Gokhini 7

Ghɨt a Isalì ghe kamsu wu wə nì ghɨta kamsu mkìk njwòsù kìk a ghɨ tì le

1A yi bàm atɨ̂n, mu yen anjèlsu Fùyènsu sù kìk, su mô a tu bûlà tu mbyi tù kìk. Anjèlsu tɨnsu ndùku mô ma su ti khɨti fufa na kə ghɨ hi chyâlà a mbyî makə a jwô makə hi nèkhè fukâk. 2Mu fî yen anjèl à Fùyèn yìlè yi kəta a le Fùyèn fe a fu chyə a wun a wô. Yi fwo bênà lumu a bàh afa yuchwî sata. Yì bwat nâ a jyə̂ yì tâ ha anjèlsu Fùyèn se sù kìk a Yènfù tì fo jyaka ha sinsu na su hi bobhe mbyî kəbi nì jwò yì chìk yâ 3jis na, “Kə ghàn bobhi mbyî makə jwò makə mu kâk bu na ghàh lem chwe a ghɨta yulu shyə ghe a ghɨ fêtà ha Yènfù ghàhnà fu.” 4Mu yu te ghɨ fokti ghɨt ghe ghɨ lema chwèna. Ghɨna ndùku mô ghɨt kamsu wu wə nì ghɨt kamsu mkìk njwòsù kìk, ma ghɨ fwo a sah a nda ghɨt a Isalì njwòsù bà. 5Ghɨ fwu kamsu njwòsù bà a yi sah yi nda Judà, fwu kamsu njwòsù bà a yi sah yi nda Lubèn, fwu kamsu njwòsù bà a yi sah yi nda Gâd. 6Ghɨ fwu kəbi kamsu njwòsù bà a yi sah yi nda Ashà, fwu kamsu njwòsù bà a yi sah yi nda Naftalì, fwu kamsu njwòsù bà a yi sah yi nda Mànasì, 7ghɨ fwu kamsu njwòsù bà a yi sah yi nda Simùn, fwu kamsu njwòsù bà a yi sah yi nda Lefì, fwu kamsu njwòsù bà a yi sah yi nda Ìshakà, 8fwu kamsu njwòsù bà a yi sah yi nda Sebulòn, fwu kamsu njwòsù bà a yi sah yi nda Josèf, fî fwu kamsu njwòsù bà a yi sah yi nda Benjamìn.

Nôn a ghɨt a chika ale

9Yi bàm atɨ̂n, mu yen a nôn a ghɨt ale, ghɨ bu hi taŋa mìhì, ghɨt atɨ̂na kəta kə tu kə̂k tù jɨ̀m ma ghɨ fwu ben kə a sah a nda à jɨ̀m, ghɨ fî fwu kə tu lak tù jɨ̀m, jîsà kə tu jîs tù jɨ̀m. Ghɨna mô ma ghɨ time ashyə wù kpòk wu tù fə̂n wù Wâ Njyə̀ ashyə̂. Ghɨna ndùku mô ma ghɨ ti mak njumù fufamù, ma ghɨna ti khɨti châlànù a ghɨna wu wô, 10ghɨna hì bwata nâ nì jyə̀ yì tâ jîsà na, “A bònhi Yènfù ghàhnà fù fe fu mô wu kpòk wu tù fə̀nù ghê Wâ Njyə̀ ghàhnà!” 11Anjèlsu Fùyèn sù jɨ̀m timi jɨŋ kat kpok wu tù fə̀nù we, ghɨ fi jɨŋ kat chəh sê kəbi nì mwə̀ mù yòhna me mù kìk, mù fen kuhi kə̂k tu ghɨna tu hì kokhe Fùyèn, 12jîsà na, “Àmèn, bəmhînì yen ha Yènfù ghàhnà fu nì kokhînì nì yòŋnà nì ngumlînì. Fu kəta jyaka nì tofu a yû mù jɨ̀m! Àmèn.” 13Chəh yìlè buf ha mu nâ, mu khəlò ghɨt mɨ ghɨ̂n a ghɨ maka njumù fufamù ni agha, nì luk we a ghɨna fwo atɨ̂n agha? 14Mu fîsì ha wun na, “Mu khə wi a Bèbɨn, fòkti ha mu.” Wu ki jîs ha mu na, “Ghɨna mò a ghɨt ghe a ghɨ tohne atɨ̂n à ngə̂k yì bəmana afâ. Ghɨna ti sû njumù ghɨna nì luŋ mù Wâ Njyə̀, mù hì fufa kə ni. 15A ni gha ye a ghɨna time ashyə̂ kpòk wu fə̀n wù Fùyènù, fêtà ha funfu nchwì nì ntuksu a wun a ndâ. Wùt we a wù mò wu kpòk wu tù fə̀nù mô ghê ghɨna, khɨ̂ŋtè ghɨna, 16ma jìŋ bê tê fè yafa jə̀ ghɨna, ma kuŋ à mòlû bê tê fè yima ghɨna. Ma ghɨna bê tê fè ywo Chwì makə luktu luma tu, 17beka Wâ Njyə̀ we a wù mò atɨ̂n à wu lùk wu tù fə̀nù hì kinelò ghɨna. Wù nè lyê yênà nì ghɨna wu lùk afa jwosu yutesu mò fo chyə ye a yì bè mê wi, ma Yènfù yâhà mihi semù ghɨna.”

Currently Selected:

Gokhini 7: bmv

Highlight

Copy

Compare