Kòlosiyàns 4

1Ghàn hi khɨte ghɨt ghe a ghɨ fêtà ha ghàn a lumtu jûŋ tù a be yi fètà, fê fo mwə̀ me a ghɨna kəta hi tè kət. Ghàn hi khə na, nâ ghàn boŋa kətalò bì yì fèt, wu mô a nyə̂.

Gha ghe ghàn kəta hi tè nì

2Ghàn hi jə̂mà kə yi jə̂m, kə ghàn bot. Ghàn shihi jə̀m, ghàn hi tôkà yute gha ghe a ghàn jîsà, fo àyòŋnà ha Yènfù. 3Ghàn hi boŋa jə̂mà ha ghàh na, Yènfù ni ma ghàh khɨti lumtu hi tè fòktè tum yì jùŋ kum a gha a letena ghe a Yènfù chwùte banhe ha ghàh kum Klistù. Mu mò a ndâ chyâk beka tum yì jùŋ mi yîn a mu fòktè ni. 4Ghàn hi jə̂mà kəbi na mu hi fôktè banhi tum mi yîn a lum afa a mu kəta hi fòktì atɨ̂n.

5Ghàn hi tofa a lum afa a ghàn chyə atɨ̂n ghàn à ghɨt ghe a ghɨ mô teka ghɨ bimi, bobhi wi yu we a ghàn kəta ghàn à ghɨna. 6Jîs yani kəta hi tè bonâ fê fomâ kə yû mù jɨ̀m, shyəma ghàn hi khə hi fate fìsè nâbi nde.

Toŋtî yi gokheni

7Wâ nè ghàhnà Tìkikùs nè fòktèlò nâ gha à jɨ̀m ha ghàn kum mu. Ghàh kòŋàlò wûn nâ a jûŋ, chîntè fêtà ha Bâba amok, wu fêtà kə nâ nì təm a wuna à jɨ̀m. 8Mu tum kə nâ wun ha ghàn ni shyəma wù ben ma wù fokti gha ha ghàn kum ghàh, ma wù fê lumhi ghàn a ghàn a yi bimî. 9Wù bênà ghê Ònesimùs a wâ nè ghàhnà we à mò kəbi wut a ghàn a nòn. Wù mô kəbi wut wù bimena wù jùŋ, ghàh kôŋà wûn nâ a jûŋ. Ghɨna nè fòktèlò nâbi ghə ghe a ghɨ gana kwoka afân.

10Àlìstakùs te ghàh à wûn mò a ndâ chyâk, jis na mu toŋti ha ghàn, Mâk a wâ nè Bànabàs ti jis kəbi yâ. Ghɨ hì mô ma ghɨ ti jis ha ghàn kum Mâk. Wù bên, ghàn fyi wûn nâ a jûŋ. 11Jisòs we a ghɨ toŋte kəbi wun na Jûstùs ni, jis na mu toŋti kəbi ha ghàn. À mò kə ghɨna ghɨt a Jûs ghɨ bimena ghe a ghɨ fêtà ghàh à ghɨna. Mu fètà ghàh à ghɨna hi nì na ghɨta yen fə̂n wù Fùyènù. Ghɨna ti nî mu tê hì mô kə nâ a jûŋ.

12Èbafàlàs we a wù mò kəbi wut a ghàn a nòn, a fê mô wùt wù fètana ha Klistù Jisòs ti jis kəbi na mu toŋti ha ghàn. Wù shihi jə̀m nâbi yini, wu hi kwâktè ghàn a wun a yi jə̀m nâ a jûŋ, chyate na Yènfù ni ma ghàn faŋà kə ghàn atɨ̂n à yi bimî, ma ghàn ghəkna atɨ̂n, ghàn hi fate khə, fê nê a gha à jɨ̀m ghe a fu khɨŋa. 13Mu làhi fòktì na wù ti fêt ha ghàn nâ nì jyaka fî fêt ha ghɨt ghe a ghɨ chyə a Làdisìyà nì ghê a ghɨ chyə a Hìlabolìs. 14Lûk, a mô doktà we a ghàh kòŋà nâ a jûŋ yâ ghe Demàs jis na mu toŋti kəbi ha ghàn.

15Ghàn toŋti wana ne ghàhnà ghe a ghɨ mô a Làdisìyà ha ghàh, ghàn fê toŋti kəbi Nimfà nì ha nôn a ghɨt a bimena ghe a ghɨ chîntè a wûn a ndâ. 16Ghɨ taŋ ŋwàklù yîn a ghàn a fùtɨ̂n, ghàn ni ghɨ yen taŋ kəbi ha nôn a ghɨt a bimena ghe a ghɨ mô a Làdisìyà. Ghàn fê taŋ à kəbi yê a mu nyàka, yi mô hi lò a Làdisìyà hi bèn ha ghàn. 17Ghàn jis ha Àkibùs na wù hi khə na wù kəta hi mihè fêt yi Bâba ye a ghɨ fo ha wûn na wù ni.

18A nyàk kə nâ mu Bôl toŋtînì a wu lùk afân chin ha ghàn nì wo ma. Kə ghàn yìta na mu mò a ndâ chyâk, Yènfù chwûtè təm a jûŋà wuna ha ghàn.

Currently Selected:

Kòlosiyàns 4: bmv

Highlight

Copy

Compare