Jêms 2

Wùt chyà wijə wùlè

1Wana noma, ghàn te ghɨt a bimena ha Bâba ghàhnà Jisòs Klistù a we wù kəta ban yi chiki kəta wi hi tè lyê wùt na wù chyàlò wùlè. 2Ma ghɨ lyi na ghɨt à bà ti lyi ben a ghàn a ndâ yì yùŋtì, wùlè mô ma wù ti laf nâ a jûŋ, lihi su chyak a wun a wô ma ghɨ fati nì kah ghe ghɨ fate ka atɨ̂n, wùlè mô wùt wù fufana ma wù ti mak kə shyàklà mù sùnju. 3Te ghɨna bèna ni, wò ki tôknà nì we wù ye lafa a jûŋ yâ hanɨ̂ŋ chwûtì kpok wu jûŋù ha wûn, biyani ki jîs ha wùt wù fufana we na wù time a fokô makə wù ndòko a chyə̂ a wo ngwùŋ wu wù. 4Wò ki nî ni, ma à hi mô na wò ti chwûtì na ghɨt ale mò a ghàn a fùtɨ̂n chyâ ale, ma yi hi chwûtè na ghàn ti kahi gan ghɨt a sakana kəta kwàktì tu be tu.

5Ghàn yuti a wana noma ghɨ jûŋà. Ba ghàn khəlò na Yènfù ti chwokti ghɨt ghe ghɨ yena na à mò ghɨt a fufana a mbye afân, ni na ghɨna bimi ma ghɨna khɨti kə nâ ghaki, ma ghɨna bê yə fə̂n we Yènfù chwùne ha ghɨt ghe ghɨ kôŋà wûn. 6Biyani ghàn ti sûlì ghɨt a fufana. Ba à mò ghɨt a chika ghe ghɨ kwo fye mwə̀ mânù, fê lyê yê nì ghàn a lùk wu sù saku? 7Ba a jìsà sùlì ghɨna yet yi wùt wù jùŋ we wù kəta ghàn?

8Ghàn shìki lêmà sak yi fə̂n wù Fùyènù te yi mô a ŋwàklù Fùyèn na, “Kòŋ wâ nâ kə yi ghəl te wò kòŋà ngɨŋ yâ,” ma à hi mô na ghàn nè kə nâ a jûŋ. 9Biyani, ghàn shìki lyî na ghɨt ale chyàlò ghɨ le, ma à hi mô na ghàn nè be, ma saki kwo ghàn kəbi yi ghəl te yi kwo kəbi nde we wù khɨma saki. 10Yi ni chwùtè na, à lem nâbi nde sak tù jɨ̀m ki khɨm kə yì mòk ma à hi mô na wù ti khɨm tù jɨ̀m. 11Yi mô ni beka wùt we a wù tì jìsa na, “Kə wùt chyə nì wùt a bu lɨm à wûn makə ywê wûn,” tî jis kəbi na, “Kə wùt ywi.” Wò ki faŋ hi chyə̂ nì wùt a bu lɨm wâ, makə ywi wâ biyani ywi wùt, ma à hi mô na wo ti khɨm saktu tɨntu nâ tù jɨ̀m. 12Ghàn hi jîsà fê nê kəta ghɨt ghe Yènfù mô hi bè saka ghɨna nì sak ye yi nê na kə ghɨta hi fê mô wu kwôs. 13Beka Yènfù bè shihi sak nâbi nde we wù kwohe wi seni ha wùt ma wù bê tê kwohe jə̀ seni ha wûn. Wùt we wù kwohe seni ha ghɨt ale kəta wi hi tè fàn a yi sâk.

Bimînì nì fêtì

14Wana noma, wùt shìki jîs kə na wù ti bimi ha Yènfù, chwûtè wijə a wun a yì fèt, ma jùŋ àtɨ̂n nê hi mô nâ ghə. A nki yi bimî mi yîn làhi bè bònhè wuna? 15Ma ghɨ lyi na wâ nâ ki bên kəta wi shyə ale hi yə̂ wu tuk afû, kəta wi njusu hi màk, 16Wù shihi lò ghàn jis kə ha wun na, “Wò gbê kə a jûŋ. Wò yen, ma wò hi mâkà mwə̀ mù lùmtêmù, fate yə̂,” biyani faŋ hi fo a shyə ale atɨ̂n à mwə̀ afân ha wûn, ma jùŋ àtɨ̂n nê hi mô nâ ghə? 17Yi ni mò kəbi yi ghəl te wùt kəta kə yi bimî biyani chwûtè wijə bimî tɨni a tô gha afa wù nè ma à hi mô kə bimî yi kponi.

18Wùt lè làhi jìs na wò bime ki yi bimî nê wi fêt yì wut wù bimeni, biyani yi nê. Mu jyâna, wò wi hi jìs ha mu na wò ti bimi Yènfù bu kə na wò nè yi fêt nì bimi ya mi yê. Gha ghe mu nè chwùtè yi bimî mi. 19Yi jwôfàlò ni te wò bime na Yènfù mò kə fù mòk! Nâbi yohnù wu be bimelò nâbi ni, fê fânà chiŋtê a ngək ye Yènfù bè fo ha ghɨna. 20Ngwo shyə̀ ghɨ̂n! Wò khɨŋa hi yen a chwena na bimînì mò kə yi kponi a wu yu afa yi chwûtè wi a wùt yì fèt 21Yènfù tì lyi bè bè ghàhnà Ablàhâm te wùt à chilichili njwô ghə? Ba à ndùku mô te wù tì lyi wâ wûn Isìk hì mô hi fo ha Yènfù a tô baŋ a yi fo. 22Yi ni chwùtè na bimî wuni nì fêt yi wuni ndùku mô kə a shyə̀ mòk. À tì ni yi fêt yi wuni na bimî yi wuni hi kpenê. 23Yi tì gan ni hi lunhi luk wu ŋwàklù Fùyèn we wu tì jìsa na, “Ablàhâm tî bimî ha Yènfù, fu fyi wûn ha wùt à chilichili,” Wù hì fê toŋte wûn na sô à wûn. 24Yi ni chwùtè na, Yènfù lyè wut te wut à chilichili njwo yi fêt yi wuni, a bu kə kum nì bimînì yimi.

25Ba Yènfù tî lyi wùt ywên wù gbèna we ghɨ ndùku toŋte na Lahàb yâ ha wùt à chilichili beka wù tì fye ghɨt ghe Joshwà tì tuma a wun a ndâ tesi ghɨna, ghɨna tet chya wu lum wu lô? 26Yìnâ ni chwùtè na wùt shìki kəta yi bimî yi chwùtè wijə a gha afa wù nè ma à hi mô kə yi bimî yi kponi kəbi te chyaka wùna ghe ghɨ kəta wi yohnà mò ma ghɨ ti kpû.

Currently Selected:

Jêms 2: bmv

Highlight

Copy

Compare