Gokhini 8

Wâ Njyə̀ bəh mihì le a gokhena

1À ndùku mô te Wâ Njyə̀ bə̀ha le ale, na wu nê hi mô sàmba, luktu china kə nyə̂ ni moŋ hi tàn a bəh a mbɨŋlu. 2Mu yen anjèlsu Fùyènsu se sàmba a su time a Yènfù ashyə̂ ma ghɨ ti fo soŋtu ha ghɨna sàmba. 3Anjèl à Fùyèn yìlè ben timi ashyə̂ a baŋ a yi fo, kəta kaŋ ghe a ghɨ nyôkà leŋi atɨ̂n ma ghɨ fate nì gûl. Ghɨ fo leŋi ha wûn yi dô kə ni na wù nyok à bakhe a jə̂m tu ghɨt a Fùyènà, ma wù fo te yi fô a tô baŋ a yi fo afa a ghɨ mô ashyə kpòk wu tù fə̀nù, baŋ atɨ̂na mô ma ghɨ fate nì gûl. 4Anjèl àtɨ̂n nyok leŋi tɨni atɨ̂n à kaŋ afû, lɨkfu tɨnfu chîntì nì jə̂m tu ghɨt a Fùyènà hì fwo kwoka a Yènfù ashyə̂. 5Anjèl à Fùyèn ye lyi kaŋ a yi leŋ ghe chuf wusu a bâŋ a yi fo afâ lem wu lun atɨ̂n, wù suh chwohi a chyə̂, kə wu yu, wuli hì wamâ, bwatê, ghɨ ywo jyesu, luktu senâ.

Ghɨ toŋ tusoŋ

6Anjèlsu Fùyèn se sàmba a su ndùku kəta soŋ te sàmba hì fate wu wun hi toŋ a soŋtu tɨntu.

7Anjèl à Fùyèn yì shyə̂ toŋ yi soŋ yi wuni, temù nì wusu yîmì hi chwo a chyə̂ ma ghɨ ti fwəh nì luŋû. Mwə̀ mù tɨ̂n chwo ni, nyok bâh à chyə ale atɨ̂n à bàh wù tât, wù fî ni kəbi yâ nì kàkû fî nyok bâh à mòk a wù bàh tât, nì wəlânù nâ wù jɨ̀m.

8Kùmtê à anjèl à Fùyèn toŋ yi soŋ yi wuni, ghɨ mak shyə a jwô yì chìk, ghɨ mô ni te kun yì chìk a yì bame, 9bâh à jwô ale atɨ̂n à wù bàh afa wù tât wu kahi ha mu luŋ, mwə̀ mù jɨ̀m me a mù mò fùtɨ̂n àtɨ̂n kputî, ngwùksù boŋ bef afû, a nôn à mòk atɨ̂n à nòn afa wù tât a jwô yì chìk.

10Kùmtê a anjèl à Fùyèn yìlè toŋ yi soŋ yi wuni, njên fu chik fu lefu lo a nyə̂ chem chwo a chyə̂, bana kə ni te tôs. Fu chem fî baŋ bâh a jwô à mòk atɨ̂n à bàh wù tât, baŋ bûk wù mòlû bâh à mòk atɨ̂n à bàh wù tât. 11Yet yi fu njèn mi fe mô “Yi lwî.” Bâh wu jwô mu we kahi hì lwê kə ni. Ghɨt a dona ghe a ghɨ nyo mòlû mù tɨ̂n kputî beka mù ndùku lwê.

12Anjèl à Fùyèn yìlè toŋ yi soŋ yi wuni na à hi mô anjèl sù kìk. Shyə le kun bâh à yuchwî ale nì bâh à njoŋ ale, kəbi nì njèn mùlè, yê nâbi afa, finhe bâh à ban à mòk atɨ̂n à bâh wù tât. Chwì hì fê bana wi a mbɨŋlu sù kìk. Njoŋ ghê njènû hì fê bana wi a bɨŋlu sù kìk.

13Mu lohi a tû shihi ke a nyə̂ yen mbùk à wum yi fela chyâ nâ a nyə̂, jyê nâ a jyə̂ yì tâ na, “Wonê, wonê! Anjèlsu le sê sù tat toŋ soŋtu, ngə̂k yì chìk yìlè ben ha ghɨt ghe a ghɨ chyə a mbyî, bəma kə ni.”

Currently Selected:

Gokhini 8: bmv

Highlight

Copy

Compare