1 Tesalonika 4

1Ti suata, tama jam sak ni ni le ni nye dii a va Wen ate wa sui peenti la kama. Ni be kasim va dila. Alege ti a saalim ni ti Naawenni Yeezu yuei nyiŋ ayen ni kasim ŋman a va wa dila nalimnyiini a gum du. 2Nama baga teeri ti ale jam pai ti Naawenni Yeezu pagrimu a sak ni diila? 3Nama dek seba Wen ale a yaali diila kama. Wa a yaali kama ayen ni pai nidek meena nalimnyiini a te wa abe ni basi nipooba yaalika ale nidoaba yaalika. 4Ku a fɛ kama ayen nama nidoama a seba nye magsi kaai ate ni le nye a ta nipok ate ni nyeka a peenti Wen sui abe ka peenti nuruba sue mɛ la. 5Ni kan a yaali nipooba kinla nyiŋŋa ase baai ale kan seba Wen la. 6M le a weeni dii a magsi chaab ale nidoa ale wa a nye nipok jigi diila, waai kan nye wari a kaasi Kirisita biik choa suiya, yaase wa nya wa nueri. Dii nyiŋla, ase ti ale poom a liŋ weeni ni diila, ayen waai dan kan a nye nipok a magsi yaase wa a nye wie a kaasi wa Kirisita biik choa sui ya, Wen le jam te bala chaab waalika. 7Wen an lueri ti ayen ka ti a tom tuimbaataŋa de chaaba, alege wa lueri ti kama ayen ti chim nuru weleŋsa. 8Dila nyiŋla, waai ale a zɛri ti sinsaŋŋa de la, wa kan zɛri ka nuruba ale a sak diila, alege wa a zɛri ka Wen dii ale pai wa Chiika a te ni la.

9Ku an magsi ayen m ŋman ŋmarisi te ni a weeni ni le ni nye dii a ta yaalika ale chaab la, dii nyiŋla, Wen a liŋ jam sak ni kama. 10Ti seba ayen ni a yaali Yeezu ŋaaŋviirɔma baai meena ale bo Masidoniya tɛŋka po la, alege ti a saalim ni kama ayen ni a nye dila nalimnyiini a gum du, 11abe ni nye ni popola ate ni boro nna chim. Ni kan pai nidek a nyo ni vaanchaab wie po. Ni a dɛ nidek nyiŋ wulum ŋandiinta mɛ ase ti ale liŋ jam sak ni diila. 12Ni dan a va nyeka de, baai ale kan ta siaka ale Yeezu la, le te ni zula, ate ni kan ŋman a nya nuruba ayen ba te ni ŋanta.

13Ti suata, ti a yaali ayen ka ni seba ku wensieŋa a magsi chaab ale baai ale kpi la, ate ni popola a kan kaasi ase baai ale kan ta yiila Yeezu jigi la. 14Tama abe ta yiila kama boan nyiŋŋa, ti ale ta siaka ayen Yeezu kpi kama ale ŋman yiti kum po la. Dila dekdega ate Wen le nye ate baai ale ta siaka ale Yeezu alege kpi la, a yiti kum po ate ba maa chaab a boro ale Yeezu. 15Ti a sak ni ka ti Naawenni ale sak ti diila. Dai yeŋ po, ti Naawenni le ŋman pilim jam. Wa dan jam, tama baai, ale vua la, ku a fɛ kama ayen ti kan dɛ baai ale kpi la niŋŋa. 16Da dila danni, nuruba le wom ti Naawenni lueluku ale Wen maarɔma kpagi kpienni lueluku ale Wen damuniŋka peerika ate ti Naawenni dek nyini wenŋmazuk a siŋ cheena ate baai ale jam ta siaka ale wa alege kpi la, a yiti kum po. 17Wa yaa le deri tigsi tama baai ale tali a vua la, ate tama yaa yiri a jueli chiŋmaaŋa po a tu ti Naawenni dula. Ti le kasim bo ka wa jigi taam wuu. 18Ni a weeni wamaŋsaŋa de a sak chaab ate ku te ni nyiŋbiiri.

Currently Selected:

1 Tesalonika 4: BWU

Highlight

Copy

Compare