Jêms 5

Kɨni ha ghɨt a chika

1Ghàn ghɨt a chika, ghàn yuti! Ghàn hi bwata jyê nâ haŋaŋ beka ngə̂k yì chìk bènàlò ha ghàn. 2Mwə̀ munâ a ghàn kəta ni, mù bè befa ləhnè kə halô. Sekuseku bè kutalò nju sanisu. 3Ka mânù mê ghɨ fate nì gûl nì silfà ni, bè bâŋàlò. Ka mu wûn bè bâŋàlò ma wu chwùtè mihi sah yani wu tuk afa Yènfù bè saka ghàn beka wu bè bâŋà ni ma wu fê kahè hi kuta njà sanisu wùnsu ni te wu wus. Yì ni chwùtè na ka munâ a ghàn tuka lêmà a mu tuk mu gòkhemù afân bè bɨlà bê lô nì ngə̂k ha ghàn. 4Ghɨta ti fêt a ghàn a mu fùk, ghàn faŋ hi làk à ghɨna, ghɨna ghɨ hì jyê ha Yènfù. Bâba bè jyak à jɨ̀m ti yu, chin te ghɨt ghê ghɨ che kpe mwə̀ mânù jyè. 5Yu ti kpên shyəma ghɨ seti ghàn! Ghàn ti yə wun yani a chyə afân ni hì ghakle te sù nyâm te ghɨ yəhe hi sê. 6Ghàn ti bobhi ghɨta fî ywiti ghɨta kə halô, teka ghɨna bobhi gha yile, ghɨna nô wijə ghàn.

Wunhînì nì Jə̂mì

7Ghàn hi wunhe kə yi wunhî wana noma hi tàn wu tuk afa Bâba bè kaha bênà. Ba ghàn khəlò te wùt fètà fûkà wu yomilò, wu hi wunhe kə yi wunhî hi bè tàn shyəma bɨ̀ŋ chu, ma mwə̀ mù yə̂mù wûn mù jùŋ ləma ma wù kpi. 8Ghàn faŋ à kə yâ ma ghàn hi wunhe kə yi wunhî beka yu ti bakhâ shyəma Bâba kahà ben. 9Kə ghàn hi sunle ngɨŋ sanisu a wana noma kə ghɨ bê sak ghàn. Wùt wù sakana mò kə yi jwô ndâ. 10Ghàn lyi chwesu ha fòktìsu chiksu a wana noma ma ghàn hi wunhê. Ghɨna ndùku yena ngə̂k, biyani fôktè tum à Bâba. 11Hamok ghàhnà bime na Yènfù bonhe à ghɨ̂t ghe ghɨ wunhe. Ba ghàn ti yu te Jûb tì shihi yen a ngə̂k hì wunhe nâ kə a jûŋ fî yen yi gha ye Bâba tì ne ha wûn a gòkhi. Bâba mò ni, khə sù ngə̂k su ghɨ̂tsù, kôŋà ghɨna, fê kwohe yi sen ha ghɨta nâ haŋaŋ. 12À ne fî gan nâbi ghə a wana noma, kə wùt bè kânà yi kân gha. Kə wùt bè kânà yet yi Fùyènì makə yet yi shyə̀ ale a chyə afân makə nâbi yet yi ghə. Gha hì mô hi bimî, ghàn bimi kə yi bimî, yi hì mô hi tunhî ghàn tunhi kə yi tunhî, kə Yènfù bê sak à bobhi ghàn.

Yi jə̂m yi wùt wù bimena

13Wùt ha ghàn hì kəta ngəksu wu jəm ha Yènfù ma fu gamti wûn, hì saŋle yi saŋlî wu hi yema sù njàŋ kokhe Fùyèn. 14Wùt ha ghàn hì yafâ, wu toŋa chəhsu ndâ Fùyènsu ma su bê jəm ha wûn ma yuhi wûn nì gutû a Bâba yi yet. 15Ghɨ shihi jə̀m ghɨ bimi na Yènfù nè chwukalò wùt àtɨ̂n, ma Bâba chwuk wûn ma wù lohi wûn wu khɨ̀ wu yafanu. Wùt àtɨ̂n shìki mô ma à ni nâbi be na wù hi yafâ, ma Yènfù nê lehêfo be wûn mi yê. 16Ghàn hi fôktè be sanisu jə̂mà ha ngɨŋ sanisu, shyəma Yènfù nê chwuk ghàn. Wùt à chilichili jə̀màlò Yènfù yu yi jə̂m yì wuni, gha jwo yimana hi gânà. 17Ìlajà ndùku mô kəbi wut te ghàhnà, yu wule bên, wù jə̂m nâ nì jyaka na kə wuli na yi faŋ hi nà a wu lɨ̀m wù tât nì bəha. 18Wù fî jə̂m na wuli na, yi nâ, ni chyə bonâ mwə̀ mù yə̂mù ləmâ. 19Wana noma wùt ha ghàn ki njaha lum wu Fùyèn we wu mô hamok, wùt lè nî wù kaha fwu wu lûm, 20wù hi khə na a chwùti nâbi nde lumu ha wùt à gha be wu lum afân, ma, wù bònhi wûn a yi kpû ma wù fê baŋ gha be ale ghɨ dô kə ni.

Currently Selected:

Jêms 5: bmv

Highlight

Copy

Compare