Gokhini 6

Luktu le we

1À ndùku mô kə wu yu mefû, mu yen te Wâ Njyə̀ we bə̀ha le ghɨ ashyə a fùtɨ̂n à wule afa sàmba. Mu yu te shyə a yohna ale atɨ̂n à mwə̀ mù yòhna mù afa mù kìk bwata ni te wuli, jis na, “Fwu bî!” 2Mu shihi kî, yen nyàm à kwaŋ yì fufana yìlè, wùt mô a tô atɨ̂n kəta fù chyâk. Ghɨ fo a fot a tu fə̀nù ha wûn, wu nyɨŋ fwu te wut a wù yusa tuma woŋi, yə kə yi yə̂, mô hi fè hi tum hi yə̂.

3Wâ Njyə̀ we fî bəh a le ale nâbi wùni yu, mu fî yu te kùmti a shyə̀ a yohna ale atɨ̂n a mwə̀ afa mù kìk jìsa na, “Fwu bî!” 4Nyàm à kwaŋ yìlè fî fwû, bâŋà kə ni. Ghɨ fo jyaka ha wùt we wù ndùku mô a tô àtɨ̂n, fî fo yi fâ yi gbɨ̀liŋi, yi dâfà kə ni, na wù lohi woŋi a mbyî, ma ghɨta hi ywite wana ne.

5À ndùku mô te wù fe bəha a le na wu hi mô wù tât, mu fî yu te shyə a yohna ale fè jîsà kə na, “Fwu bî!” Mu yen nyàm à kwaŋ yì finana, ma wùt we a wù nyiŋa a tô àtɨ̂n ti khɨti mwə̀ me a ghɨ fêkà jit yi mwə̀li atɨ̂n, mù bà a wun a wô. 6Mu yu jyə̀, yi kwô ni te jyə̀ wùt atɨ̂n à mwə̀ afa mù kìk, yi jìsà na, “Ka fèt wu tuk wu fublù kpene kə hi yun kilù wît yì mòk makə hi yun kilù a belì sù tât. Biyani kə wò kum gutû nì lùkû!”

7Wâ Njyə̀ àtɨ̂n bəh a le ale na wu hi mô wù kìk. Mu yu te shyə a yohna a gokhena jìsa na, “Fwu bî!” 8Mu kî, yen nyàm à kwaŋ yìlè yi ndyaŋte mô kə ni. Yet yi wùt we a wu ndùku nyiŋa a tô àtɨ̂n mô yi Kpû. À mô yâ Lak yi ghɨt a kpona jûmtè wûn. Ghɨ fo jyaka na mwə̀ mu munâ jyati chyə bâh wù kìk, ma lyi bâh à mòk ma ywiti ghɨt ghe a ghɨ mô atɨ̂n. Ghɨ ywiti ghɨt atɨ̂na nì fâ yi gbɨ̀liŋi. Ghɨta kputî kum jɨŋ yì be nì yaftu kana tu. Nyamsu be se a su mô a chyə̂ ywiti ghɨt ale.

9Wâ Njyə̀ we bəh a le ale na wu hi mô wù tân, kə wu yu, mu yen yohnù ghɨt ghe a ghɨ tì ywite njwo ghɨna ndùku fôktè gha yi Fùyèn fê mô te sù bɨ̀n à sak kum gha Fùyènì. Wu ndùku mô yi sah à baŋ a yi fo. 10Yohnà tɨnu bwat nâ nì jyə̀ yì tâ na, “Bâba, wò kəta kə jyak à jɨ̀m, yulê, fê jîsà kə hamok! Wò nè mô tânà yàni shyəma wò sak ghɨt ghɨ̂n a chyə̂, hi fo ngə̂k ha ghɨna te ghɨna tì boŋa ywiti ghàh agha?” 11Ghɨ fo njusu fufasu na yohnù tɨnu mak jis na, wu motè kə fùjiti hi tàn shyəma ghɨt atɨ̂na nê ywiti mihi wana ne ghɨna ghe a ghɨna ndùku mô hi ywitî, ma kwok à kpên.

12Wâ Njyə̀ we hì bəhà bê nì le ale ni na wu nê hi mô tufa nâbi yini, mu yen kùn yì bəmana te yì sena, fî yen te yuchwî kaha hì fina kə te fùchî, njoŋ kahi hì bâŋà ni te mu luŋ, 13njènû hì chemle a chyə̂ kə ni te tamu fikù a wu yata mbɨ̀ŋ teka wu baŋ, a wu yu afa fufa ta shìkà. 14Nyə̂ ngabli kə ni te ŋwàklù a wu yu afa ghɨ lɨma, samilò, kunsu chiksu sù jɨ̀m nì luk te a tu mô atɨ̂n à jwò samî a tu lùk afa su ndùku mô atɨ̂n. 15Fə̂ntu mbyî tu nì ghɨt a tihena nì tu sù sojà nì ghɨt a chika nì ghɨt ghe a ghɨ kəta jyaka, nâ nì ghɨt ale ghɨ̂n à jɨ̀m, makə wu kwôs, makə ghɨt ghe a ghɨ kəta ngɨŋsu ghɨnasu, tet lyi let a tu tə̀n, nì kəbi sah à a tu wo afa a tu ndùku mô a sù kùn, 16hì bwata jîsà ha kunsu nì wotu na, “Ghàn fen a ghàh a tû ma let ghàh kə wùt we a wù mò wu kpòk wu tù fə̀nù yen ghàh, Wâ Njyə̀ fê fo ngə̂k ha ghàh beka wu lâ wu baŋanu. 17Yi mô kə nâ hamok na tuk wu chiku we a ghɨna chwùtè lâ wu baŋanu atɨ̂n ti kpên, nâ wùt wù mòk bu hi têt.”

Currently Selected:

Gokhini 6: bmv

Highlight

Copy

Compare