 3ti kasim a teeri ti Wenni ale ti Kowa niŋ kama ni siaka ale basi ate ni tom tuim ŋaai la, ale yaalika ale basi ate ni nam diila ale yiila ale choa ni ate ni chiibi dii meena ti Nyɔnɔwa Yeezu Kirisita nyiŋla. 4Ti suata, ti seba ayen Wen a yaali ni kama, ate wa lueri ni a te wadek dii nyiŋla, 5ti ale liŋ a sak ni Wen wamaŋsaŋa la, ku jam daa tama dek noa po wie nyiini ate ti weeni sak ni. Wen Chiika ale pai pagrim a nyo ŋa po. Dila ale soa ate ni wanyi mɛ la a jam ka chichama ale ŋa. Ni jam nya ti ale boro ale ni diila kama nama nyiŋ, 6ate ni tomsi tama ale ti Naawenni. Nuruba jam basi kama ate ni jam a nam nna yegayega dii nyiŋla, ni ale jam siak a te Wen wamaŋsaŋa la. Alege Wen Chiika a jam basi ate ni sue a peenti ka yegayega. 7Dila abe ale soa ayen nama ale a va Yeezu diila, ku magsi ka baai ale jam bo Masidoniya ale Akaaya ate ba ta siaka ale Yeezu la, a va nama ale a va wa diila. 8Ni ale jam ta ti Nyɔnɔwa Yeezu Kirisita wamaŋsaŋa a cheŋ ga weeni sak ba wa wie la, baai meena ale jam bo dula jigini ale jigi meena la, a wom ni wie kama ni ale jam siak a te Wen diila. Ti be kan ŋman a yaali ayen ti weeni ni wari a sak nuruba 9dii nyiŋla, badek a weeni sak ti kama ayen ti ale jam ni jigi la, ni jam tuesi ti kama ale wom ti wieŋa ale basi bɔgta kaabka ale a va Wen dii ale ka wensie nyɔnɔ ale kasim boro taam wuu la, 10ale a tom wa tuimaŋa ale a limisi wa nidoabinni Yeezu waai le wa basi wenŋmazuk abe wa ŋman pilim jam tɛŋzuk de la. Ka Wen ale jam nye ate wa yiti kum po. Wa ka waai ale a vari ti a basi Wen le za wa te nuruba waalika la po.

Currently Selected:

1 Tesalonika 1: BWU

Highlight

Copy

Compare