2 Korinti 1

1Mi Pɔɔl, ka waai ate Wen a lueri ayen m chim wa tuimtomdɔ la. Ti suoku Timoti a puusi ni. Mi Pɔɔl, ale a ŋmarisi gbaŋka de a te nama Kirisita bisaŋa ale a tu chaab Korinti la, ale baai meena ale ka Wen nuruba bo Akaaya tɛŋka la.

2Mi a puusi a te Wen ti Kowa ale ka Yeezu Kirisita ti Nyɔnɔwa la kama ayen wa te ni ŋmanteka abe wa te ni suiyɔgni.

3Ni basi ate ti pak Wen ale ka Yeezu Kirisita ti Nyɔnɔwa Ko la. Wa ka jiirim Ko waai ate maarika meena a nyini wa jigi. 4Wa kasim a maari ti kama daanika meena po, ate ti baga a maari ti suata daanika meena po. Ti be pai ka maari kaai ate tama dek a nya Wen jigi la a maari ba. 5Tama abe le maa tuesi Kirisita ninammu a nam la ti be le va wa nyiŋ a nya Wen maarika yegayega kama. 6Tama a daa a nam, ka nama maarika ale ni varibasika nyiŋ. Ti be dan nya maarika nama me a nya maarika kama ale pagrim ate ni baga a chiib ale ninam buui choawa ate tama me a chiibi la. 7Ti seba chak kama ayen ni le ŋmasi chiibi ate ni kan lo. Tama mɛ be seba ayen nama ale tama ninammu ka bunyi. Ti maarika me ka bunyi.

8M suata, mi a yaali ayen m teeri ni kama ate ni seba daani kaai ate ti nya Asia la. Va ŋala po, tama ninammu a jam zuak ka nna yegayega. Ti jam poom poli ayen ti le kpi kama. 9Ku jam a nye ase ba bo ka tama kum buusa la. Wen ale basi ate wieŋa de a nye ti, ayen wa sak ti ayen ti ka a poli ayen ti baga tidek a nya kama. Alege wa a yaali kama ayen ti a nya wa waai ale a nak nuruba a yiti kum po la. 10Va ŋala po Wen a jam vari ti kum po a basi kama. Ti ta yiila kama ayen wa le ŋman vari ti a basi kama. 11Ni be le a puusi nna yegayega a te ti la, Wen ale tulisi ni puusaŋa abe wa niak ti, ate nama a te wa jiam tama nyiŋ.

12Ti ta kanjanta kama diila tama dek popola po ti seba chak kama ayen ti boka tɛŋzuk de, ale tama ale ni ale ka diila ka Wen ale maari ti ate ti ta suinum weleŋsa ale popola maŋsa. Kude be ka Wen ŋmanteka nyiŋ daa nurubiik yammoa. 13M le a ŋmarisi a te ni diila, mi a poli ayen m le a weeni diila, an pagra ate ni kan baga miŋ. 14Ni diem zɛ mu a chak ya, alege mi a yaali kama ayen ni seba mu nalimnyiini, ate ni ta kanjanta m nyiŋ ase Yeezu ti Naawenni a nin pilim jam.

15M le jam seba kude chak la nyiŋ, m yaa jam poli ayen m jam ni jigi ate m baga a niak ni a nye buye. 16M poli kama ayen m jam ni jigi ase m nin pilim a ŋmani a cheŋ Masidoniya ate m yaa zaani Masidoniya a jam ni jigi, ate ni yaa basi ate m cheŋ Judia. 17M le liŋ jam a yaali ayen m jam ni jigi ale ge ku ŋaaŋnyiŋ an jam yaali jamka la, nna a sak kama ayen m ka nuru waai ale kasim a tagri m popola la? M ta ka kanjanta ate m weeni ayen m le liŋ jam ni jigi ale ge ŋman weeni ayen m kan jam? 18Wen ale mi seerɔ ayen m daa nuru wala choa. Mi ka nuru waai ale wensie nyɔnɔ la. 19Diila Wen Nidoabinni, Yeezu Kirisita, waai ate mi ale Silas ale Timoti a mooli wa wie a te ni la jam daa ŋa le nye yaase ŋa kan nye alege ŋa nye kama wa nyiŋ. 20Wen dan poom puulim zuak diiya ŋa a nye kama Kirisita nyiŋ. Ate wa nyiŋ tama ale a biisi ayen ku be nye dila la a te Wen zula. 21Wen dek ale lueri tama ale nama meena ate ti seba chak ayen ti ta nyuvuri dii ale kan ta kpeglimka la ti le Kirisita ale ka bunyi la nyiŋ. 22A yaa ŋmarisi ti nyiŋsa ayen wadek ale soa ti. Wa pai wa Chiika a nyo ti suiniima po kama ate ku sak ayen wa le nye wieŋa de meena a te ti.

23Wen ale mi seerɔ a seba dii ale bo m suinum po la. Mi an ŋman pilim jam ayen m nya ni, dii nyiŋla, m dan poom jam, ni te jam wom ka m biik pagrika. 24Tama kan yaali ayen ti jam sak ni a gum ni ale ta siaka ale Yeezu Kirisita diila. Ni poom ta siaka ale wa ka nalimnyiini. Ti a yaali ayen ti maari ni kama ate ni sue peenti.

Currently Selected:

2 Korinti 1: BWU

Highlight

Copy

Compare