1 Nalima 2

1Ku le jam moata Deevid kummu la, wa yaa biisi wieŋa de a te wa nidoabinni Solomon. 2Wa weeni ayen, <<Mi moata ka kum, dila be pagra, sak niduenni 3abe fi kpesi a nye dii ate Naawen fi Wenni a yaali la. Cheŋ wa suitaŋa po abe fi ta wa ŋmarisika ale wa wieŋa ale wa buusaŋa ale wa kaamka ase ku le ŋmarisi dii Moosis Sinsaŋŋa po la, ate dila ale basi ate fi nya niauŋ dii meena ate fi a nye la po ale juijui meena ate fi a cheŋ la 4ate Naawen a ta wa pumpuulimaŋa ale mi. <Ase fi ŋaaŋbisaŋa a dan kpesi a nya ba ale boro diila, ale a cheŋ ale wensie mi niŋ ale ba suinum ale ba chiik meena, fi a kan jɔk nidoa ate wa kali Izirali naam zukpaglika zuwa.>

5<<Yɔgyɔgla de fidek a seba dii ate Zeruiya nidoabinni Joab a nye mi la kama, dii ate wa nye Izirali tugurik tɔŋdɔma kpaŋŋa ŋayema Ner nidoabinni Abner ale Jeter nidoabinni Amasa la kama. Wa jam ko ba kama, ate ba ziimu a nyini diipo ate suiyɔgni a boro la, ase ka kpaliŋ po la, ate ziimu a bo wa chiak gbanni nyiŋ a gilim wa chiaka ale wa nuensaŋa ate wa su la nyiŋ. 6Nye ale wa a ta va chaab ale fi yammu ale ka diila, kan basi ate wa zupeeluku nyɔnɔ a siŋ vɔrup ale suiyɔgni.

7<<Alege sak nyemagsika ale Gilead denɔwa Barzillai nidoabilisaŋa abe fi basi ate ba gum baai ale a de ŋandiinta fi yenni la po. Ba jam za ale mi kama diipo ate mi a jam chali a nyini fi suoku Absalom jigi la.

8<<Abe fi a teeri Gera nidoabinni Simei a bo ale fu kama Benjamin denɔwa ale nyini Bayurim la, waai ale ka kikaasa a te mi dai dii danni ate mi a cheŋ Mayanaim la. Wa ale jam siŋ jam ayen wa tu mi Jodan benni la, mi jam puulim ale wa kama ayen Naawen nyiŋ, <Mi kan ko fu ale gebiga.> 9Alege yɔgyɔgla de kan nya wa ase waai ale kan kaasi wari la. Fi ka nidoa waai ale ta yam la. Fi ale seba dii ate fi ale nye wa la. Basi ate wa zupeeluku nyɔnɔ a siŋ vɔrup ale ziim.>>

10Deevid yaa kpi ate ba gu wa Deevid Tɛŋka po. 11Wa jam de naamu ka bena pisinaansi Izirali tɛŋka po. Wa jam de ka bena ŋayopɔi Yebron tɛŋka po ale de bena pisita ale ŋata Jerusalem tɛŋka po. 12Dila Solomon a jam wa kowa Deevid naam zukpaglika zuk ate wa naamu a zaani paari.

13Yaggit nidoabinni Adonija yaa jam cheŋ Batseba jigi Solomon mawa ale la. Batseba yaa bek wa ayen, <<Fi jam ale ka suiyɔgni?>> Ate wa tulisi ayen, <<Mm ka suiyɔgni.>> 14Wa weeni a gum du ayen, <<Mi ta ka wari ayen mi weeni fu.>> Ate Batseba ayen, <<Fi baga a weeni di kama.>>

15Ate wa weeni ayen, <<Ase fi ale seba la naamu ka mi ale jam soa. Izirali meena a jam a nya ka mi ase ba naab la. Alege wie ale tagri ate naamu a cheŋ mi suoku jigi, diila ku nyini ka Naawen jigi a jam wa jigi. 16Mi ta ka bega bunyi ayen mi bek fu. Kan zɛri mu. Ate Batseba ayen, <<Fi baga a bek kama.>>

17Dila wa yaa tom du ayen, <<Mi a saalim weeni Naab Solomon, wa a kan zɛri fi nɔi ya, ayen wa te mu Sunem tɛŋka liewa Abisag ate wa chim m pok.>> 18Batseba a yaa tulisi ayen, <<Ku nala. Mi ale biisi ate naawa a te fu.

19Batseba ale jam cheŋ Naab Solomon jigi ayen wa biisi a te Adonija la, naawa yaa yiti zaani wa tu wa, a koori tɛŋ a puusi wa ale kali wa naam zukpaglika zuk. Wa jam weeni ate ba pa ka zukpaglik a te naawa mawa ate wa kali naawa juga geŋsa.

20Wa weeni ayen, <<Mi ta ka bega bunyi nna maga dega ayen mi bek fu, kan zɛri mi ale m weeni diila.>> Ate naawa yaa tulisi ayen, <<Weeni m maa, mi a kan zɛri fi ale ta diila.>>

21Dila wa yaa weeni ayen, <<Basi ate Sunem tɛŋka liewa Abisag a yali fi suoku Adonija.>>

22Naab Solomon yaa tulisi wa mawa ayen, <<Ka boa ale soa ate fi a bek mi ayen m pai Sunem tɛŋka liewa Abisag a te Adonija? Ka boa ale soa ate fi kan bek ayen wa chim naaba wa le toalim ka mi suok kpagi la. Kaabteerɔ Abiata ale Zeruiya nidoabinni Joab ale maari wa!>>

23Naab Solomon a yaa pɛ Naawen nyiŋ ayen, <<Wen a nye ale mu ate ku jo m nyiŋ mina mina, ase Adonija a nin kan pai wa nyuvunni a tuni wa ale bek diila nyiŋŋa. 24Yɔgyɔgla de ase Naawen ale boro la, wa waai ale basi ate mi a feri mi kowa Deevid naam zukpaglika zuk ale te mi dii ate wa puulim ale mi la. Adonija ale kpi jinla!>> 25Dila Naab Solomon a yaa weeni Jeyoiada nidoabinni Benaya ate wa nak Adonija a lɔnsi ate wa kpi.

26Naawa a weeni kaabteerɔwa Abiata ayen, <<Ŋmani a cheŋ fi talimu ale bo Anatot la. Fi magsi fi kpi kama alege mi a kan ko fu yɔgyɔgla de dii nyiŋla fi ale a ji Nyɔnɔwa waai ale ka Naawen nɔiyeŋka dakanni a de mi kowa Deevid niŋ ale kasim a nam ale mi kowa.>> 27Dila Solomon yaa jam yeeri Abiata a ta nyini Naawen kaabteka naamu po, ate dila a basi ate Naawen ale jam biisi dii Siilo a ta va Eli yenni la a chim wensie.

28Ase wanni de ale jo Joab turi la, waai ale jam nye nɔiyeŋ ale Adonija ale an va Absalom la, wa a jam chali jo ka Naawen viuku po a yik kuŋkuŋku nyiilaŋa giŋgiŋ. 29Naab Solomon a yaa wom ayen Joab a chali jo ka Naawen viuku po a za kuŋkuŋku gauŋ. Solomon yaa weeni Jeyoiada nidoabinni Benaya ayen, <<Ga ko wa!>>

30Dila Benaya yaa jo Naawen viuku po a weeni Joab ayen, <<Naawa ayen fi nyini peelim!>> Alege ate wa tulisi ayen, <<Aaya, mi ale kpi ka dela.>> Benaya yaa weeni sak naawa ayen, <<Joab ale tulisi mi diila ale nna.>>

31Naawa yaa weeni Benaya ayen, <<Nye ase wa ale weeni diila. Ko wa a gu wa, dila ale yeeri mi ale mi yenni dɔkdemma nisa ziim buui ate Joab a basi te bu siŋ la po. 32Naawen ale pai tuni wa le basi ate ziim buui a siŋ la nyiŋ dii nyiŋla wa ko ka nuruba baye ate mi kowa Deevid a zɛ ku nɔi po. Ba nɔi bayema a jam le Ner nidoabinni Abner, Izirali tugurik tɔŋdɔma kpagni ale Jeter nidoabinni Amasa, Juda tugurik tɔŋdɔma kpagni. Bade a jam ka nidoa baai ale zunchoŋ ale za ale wensie a gaam wa. 33Ba ziimu a bo Joab ale wa ŋaaŋbisaŋa zuk taam wuu. Alege Deevid ale wa ŋaaŋbisaŋa ale wa yenni ale wa naam zukpaglika, Naawen suiyɔgni a boro taam wuu.>>

34Dila Jeyoiada nidoabinni Benaya a jam jueli a nak Joab lɔnsi tɛŋ a ko wa a gu wa wadek tɛŋka gɔnni po. 35Naawa a jam pai ka Jeyoiada nidoabinni Benaya a zaani tugurik tɔŋdɔma naŋkula po ale pai kaabteerɔwa Zadok a tagri Abiata.

36Naawa yaa tom wi Simei a weeni wa ayen, <<Sɛ yeri a magsi fidek Jerusalem po a bo dula, kan cheŋ jigi yoŋŋoa. 37Dai dii danni ate fi basi dula a lo Kidron Viaka a jueli la, be seba a chak ayen fi a kpi kama. Fi ziimu a va fidek.>>

38Simei yaa tulisi naawa ayen, <<Dii ate fi weeni la a nala kama. Fi tomteerɔwa ale nye dii ate mi nyɔnɔwa Naawa a weeni la.>> Simei a jam bo ka Jerusalem ate ku beni.

39Alege bena ŋata ale taam la, Simei yɔmma baye yaa jam chali cheŋ Maaka nidoabinni Achis, Gat naawa jigi ate ba weeni sak Simei ayen, <<Fi yɔmma baye ale bo Gat tɛŋka po.>> 40Kude nyiŋ wa yaa jam do wa boniŋka a cheŋ Achis ale bo Gat tɛŋka po la a gisi wa yɔmma. Dila Simei yaa cheŋ ga ta yɔmma a nyini Gat tɛŋka a kuli.

41Solomon ale wom ayen Simei a basi Jerusalem a cheŋ Gat ale ŋmani la, 42wa yaa wi Simei a weeni wa ayen, <<Mi an basi ate fi a pɛ kama Naawen nyiŋ ale kaam fu ayen, <Dai dii danni ate fi a basi dula a cheŋ jigi yoŋ la, fi be seba a chak ayen fi a kpi kama la yaa?> Dila po fi jam weeni mi kama ayen, <Dii ate fi a weeni la a nala kama. Mi ale wom.> 43Ka boa ate fi an ta pɛka ale Naawen a va wanni ate mi a weeni fu la?>>

44Ate naawa a yaa weeni Simei ayen, <<Fi seba kaasuŋku meena ate fi nye mi kowa Deevid la kama. Yɔgyɔgla de Naawen ale pai tuni fu, fi wakaasimaŋa nyiŋ. 45Alege Naab Solomon ale nya niauŋ ate Deevid naam zukpaglika ale kasim boro Naawen niŋ taam wuu.>>

46Naawa a yaa weeni Jeyoiada nidoabinni Benaya ate wa nyini ga nak Simei a lɔnsi a ko wa. Naamu yɔgyɔgla de a yaa zaani paari kama Solomon nisa po.

Currently Selected:

1 Nalima 2: BWU

Highlight

Copy

Compare