1 Timoti 4

1Wen Chiika a nyini ka peelim a weeni ayen chum diipo, nuruba ale basi ba siaka, abe ba wom chichirisa venta wie abe ba va chichirik baata sinsaga. 2Sinsaŋŋa de chaab pimpaasima nyam ale velim ate ŋa tagli jigi meena. Ba popolaŋa a kpi kama, nna ase ba a pai kutuk tuiluk a ji ba zuimaŋa la. 3Ba le sak nuruba ayen ku an nala ate ba a faari nipooba, yaase nipooba a yali nidoaba yaase ku a kisi kama ate nuru a dɛ ŋandiinta gela. Alege ba zɛ ka Wen ale nye ŋandiin tila a magsi dɛka ase baai ale ta siaka ale Yeezu yaa seba ku wensieŋa jigini la, a le nye Wen jiam abe ba ge a dɛ. 4Ŋanta meena ate Wen a nye la, a nala kama. Dila nyiŋla, fi dan nya jaab ate fi yaa nye Wen jiam jaamu nyiŋ, kan chali yɔgsum, tanla. 5Ti dan nye dila, Wen wanni ale tama puusaŋa le basi kama ate jaab wala chim jaweleŋ a te ti.

6Fi dan pai wensie sinsaŋŋa de a sak fi suataŋa Kirisita bisaŋa fi le chim ka Yeezu Kirisita tomteerɔ maŋ. Wie ŋaai ate fi va ŋa ale siak a te wensieŋa sinsaŋŋa mɛ la, ŋala meena le basi kama ate fi siaka a chim a gumdu. 7Kan gum chaab ale baai ale a sak sunsuelima ŋaai ale kan magsi chaab ale Wen ate ba pai a sak nuruba la. Ba sunsuelimaŋa ka sunsuelim kayaata. Pii nyiŋ fidek a zamsi Wen wensie sinsaŋŋa ate ŋa bo fi suinum po ate fi boka a nye ase Wen la. 8Fi dan pai fi nyiŋka a tom tuima ayen ka pagra, dila ale nala, alege Wen wanni a dan bo fi suinum po dila a gaam taam ka yegayega, dii nyiŋla, fi le nya nyuenta yɔgyɔgla ale chum diipo. 9Ka wensie ate nuruba weeni nya kude, ku be magsi ka nuruba siak nalimnyiini ayen ku ka wensie. 10Ti a tom ti tuimaŋa yegayega a te ka Wen dii ale sum boro la. Dii nyiŋla, ti ta yiila wa jigi kama. Wa ka waai meena Varibasidɔ alege wa potim a vari ka baai ale ta siaka ale wa la a basi.

11A weeni abe fi a sak nuruba wieŋa de. 12Basi ate fi boka po ale fi biik po, ale fi tuim naliŋsa po ale fi yaalika ale fi siaka ale fi weleŋsa, a sak Yeezu ŋaaŋviirɔma ba le ba nye dii a va Wen la. Fi diem ka bi paaluk alege fi daa nye dila nuru kan nya suik a pai fi chim biiga. 13Basi ate fi nina muni ate fi a karim Wen gbaŋka ate waai meena a wom. Saalim ba ate ba va Wen suiku. Pai ka mɛ a sak nuruma Wen wie ate m jam. 14Kan baŋ tiirim buui ate Wen a pai a te fu diipo ate Wen biisiteerɔma a biisi Wen pagrim nyiŋ ate Kirisita bisa kpaŋŋa a yaa pai ba nisaŋa a vi fu zuk la. 15Basi ate tuimaŋa de a bo fi suinum po ate fi va ŋa, ate nuruba meena a nya fi ale a tom tuimaŋsa dii a gumdu la. 16Kpesi fidek fi boka jigi ale fi ale a sak nuruma diila. Fi dan va wieŋa de nalimnyiini, dai yeŋ Wen le jam vari fidek ale baai ale wom fi nɔi la tuimbaata po a basi.

Currently Selected:

1 Timoti 4: BWU

Highlight

Copy

Compare