Gokhini 5
5
Wâ Jyə̀ fwo a nyə̂
1Mu fî yen we a wù ndùku mô wu kpòk wu tu fə̀nù yâ, ma wù ti khɨti buk yi ŋwàklù a wun a kpen wu wo ta, ma ghɨ ti nyak atɨ̂n kə bâh wù jɨ̀m. À ndùku mô ni ma ghɨ ti le jwo tɨni nì le, luktu sàmba. 2Mu yen anjèl à Fùyèn yì chìk yìlè yi kəta a jyak, yì bwat jis na, “À mò nâ nde a wù kokne kpene hi bə̀h a le ghɨ̂n hi yèntì a ŋwàklù yìna agha?” 3Biyani wùt hì bu a nyə̂, bu a chyə̂, bu yi lak yi ghɨt a kputena a wù ndùku mô hi bə̀h à ŋwàklù àtɨ̂n hi ke yen gha ye a yi mô a fùtɨ̂n àtɨ̂n. 4Mu jî nâ haŋaŋ beka wùt ndùku kpene wi hi bə̀h a ŋwàklù atɨ̂n makə hi yena gha ye a yi mô a fùtɨ̂n àtɨ̂n. 5Chəh yìlè ki jîs ha mu na kə mu fi jî beka bìkəm yì sah yi nda Judà, a mô wan a yi sah yi nda Defìt ti no yə̂, hì mô hi bə̀htì a le mu ghê a tu lùk afû sàmba hi yèntì ŋwàklù àtɨ̂n.
6Mu yen Wâ Njyə̀ wu mò wu lùk afa a kpok wu tu fə̀nù mu we ndùku mô atɨ̂n, ma mwə̀ mù yòhna me mù kìk nì chəh se mbà jwòsù kìk a su jɨŋa kata Wâ Njyə̀. À mô ni Wâ Njyə̀ àtɨ̂n kə̂kà te ghɨ ti sê. Yi kəta sesu sàmba nì se sàmba, a mô yohnù Fùyènà sàmba te ghɨ tuma kə mbyî yì jɨ̀m. 7Wâ Njyə̀ atɨ̂n yen fyi ŋwàklù àtɨ̂n a wùt we a wô a wù ndòko a wu kpòk wu tu fə̀nù yâ. 8Kə wu yu te wù fye bena ni, mwə̀ mù yòhna mê mù kìk nì chəh se mbà njwòsù kìk fen a wun ashyə̂. Nâbi nde hì kəta yi luŋ nì kaŋa ma ghɨ fate nì gûl, nì leŋi atɨ̂n ma yi ti lûn. Leŋi tɨni ndùku mô jə̂m tu ghɨt a Fùyènà. 9Ghɨna fî yem njàŋ yì fê, yi jîsà na:
“Wò kpenalò hi fye ŋwàklù yìna, hi bə̀htì a le ghe a ghɨ mô atɨ̂n,
beka ghɨ tì ywi wò, wò yun wu tu ghɨ̂t tù
ma ghɨ fwu ben kə a sah a ndâ à jɨ̀m, jîsà tu jîs kə tù jɨ̀m,
a mô à ghɨ̂t a tu lak tù jɨ̀m a mbyî, kə̂kà kə tù kə̂k tù jɨ̀m.
Wò yun wu tu ghɨna nì luŋ mâ,
wò kahi fo ghɨna ha Yènfù.
10Wò ti nî na ghɨna hì mô yi sah yi nda ngàŋsù ndâ Fùyènsu, fê mô wana toka ha Yènfù ghàhnà fù.
Ghɨna bê hi saka mbyî yìna.”
11Mu shihi kî, yen anjèlsù Fùyènsu, su dô chyâ kamsu, ghɨ bu hi taŋa khɨlî, te su time jɨŋa kata kpok wu tu fə̀nù wê, bakhe nì mwə̀ mù yòhna mù me mù kìk nì chəh sê. 12Ghɨna yema njàŋ nâ a jyə̂ yì tâ, jîsà na:
“Wâ Njyə̀ we a ghɨ tì ywe kəta a jyak
nì ghaki nì tofu nì ngumlînì nì ngaŋtînì, yi kpenê.
Ghɨ kəta hi tè ngumle wûn,
fo kokhînì ha wûn, fê bəmhe wûn!”
13Mu ywo nâbi ghə ghe a ghɨ mô a nyə̂ nì a chyə̂ nì yi lak yi ghɨt a kputena nì a jwò yì chìk nâ nì mbyî yì jɨ̀m, yema njàŋ jîsà na:
“Ha wûn we a wù mò wu kpòk wu tu fə̀nù mô kəbi Wâ Njyə̀,
ghɨ kəta hi tè bəmhe wûn fê ngumle wûn,
fo kokhînì ha wûn nì jyaka a yu mù jɨ̀m!”
14Mwə̀ mù yòhna mù me mù kìk fîsì na, Àmèn! Chəh se fen a chyə̂ hì ngumle Yènfù ghê Wâ Njyə̀.
Currently Selected:
Gokhini 5: bmv
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc.
