1 Samuel 8

1Samuel yaa le jam kpaŋ la wa yaa lueri wa bisa baye ayen ba chim Izirali niŋdeerɔba. 2Wa bikpagni yuei jam le Joel, waai ale pai saŋ la yuei ale Abaija. Ba jam a tom ka Beerseba. 3Alege wa bisaŋa an jam va wa nye maŋka. Ba jam a gebi ka nuruma ŋanta a nya ba ŋantaŋa. Ba jam basi ate ka nuruba a da ba ale ligra ate ba kan bo buusa a magsi. Ba jam ŋmani a te ka baai ale a da bala.

4Izirali nisɔmma yaa jam jigi yeŋ ayen ba nya Samuel Arama tɛŋka. 5Ba yaa weeni wa ayen, <<Yɔgyɔgla de fi kpaŋ kama alege fi bisaŋa a kan va fi nyeka, dila nyiŋ lueri naab ate wa a nya ti zuk ate tama mɛ ta naab ase tɛŋ yonsa la.>>

6Samuel ale wom ayen ba a yaali naab la wa sui an peenti ya. Wa yaa puusi te Naawen ayen wa sak wa. 7Alege Naawen yaa weeni wa ayen, <<Nye nuruma ale a yaali diila. Lueri naab a te ba. Fi a poli ayen ba zɛri ka fi, ka mi ate ba zɛri. 8A zaani diipo ate mi ta ba nyini Ejipiti tɛŋka po nyini la, ba kasim a zɛri mi kama alege a va wena. Dila dek ate ba a nye fi mɛ. 9Wom ba le a weeni diila, alege chiib kpaam ba naawa ale za wa yaali ayen ba nye dii te wa la.>>

10Samuel yaa jam weeni Naawen wieŋa meena a te nuru baai ale jam bek a yaali naab la. 11Wa weeni ba ayen, <<Dii ate naab waai a za wa a nya ni zuk la ale nye la ale nna. Wa le basi ate ni bisaŋa a tom a te wa, abe ba a dam kpaliŋ torokoba ale wusuma abe ba chali dɛ kpaliŋ torokoma niŋ a mooli juijui meena ate wa a cheŋ la. 12Wa le lueri ni gela ate ba a nya tugurik tɔŋdɔba tusidi tusidi zuk ate ba gela a nya tugurik tɔŋdɔba pisinu pisinu zuk. Wa le basi ate ba gela a kpa wa tattaŋa abe ba che wa ŋantaŋa. Wa le basi ate ba gela a nye gbatta ale gebik woŋsa, ale ŋanta a magsi kpaliŋ torokoba. 13Ni liema wa le basi ate ba a nye kpa buui nyum ale masa, abe ba gela a dik a te wa nuruma. Abe ba gela a nye boroborok a te ba. 14Wa le tuesi ni laŋsaŋa po ŋan baai ale zunchoŋ la, ale ni kaduksaŋa yɔn maŋsaŋa a te baai ale tom a te wa la. 15Ni kpanni ŋantaŋa ale ni daamu meena piika po wa le yeeri bunyi bunyi a te wa kpaŋŋa ale wa yɔmma. 16Wa le lueri ni nuruma gela nidoaba ale nipooba ate ba a tom wa yenni. Wa le lueri ni naab maŋsaŋa ale ni bon maŋsaŋa a te wadek. 17Daa dila nyiini piisa ale bua meena piik po wa le lueri kunyi. Di kpeglimka meena ni le chim ni naawa yɔm. 18Kula dan nye ni le kum a wi Naawen ayen wa basi ate ni naawa a ta jiirim ale ni. Alege Naawen a kan wom ni. Samuel ale weeni diila ale la.>>

19Alege nuruma a zɛri ba an wom Samuel. Ayen, <<Aaya, ti a yaali ka naab. 20Ti a yaali ka naab ayen wa a dɛ ti niŋ ate ti a cheŋ kpaliŋsa ate tama mɛ a nye ase tɛŋ yonsa ale ta nalima diila.>>

21Samuel ale wom dii meena ate nuruma weeni la, wa yaa ŋman weeni sak Naawen. 22Ate Naawen yaa tulisi ayen, <<Wom ba le weeni diila abe fi te ba naab.>> Samuel yaa weeni Izirali demma ayen waai meena a kuli.

Currently Selected:

1 Samuel 8: BWU

Highlight

Copy

Compare