1 Tesalonika 3
3
1Dila powa ti jam limisi kama a jiak alege ti an jam wom ni wari ya. Dila nyiŋla, tidek jam poom gomsi kama ayen ti wari Atens tɛŋka po, 2alege yaa tom ti suoku Timoti ayen wa jam ni jigi. Mi ale wa maari chaab a tom ka Wen tuimaŋa ale a weeni a sak nuruba Wen wamaŋsaŋa ŋaai ale a biisi Yeezu Kirisita wie la. Ti tom Timoti ayen ka wa jam deŋsi ni kpa abe wa a maari ni ate ni ta siaka nalimnyiini ale Yeezu, abe 3ni kan pai ni ŋaaŋ a te Wen suiku vaka nuruba ale a daani ni la nyiŋŋa. Nama dek seba ayen ku a fɛ kama ayen baai ale a va Wen suiku la a nam kama. 4Tama ale jam bo ale ni la, ti liŋ jam weeni ni kama ayen Wen le te nuruba suik ate ba basi ate ni nya ninam. Dila sum nye kama ase ti ale poom jam a weeni ni diila. 5Ku ale jam a daani mi nna yegayega nama nyiŋla, m jam tom ka Timoti ayen wa jam nya ase ni ka se, ase ni diem ta siaka ale Yeezu yaase ni ka. M jam zɛ ku ale ka diila, ase da dii dai jabioku a nye ni a nya ate ni va wa nɔi alege basi ate ti tuimaŋa de meena kaasi ale ka kiriya.
6Timoti be jam ni jigi kama ale ŋman pilim jam tama jigi. Wa ale ta wapaali ŋaai a jam weeni sak ti la, ŋa masa te ti kama. Wa jam weeni sak ti ni ale ta siaka ale Yeezu dii ale a yaali nuruba mɛ la. Wa weeni sak ti ni ale diem a teeri ti wie dii ale a yaali mɛ ayen ni nya ti ase tama ale a yaali ayen ti nya nama mɛ diila. 7Ti suata, ti diem bo ka daanika ale ninam po, alege ni ale ta siaka diila a te ti ka nyiŋbiiri ate tama mɛ a tom. 8Ni ale ŋmasi zaani ale ni siaka ale ti Naawenni nalimnyiini dila te ti ka nyiŋ pagra ale nyuvuri. 9Yɔgyɔgla de ti zɛ ti le ti nye Wen jiam diila, dii nyiŋ la ti dan biisi ni wari ale wa, te sui a kasim a peenti kama daa meena. 10Yɔk ale kantueŋ meena ti a puusi a te ka Wen ale ti suiniima meena ayen wa maari ate ti ŋman jam nya ni, ate ti ŋman sak ni a gum du ase ti ale liŋ jam sak ni Yeezu vaka diila.
11Ti Kowa Wen ale ti Nyɔnɔwa Yeezu Kirisita a dan te ti suik ti le jam ni jigi. 12Ti Naawen le maari ni ate ni ta yaalika a zuak nna yegayega ale chaab ale nuru meena ase tama ale a yaali nama diila. 13Ni dan a yaali chaab dila, ti Nyɔnɔwa Yeezu Kirisita le maari ni ate wa ale wa maarɔma meena a dan jam, ni le baga a zaani ti Kowa Wen niŋ ale suiniim weleŋsa, ate wa kan nya kaasuŋ ni jigiya.
Currently Selected:
1 Tesalonika 3: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
