1 Korinti 12

1M suata, yɔgyɔgla de mi a yaali ayen m weeni ka tiirim tii ale a nyini Wen Chiika jigi la wie. M be a yaali kama ayen ni seba wensieŋa meena a magsi chaab ale tiiritaŋa de. 2Nama abe zɛ ayen ni ale jam kan ta siaka ale Wen la, ni jam bɛ suiku kama ale ni ale a kaab bɔgta ate ti ka nyuvuri la. 3Mi a yaali ayen ni seba ayen nuru waai ate Wen Chiika a bo ale wa la an baga a ka a te Yeezu. Nuru waai abe m baga a weeni ayen Yeezu ka Naawen ya, ka Wen Chiika a nin te wa suik.

4Chiika tiiritaŋa ka nna tɔgatɔga, alege ka Chiik yeŋka ale a te. 5Suita tɔgatɔga ate nuruba a tom ba tuimaŋa alege ka Naawen yeŋka la ate ba tom a te wa. 6Sebika ka tɔgatɔga ate nuruba a tom a te Naawen alege ka Naawen ale a te sebi kala waai meena ate ba a tom a te wa. 7Wen abe basi kama ate wari a bo nuru meena wanyi wanyi jigi a sak ayen Chiika a bo ale kula nyɔnɔ kama ayen wa a maari Kirisita bisaŋa meena. 8Wen Chiika a te waai yam. Chiik yeŋka mɛ a te waai sebika. 9Chiik yeŋka la mɛ ale te waai siaka. Ale a te waai mɛ tebika. 10Chiika a te waai mɛ wakperikaliisa pagrim. A basi ate waai a tuesi biik Wen jigi a biisi a te. A basi ate waai mɛ a gaari chiisa tɔgatɔga. A basi ate waai mɛ a baga a biisi bichaŋsa, a basi ate waai mɛ a weeni bichaŋsa kie. 11Alege ka chiik yeŋ kala dek ale a tom dila meena, ka ale a yaali diila. Ka a te waai meena tiirimu ka tɔgatɔga.

12Yeezu Kirisita a nye ase ka nurubiik nyiŋ ale ka diila alege ta kabta tɔgatɔga. Ka ta ka kabta tɔgatɔga alege be ka nyiŋ yeŋ ka la. 13Ku be ka dila tama jigi, ti ka Juuba yoo, ti daa Juuba yoo, yɔm yaase daa yɔm yoo ti maa chaab tuesi ka so yeŋ ale chiik yeŋka. Wen abe basi ate ka chiik kala a bo ti suiniimaŋa po.

14Diila nyiŋka dek daa kauk yeoŋŋoa alege ka kabta yegayega. 15Ase naŋtuoku dan weeni ayen ku ale kan daa nisa la nyiŋ, ku maa daa nyiŋka po, kula a kan basi ate ku kan maara chim nyiŋka po. 16Ase tuini a dan weeni, ayen, di ale kan daa num la, di maa daa nyiŋka po, kula a kan basi ate di kan maara chim nyiŋka po. 17Ase nyiŋka meena daam dan ka num, bu le nye ka sɛ a wom? Ka daam abe dan ka tuiri, di nye ka sɛ a wom nyummoa? 18Ku be le ka diila, Wen a nye nyiŋka kama ate ka ta kabta tɔgatɔga ase wadek ale a yaali diila. 19Dila la, nyiŋ be ti karo ase ka a nin ka kauk yeoŋ nyiini. 20Ku be le ka diila, kabtaŋa a piisi kama alege ka nyiŋ yeŋka la. 21Dila nyiŋla, nummu a kan baga a weeni nisaŋa, ayen bu kan yaali si. Yaase zukku a baga a weeni naŋsaŋa ayen ku kan yaali si. 22Nyiŋka kab tii ate tama a poli ayen kab tila a wobsa la a dan kan karo ti kan baga a nye wari ya. 23Kab tii mɛ ate ti a poli ayen kab tila a ka tuilum la, ti ŋmasi a nya kab tila kama nalimnyiini, ale kab tii mɛ ale kan nala nina po, ti kpesi a nya kab tila kama nalimnyiini. 24Kab tila mɛ, kab tii ale nala la a kan yaali. Wen dek abe le nye nyiŋka diila, wa nye kama ayen tama ale a poli ayen kab tii ka tuilum la a nya zula. 25Wen abe nye kude kama ayen nyiŋka kabta tɔgatɔga a kan poori chaaba alege a nye magsi a boro. 26Ase nyiŋ kauk kunyi a daa nam, kab yontaŋa mɛ a maara a nam kama. Kauk kunyi a dan nya zula kab yontaŋa mɛ maara nya ka masim.

27Ni meena abe a nye ase ka Yeezu nyiŋka la, ni meena wanyi wanyi abe ka wa nyiŋka kabta. 28Kirisita bisaŋa po Wen a te waai meena wa tomka jigi kama. Wa piilim ale ka tuimtomdɔba, a pai saŋ biisiteerɔba, butawa sagrɔba. A yaa pai saŋ wakperikaliisa, a pai saŋ tebika tiirita, a pai saŋ maarɔba, a pai saŋ niŋdeerɔba, a pai saŋ baai ale a biisi bichaŋsa la. 29Ba meena daa tuimtomdɔba yaase biisiteerɔba yaase sagrɔba yaase baai ale a tom wakperikaliisa. 30Ba meena ka tebika tiirita yaase ba a biisi bichaŋsa yaase ba a weeni bi chaŋsa kie. 31Ni be pii nyiŋ ate ni nya tiirim tii ale ta tuilum la. M be le sak ni suimaŋka dek ni ale ni nye diila.

Currently Selected:

1 Korinti 12: BWU

Highlight

Copy

Compare