Kòlosiyàns 3

1Te ghàn hì mô ma Yènfù ti lôhì ghàn à Klistù a yi kpû amok, ghàn hi lêmà təm ghana a gha afa a ghɨ mô a nyə̂, wu lùk afa a Klistù mô atɨ̂n a Yènfù bàh kpen wu wo ta. 2Ghàn hi lêmà kwâktì tanitu a gha afa a ghɨ mô a nyə̂, a bu a gha afa a ghɨ mô a chyə̂, 3Beka ghàn hì mô ma ghàn ti kpû, ghɨ ti letì chyənà yanì ghê Klistù we a wù mò ghê Yènfù amok. 4Klistù mô chyənà yanì. A bê hì mô te wù kaha bênà a ndan, ma ghàn hi boŋa mô ghàn à wûn a wun atɨ̂n à yi ghak.

Chyəna mwu nì chyəna fe

5Ghàn maka lê gha a mbyî nâ à jɨ̀m. Kə wùt hi chyə̂ nì wùt ywên a bu ywê wûn makə nì wùt wù lɨmà a bu lɨm à wûn. Ghàn maka chyənà su liŋsu. Kə ghàn hi kəta kwâktìnì nì kôŋì hi tè nè be. Ghàn maka se fwona beka se fwona chwùtè na ghàn ngumle mwə̀ mù mbyî, a bu Fùyèn. 6Yènfù bàŋhèlò lâ, mô hi bè fo ngək yì chìk ha ghɨt ghe a ghɨ ywo wi wûn, nê a gha mɨ ghɨ̂n. 7Ghàn ndùku nê kəbi lò gha a be mɨ ghɨ̂n wu lum afa a ghàn chehì chyə̂ atɨ̂n. 8Biyani mu wu hì jîsà ha ghàn chin na ghàn maka gha mɨ ghɨ̂n nâ à jɨ̀m ni te bâŋhì wu la nì be. Kə ghàn hi bakte hi nè be ha ghɨta makə hi wama yi fə̂m hi bobhi yi yet yi wûtì, kə jîs yi liŋi hi fwo a ghàn yi jwô. 9Kə wùt ha ghàn hi wama fəmi a wùt wùlè, beka ghàn ti de chyənà su mwusu nì gha ghe a ghàn chehì nê, 10ghàn bɨlà khɨti chyənà yì fê. Yì ghɨt a Fùyènà mɨ ghɨ̂n ghe Yènfù bwəma hi nì na ghàn hi fune wûn a gha afa a ghàn nè shyəma ghàn hi tôkà khə wun nâ a jûŋ. 11Beka, hanɨ̂ŋ nè hi fê wijə ha wùt, makə à mô wut wù Jûs makə à mò wut wù Gɨlìs, makə ghɨ ti se nam a wuna makə ghɨ tà se jə̂, makə à mò wut à tûm makə à mò wut à ghə̀n. Hanɨ̂ŋ wi ha ghɨt ghe à mò wu kwôs nì ghɨt ghe a ghɨ mô a ghɨna ngɨŋ, biyani gha yi ta mò kə Klistù. Wu mô kə ghɨt a wuna fùtɨ̂n à jɨ̀m.

12Te ghàn hì mô ghɨta te Yènfù chwokte ha ghɨt a wuna, hì kôŋà, ghàn kəta hi tè chwùtè seni kwolani, tôknè nì ghɨta, lyê ngɨŋ sanisu a chyə̂, bonê, fê wunhê. 13Ghàn hi kəta təm a yutena ha ngɨŋ sanisu, lehèfo ngɨŋ sanisu nâbi wùni yu te wùt khɨte ngə̂k ghe wâ nè wûn. Ghàn hi lehèfo ngɨŋ sanisu kə yi ghəl te Bâba tì lehêfo ghàn. 14Ghàn bakhi kôŋì a tô a gha afân à jɨ̀m. À mò yi kôŋ a yi kwuta nâbi ghə kə ha shyə̀ à mòk, nê ghɨ jwôfà kpenê. 15Ghàn de yutì ye a Klistù fo ma yi hi tihe kwâktì tanitu. Yènfù toŋa ghàn na ghàn fwo ben ma ghɨ hi mô ha wùn wù mòk, kəta yutìnì mi yîn. Ghàn hi fo yòŋnà ha wûn. 16Tum à Klistù hi fate chyə kə nâ yi chyə̂ a ghàn fùtɨ̂n. Ghàn lyi tof wù jɨ̀m ma ghàn hi yikê fê fo tobhînì ha ngɨŋ sanisu. Ghàn hi yema njàŋsù Fùyènsu nì njàŋsu yulesu nì se a Yohnà Yulena nè na ghàn hi yemâ. Ghàn hi yemâ, fo àyòŋnà ha Yènfù a ghàn a təm. 17Ghàn hi nê nâbi ghə makə ghàn jìsà yi jîs, jîsà kə a Bâba Jisòs yi yet, fo àyòŋnà ha Yènfù, Bì tohne ha wûn.

Chyəna yì fe ye a ghàn kəta hi tè chyə̂

18Ghàn kəta hi tè ngumli lɨm ghana a ywena a malana te ghɨt ghe a ghɨ jûmtè Bâba. 19Ghàn kəta hi tè kòŋà ywên ghana a lɨmànà a malana. Kə ghàn hi bəma ha ghɨna. 20Mwəlà, ghàn hi ywo bì ghana nì ha nì ghana kə gha à jɨ̀m beka yìna nè na Bâba hi saŋlê. 21Be mwəlà, kə ghàn hi njaŋa chyâhè ha wan ghana, a bu ni ma ghɨna hi yena kə na ghàn fè kôŋà wi ghɨna.

22Ghàn kwôsù, ghàn hi ywo ha bì ghana ghɨ fètà ghe a ghɨ mô a mbyî kə a gha à jɨ̀m. Kə ghàn hi nê kə a gha a wu yu afa ghàn khɨŋa na ghɨna yen ma ghɨ hi kôŋà ghàn. Ghàn hi fêtà nì təm ghana kə à jɨ̀m te ghɨt ghe a ghɨ fânà Bâba. 23Ghàn hi fêtà nâbi ghə, ghàn hi fêtà kə nì təm a ghana à jɨ̀m, te ghàn fètà ha Bâba, a bu njwo ghàn fètà ha wùt, 24khə na Bâba nè maktèlò ghàn nì mwə̀ me a wù lèma ha ghɨt a wuna. Ghàn mò ni, fêtà kə ha Bâba, Klistù. 25Wù bè kaha lâkà nâbi wùni wùt wù be kə yi ghəl a be afa a wù chehì nê. Wù lyê wi wùt wùlè hanɨ̂ŋ.

Currently Selected:

Kòlosiyàns 3: bmv

Highlight

Copy

Compare