1 Korinti 16

1Yɔgyɔgla de mi a yaali ayen m weeni ka ni ale ŋmarisi gbaŋka a weeni ligraŋa ate ni a cheesi la wari. M le weeni Galatia Kirisita bisaŋa ayen ba nye diila nama me a nye dila dekdega. 2Laasidi dai meena waai meena a gaari ligra a magsi wa pagrim ale ka diila a dueni ate m dan jam abe ni kan ŋman weeni ayen ni cheesi ligra. 3M bɛ dan jam m le ŋmarisi gbaŋ a te nuru baai ate nama a mariŋ ba a lueri la ate ba ta ni tiirimu a cheŋ Jerusalem tɛŋka. 4M bɛ dan ŋman nya ale ku magsi ayen m dek cheŋ abe ba va mu a cheŋ.

5Mi a poli ayen m va ka Masidoniya. M dan va dula abe m deri jam ni jigi. 6M dan jam ni jigi m le goa a beni maga. M le bo ale ni ŋoota wen meena ate ni baga a maari mu ate m ŋman baga a cheŋ juijui meena ate mi a yaali ayen m cheŋ la. 7M kan yaali ayen m nya ni ale ka m nimbie abe mi a taam mu. Mi a yaali kama ayen m goa ale ni a beni maga ase Naawen a nin te suik. 8Mi a yaali ayen m bo Efisos tɛŋka a ga paari ka Da Pisinu Tigini.#16:8 Kaabka 23:15-21, Chiinika 28:26, 31 9Wen a lak ka suik a te m boro a tom tuima dek dela jigini alege nuruba a kisi mu a kan siagi.

10Timoti a dan jam ni jigi ni tuesi wa nalimnyiini ate ku nye wa masim ale wa a tom a te ka Naawen ase mi la. 11Ni waai a kan pai wa a chim jaab valiŋŋa, ni maari wa ate wa jam m jigi ale suiyɔgni. Mi a limisi wa kama ale m tomteerɔ chaama.

12Mi a kasim a te ti suoku Apolos nyiŋbiiri kama ayen wa jam ni jigi alege wa an yaali ayen wa jam yɔgyɔgla de. Wa dan nya suik wa ale jam.

13Ni kpesi a nya abe ni chiib a zaani ale siaka abe ni chim nuru baai ale toa abe ni ta siak kaai ale pagra. 14Ni a tom ni tuimaŋa meena ale yaalika.

15Ni seba Sitifanus ale wa dɔkdemma ka baai ale liŋ dɛ niŋ tagri a chim Kirisita bisa Akaaya tɛŋka po. Ba ka baai ale tagri Kirisita bisa zuk a kasim a tom Wen tuimaŋa. Mi a saalim ni, m suata. 16Ni a zuli nuruma de chaab, ale waai meena ale a tom ale ba la. 17Mi sui a peenti ka nna yegayega ale Sitifanus ale Fortunatuse ale Akaikus, dii nyiŋla ba tagri ka nama zuk a cheena 18ate ku basi ate m popola a yɔk. Ni a zuli nuruma de chaab.

19Kirisita bisaŋa meena ale a tu tɔgatɔga a bo Asia meena la a puusi ni. Akiila ale Pirisila ale Kirisita bi sii ale a tu ba yenni po la a puusi ni nalimnyiini. 20Ni Kirisita bi chaama ale bo dela la a puusi ni. Ni meena nyiem a dan yiti ni a puusi chaab.

21Mi Pɔɔl, ale a ŋmarisi puusaŋa dɛ ale m dek nisa. 22Nuru waai ale ka a yaali Naawen la, kikaasa ale bo kula nyɔnɔwa zuk. Ti Naawen yaa, be pilim jam. 23Yeezu Kirisita ti Nyɔnɔwa ŋmanteka a bo ale ni meena. 24Mi yaalika a bo ale ni meena Yeezu Kirisita nyiŋ. Ku be nye dila.

Currently Selected:

1 Korinti 16: BWU

Highlight

Copy

Compare