1 Nalima 1

1Ase Naab Deevid ale jam kpaŋ ate wa benaŋa a piisi la, tuiluk a kan paari wa, ase ba nin poom pa jaab a pili wa. 2Dila wa tomteerɔma yaa weeni wa ayen, <<Basi ate ti yaali kaliak waai ale kan diem seba nidoa la ate wa a te naawa ŋandiinta abe wa a nya wa zuk, wa baga a duak wa gauŋ kama, ate dila basi ate ti nyɔnɔwa naawa nyiŋka a toliŋ.>> 3Ba yaa jam gisi Izirali tɛŋka po meena ayen ba nya nipokbili naliŋ, ba jam nya ka Abisag ale nyini Sunem tɛŋka la, a ta wa jam te naawa. 4Nipokbinni a jam ŋmasi nala kama, wa jam a nya naawa kama ale tom a te wa alege naawa an jam goa ale wa.

5Adonija waai mawa ale jam chim Yaggit la a yaa ta wadek a nyini niŋ nyiŋ. Adonija yaa weeni ayen, <<Mi ale chim naab.>> Dila wa yaa yaali torokoba ale wusuma a magsi wadek ale nidoaba pisinu ayen ba dɛ wa niŋ. 6Wa kowa an pa wa niŋ a nyoro a bek wa ayen, <<Ka boa ate fi a nye fi le a nye dii nna?>> Wa mɛ a jam ŋmasi nala kama ba jam biak wa ka Absalom ŋaaŋnyiŋ.

7Adonija a jam nye ka nɔiyeŋ ale Zeruiya nidoabinni Joab ale kaabteerɔwa Abiata ate ba maari wa. 8Alege kaabteerɔwa Zadok ale Jeyoiada nidoabinni Benaya ale biisiteerɔwa Natan ale Simei ale Arei ale Deevid nuru baai ale jam a limisi wa la an jam gum Adonija po.

9Adonija yaa jam nye kaabka ale piisa ale niiga ale nabisa sii ale biigi la Zoyelet Tintanni ale moata En Arogel la zuk, wa jam wi wa suataŋa meena kama, naawa nidoabilisaŋa ale Juda nidoama meena baai ale jam ka naamu nisɔm la, 10alege wa an jam wi biisiteerɔwa Natan yaase Benaya yaase nuru baai ale jam a limisi la yaase wa suoku Solomon.

11Natan yaa bek Solomon mawa Batseba ayen, <<Fi an wom ayen Yaggit nidoabinni Adonija a chim ka naab alege ate ti nyɔnɔwa Deevid a zɛ ku nɔi po? 12Basi ate mi sak fu, fi ale fi nye dii a vari fidek nyuvunni ale fi nidoabinni Solomon nyuvunni a basi la. 13Cheŋ ga jo Naab Deevid jigi a bek wa ayen, <Mi nyɔnɔ naaba, fi an puulim ale mi fi tomteerɔwa ayen, <<Fi nidoabinni Solomon ale chim naab mi ŋaaŋnyiŋ abe wa kali mi naam zukpaglika zuk la?>> Be ka boa ate Adonija a chim naaba?> 14Diipo ate fi diem bo dula a biisi ale naawa la, mi ale jam jo a biisi maari dii ate fi a weeni la.>>

15Dila Batseba yaa jam jo wa nya naawa ale kpaŋ la wa dɔkku po, juijui ate Sunem tɛŋka liewa Abisag a jam a nya wa zuk la. 16Batseba yaa koori tɛŋ a kpi duna naawa niŋ. Naawa yaa bek wa ayen, <<Ka boa ate fi a yaali?>>

17Batseba yaa tulisi wa ayen, <<M nyɔnɔ, fidek a puulim ale mi fi tomteerɔwa kama Naawen fi Wenni nyiŋ ayen, <Fi nidoabinni Solomon ale chim naab mi ŋaaŋnyiŋ abe wa kali mi naam zukpaglika zuk.> 18Yɔgyɔgla de Adonija ale chim naab ate fi m nyɔnɔwa naawa a zɛ ku nɔi po. 19Wa nye ka kaab kaai ale zuak ale niiga ale nabiik sii ale biigi la ale piisa a wi naawa nidoabilisaŋa meena ale kaabteerɔwa Abiata ale Joab tugurik tɔŋdɔma kpagni alege an wi fi tomteerɔwa Solomon. 20Mi nyɔnɔ naabaa, Izirali demma meena nina a bo ka fi zuk ayen ba zamsi a nyini fi jigi waai ale wa kali mi nyɔnɔwa naawa zukpaglika zuk ŋaaŋnyiŋ la. 21Kan daa di mi nyɔnɔwa naawa a dan ga kpi, mi ale m nidoabinni Solomon ba le nye ti ase ka nuru gbentisa la.>>

22Ase Batseba ale diem boro a biisi ale naawa la, biisiteerɔwa Natan mɛ a jam jo. 23Ate ba weeni naawa ayen, <<Biisiteerɔwa Natan a bo dela.>> Dila wa yaa jo naawa niŋ a koori a pai nina a vuk tɛŋ a puusi wa.

24Natan a weeni ayen, <<Ka fi m nyɔnɔ naaba ale weeni ayen Adonija a chim naab fi ŋaaŋnyiŋ abe wa kali fi naam zukpaglika zuwa? 25Jinla wa ga nye ka kaab kaai ale zuak ale niiga ale nabii sii ale biigi la ale piisa. Wa wi naawa nidoabilisaŋa meena kama ale tugurik tɔŋdɔma kpagni ale kaabteerɔwa Abiata. Yɔgyɔgla de ba boro a de ale wa ale a nyu ale wa kama nna ale a weeni ayen, <Goa a beni Naab Adonija.> 26Alege mi fi tomteerɔwa ale kaabteerɔwa Zadok ale Jeyoiada nidoabinni Benaya ale fi tomteerɔwa Solomon wa an wi ti. 27Ka wanni de ate mi nyɔnɔwa naawa a nye ale an basi ate wa tomteerɔma a seba waai ale wa kali mi nyɔnɔwa naam zukpaglika zuk la?>>

28Ate Naab Deevid ayen, <<Wi Batseba ate wa jo.>> Dila Batseba yaa jam zaani naawa niŋ.

29Naawa yaa pɛ ayen, <<Ase Naawen ale diem vua la, waai ale da tuesi mi daanika meena po la, 30mi ale nye dii meena ate mi a puulim ale fu, Naawen Izirali Wenni nyiŋla jinla. Fi nidoabinni Solomon ale chim naab mi ŋaaŋnyiŋ ate wa le kali mi naam zukpaglika zuk mi naŋkula po.>>

31Ate Batseba yaa koori tɛŋ a pa zuk su tɛŋ a kpi duna naawa niŋ ayen, <<Mi nyɔnɔwa Naab Deevid a boro taam wuu.>>

32Naab Deevid weeni ayen, <<Ni wi kaabteerɔwa Zadok ale biisiteerɔwa Natan ale Jeyoiada nidoabinni Benaya ate ba jo.>> Ba ale jam naawa niŋ la, 33wa jam weeni ba ayen, <<Ni ta nyɔnɔwa tomteerɔma a va ni ate ni yik Solomon mi nidoabinni ate wa do midek wusumboniŋka a ta wa cheŋ Giyon.#1:33 Wusum ale boniŋ ale jueli chaab a biak wusumboniŋ. Wusumboniŋ dek an baga biagi. Wa ta pagrim a tom tuima yegayega kama. (2 Samuel 18:9; Zakaria 14:12) 34Dula ni basi ate kaabteerɔwa Zadok ale biisiteerɔwa Natan a bobi wa naab Izirali tɛŋka po. Ni peeri damuniŋ a nuem ayen, <Boro a beni Naab Solomon.> 35Ni va wa a cheŋ ate wa kali naam zukpaglika zuk a dɛ naam mi naŋkula po. Mi ale lueri wa ayen wa a nya Izirali ale Juda zuk.>>

36Jeyoiada nidoabinni Benaya yaa tulisi naawa ayen, <<Ku be nye dila, Naawen mi nyɔnɔwa naawa Wenni ale weeni. 37Ase Naawen ale jam bo ale mi nyɔnɔwa naawa diila, dila wa be bo ale Solomon a nye ate wa naam zukpaglika a ta yuei a gaam mi nyɔnɔwa Naab Deevid naam zukpaglika.>>

38Dila kaabteerɔwa Zadok ale Natan biisiteerɔwa Natan ale Jeyoiada nidoabinni Benaya ale Keret demma ale Pelet demma a yaa cheŋ ga yik Solomon ate wa do Naab Deevid wusumboniŋka a ta wa siŋ Giyon. 39Kaabteerɔwa Zadok a yaa pai nyiini ate kpaam a bo di po la a ta nyini viuk weleŋka po a kpiiri Solomon zuk a bobi wa naab. Ba yaa peeri damuniŋka ate nuruma meena a jam nuem ayen, <<Boro a beni Naab Solomon.>> 40Nuruma meena yaa jam va wa ŋaaŋ a peeri paampuuŋta ale mariŋka nna yegayega ate dila a basi ate tɛŋka a jam choa ale nuemka.

41Adonija ale nichamma meena baai ale jam bo ale wa la a wom ka wari diipo ate ba boro a nueri ba tigini la. Ba ale wom damuniŋka kumsaŋa la, Joab yaa bek ayen, <<Nuemka de meena tɛŋ kpieŋka po kiri ale boa?>>

42Wa ale diem boro a biisi la, kaabteerɔwa Abiata nidoabinni Jonatan a deri jam. Adonija yaa weeni ayen, <<Jo jam. Nuru maŋ ase fi la a ta ka wapaala cheena.>>

43Jonatan yaa tulisi ayen, <<Aaya, daa dila. Ti nyɔnɔwa Naab Deevid a bobi ka Solomon naab. 44Naawa a jam tom ka kaabteerɔwa Zadok ale biisiteerɔwa Natan ale Jeyoiada nidoabinni Benaya ale Keret demma ale Pelet demma a va wa a cheŋ a yik wa a ate wa do naawa wusumboniŋka, 45ate kaabteerɔwa Zadok ale biisiteerɔwa Natan a kpiiri kpaam wa zuk a bobi wa naab Giyon tɛŋka po. A nyini dula ba jam a pak wa kama ate tɛŋ kpieŋka a ŋmasi nuem a gum du. Nuem kala ate fi a wom la. 46Solomon a jam kali wa naam zukpaglika zuk kama, naab yeri naam zukpaglika zuk. 47Naab yeri kpaŋŋa mɛ yaa jam ba te Naab Deevid jiam ale weeni ayen, <Fi Wenni a basi ate Solomon yuenni a yiti a gaam fi yuenni, abe wa naam zukpaglika a zuak a gaam fi naam zukpaglika.> Ate naawa a yaa koori tɛŋ gaduokku zuk a puusi 48ayen, <Pimpauk a cheŋ Naawen, Izirali Wenni jigi, waai ale basi ate mi nina a nya waai ale wa kali mi naam zukpaglika zuk jinla la.> >>

49Kude nyiŋ, Adonija nichamma meena yɔgsum yaa yik ba ate ba waaŋ chaab. 50Adonija ale jam a chali Solomon yɔgsum la nyiŋ wa yaa cheŋ ga yik kuŋkuŋku nyiilaŋa giŋgiŋ. 51Ba yaa weeni Solomon ayen, <<Adonija a chali ka Naab Solomon yɔgsum a ga kpari maŋ kuŋkuŋku nyiilaŋa. Wa weeni ayen, <Naab Solomon a pɛ ale mu jinla ayen wa kan ko wa tomteerɔwa.> >>

52Solomon a tulisi ayen, <<Ase wa dan sak wadek ase nuru maŋ la wa zuik a kan lo tɛŋŋa, alege mi a dan nya biem wa po, wa le kpi.>> 53Naab Solomon yaa tom nuruba ate ba ta wa a nyini kuŋkuŋku zuk a siŋ. Ate Adonija yaa jam a koori tɛŋ a te Naab Solomon, ate Solomon ayen, <<Kuli fi yenni.>>

Currently Selected:

1 Nalima 1: BWU

Highlight

Copy

Compare