Gokhini 14

Wâ Njyə̀ ghe ghɨt a wuna

1Yi bàm atɨ̂n, mu yen Wâ Njyə̀ wu mô a kun à Sayòn ghê ghɨt a wuna kam wu wə nì ghɨta kam mkìk, njwòsù kìk. Ghɨna mô ma ghɨ ti nyak yet yi wuni nì yet yi Bè wuni a ghɨna yulu shyə. 2Mu yu jyə̀ te yì fwo bênà a nyə̂, kwô te yi fena, yi ghaka kə ni fê bwatê te wuli. Jyə̀ mi ye ndùku kwô kəbi te tu luŋ te ghɨta ndùku buka. 3Ghɨt mu ghe kamsu wu wə nì ghɨta kamsu mkìk, njwòsù kìk hì yema njàŋ yì fê yìlè wùt bu hi yikî hi yêm, a bu kə ghɨna ghe ghɨ ndùku mô ma ghɨ ti yun tu ghɨna a mbyî. Ghɨna hì yema njàŋ a kpòk mù tù fə̀n ashyə̂, mwə̀ mù yòhna me mù kìk nì chəhsu mô kəbi afû. 4Ghɨt mɨ ghɨ̂n ndùku mô ghe a ghɨ tì lèma ngɨŋsu ghɨna su nì yulînì, teka ghɨna yê timè chyə nì wùt ywên. A mô ghɨna ghe a ghɨ jûmtè Wâ Njyə̀ nâbi afa te wù yènà, a fê mô ghɨna ghe a ghɨ tì bònhe shyəma ghɨna hi mô ni te tamu shyə ha Yènfù ghê Wâ Njyə̀. 5Ghɨna tà timi wam jə fəmi, ghɨna ndùku kəta wi njahi.

Anjèlsù Fùyènsu sù tât

6Yi bàm yi tɨ̂n, mu fî yen anjèl à Fùyèn yìlè te yì fela chyâ nâ a nyə̂, kəta tum yì jùŋ ye a yì tì faŋa hamok, hi fòktì ha ghɨt ghe a ghɨ mô a mbyî. Yì ndùku mô hi fòktì ha ghɨta a tu lak tù jɨ̀m nì ghɨta a sah a nda à jɨ̀m, ghɨ jîsà kə tu jîs tù jɨ̀m, kəta kə tu kə̂k tù jɨ̀m. 7Anjèl àtɨ̂n bwat jis nâ a jyə̂ yì tâ na, “Ghàn hi fânà Yènfù fê kokhe funfu beka yu ti kpên shyəma fu sak ghɨta. Ghàn hi ngumle funfu fe a fu fate nyə̂ nì chyə nì jwò yì chìk nì toktu.” 8Kùmtê anjèl à Fùyèn yìlè fî fwu a nyə̂ bwat jis na, “Babilòn, tèk yi chik ye ti fên, yi ti fên. A mô yìna ye a yi ne na lak tu jûmtè nyu lùk mù tâ, a me a mù nè na ghɨta hi kôŋà hi tè chyə chyəna tu fiŋa.”

9Anjèl à Fùyèn yìlè fî bên, na à hi mô sù tât bwat jis nâ nì jyə̀ yì tâ na, “Nâbi nde we a wù ngumle nyàm mi yê nì fə̀khè ghe a ghɨ fate, ghɨ fune nyàm àtɨ̂n, ma ghɨ ti lem chwena a wun a yulu shyə makə wu kpên, 10nè yenalò lâ baŋanu wu Fùyènù. Wu mô ni te lùkû mù tâ teka ghɨ fwəh nì shyə ale. Nâbi nde we a wù ne gha mi yìna kəta ngə̂k wu wùs ma ghɨ ti lem nkànû atɨ̂n, wu hì bame anjèlsu Fùyènsu yulesu ashyə̂, anjèlsu tɨnsu mô ghê Wâ Njyə̀. 11Lɨkfu wùs fe a ghɨna bè hì yena ngə̂k a fùtɨ̂n àtɨ̂n bè hì kwoka kə yi kwôk a nyə̂ gokhini bu. Ghɨt ghɨ̂n a ghɨ ngumle nyàm àtɨ̂n makə a fə̀khè tɨna, kəta chwena ye a ghɨ lema kum yìna yâ, bè hì kəta wijə yutìnì nâbi nchwì makə ntuksu.”

12Gha mi yìna ni chwùtè na ghɨt a Fùyènà kəta hi tè wunhî. A mô ghɨna ghe a ghɨ lêmà saktu Fùyèn tù fî bimi ha Jisòs.

13Mu fî yu jyə̀ te yì bènà a nyə̂ jîsà na, “Nyàk gha yìna ni na, Hi yìmì chîn nì hi yèn ashyə̂, saŋlînì hì mô nâbi ha nde we a wù shihi kpû, jûmtè Bâba!” Yohnà Yulena fî fîsì kə na, “Hamok, saŋlînì mò ha ghɨna. Ghɨna nè yutèlò a ghɨna sù ngə̂k beka Yènfù nè mâktèlò ghɨna yi fèt yi jûŋì.”

Yi kpî a mbyî

14Yi bàm atɨ̂n, mu yen bàk yi fufâ, wùt mô fùtɨ̂n àtɨ̂n, kə̂kà te Wâ Wùt ma wù ti so fota tù fə̀nà a wun a tû, ma ghɨ fate nì gûl. Wu kəta fùnywi a wun a wô, fu tofa kə ni. 15Anjèl à Fùyèn yìlè fwu ben a ndâ Fùyèn toŋa jis nâ nì jyə̀ yì tâ ha wùt we a wù mò a tô bàk afâ na, “Lyì nywi fa fê ma wò hi kpê mwə̀ mù mbyî atɨ̂n beka yu ti kpên, mwə̀lû a mbyî ti kpên hi kpì.” 16Ni, wùt we a wù ndùku mô fùtɨ̂n à bàk afâ kpi nâbi ghə te ghɨ mô a mbyî nì nywi mi fê.

17Mu fî yen te anjèl à Fùyèn yìlè fwo bênà a ndâ Fùyèn a nyə̂ kəta kəbi nywi fu fùk fù, fu tofa kə ni.

18Yi bàm atɨ̂n, mu fî yen anjèl à Fùyèn ye a yì kəta jyaka kum wusu ma yì lo a baŋ a yi fo. Yi toŋa jìsà nâ nì jyə̀ yì tâ ha anjèl à Fùyèn ye a yì kəta nywi fu tofa fê na, “Lyì nywi fa fê ma wò kpi tam mù gilèb me a mù mò a mu fùk yâ a mbyî ni beka mù ti bâŋ.” 19Ni, anjèl à Fùyèn àtɨ̂n jɨŋ chwohi nì nywi fu tɨn fu a mbyî, kpi tamu atɨ̂n a mù fùk, lem chwohe yi be shyəma ghɨ jeli kə a lum afa a Yènfù bè chwùtè lâ wunu wu baŋanu atɨ̂n ha ghɨta. 20Ghɨ tì fwu yi tèk shyəma ghɨ jêlì nyati tam mù atɨ̂n. Te ghɨ jele ni, luŋû fwo tamu tɨnu hì mô a chyə̂ kwoka chema khɨŋ à bà, ghaka tânà mihè mâl yi ghə yì bà.

Currently Selected:

Gokhini 14: bmv

Highlight

Copy

Compare