Kòlosiyàns 2

1Mu khɨŋa na ghàn hi khə te mu ghàŋnè nì fêtì nâ nì jyaka hi gàmtè ghàn, hi fè gàmtè a ghɨt ghe a ghɨ chyə a Làdisìyà nâ nì ghɨt à jɨ̀m ghe a ghɨ tà timi yen jə mu. 2Mu nè ni shyəma ghàn à ghɨna hi kəta təm a ta, mô kə ha shyə̀ à mòk, kôŋà ngɨŋ sanisu. Mu khɨŋa na ghàn hi fate khə gha ghe a Yènfù tì lète shyəma ghàn tokâ khɨti gha mɨ ghɨ̂n ma ghàn hi kəta yutì chiki. Gha mɨ ghɨ̂n a Yènfù mò ma fu ti chwûtì banhi chin ha ghàhnà mò kum Klistù nì ngɨŋ à wûn. 3A mô Klistù mu wûn a wù ne na ghàhnà khɨti tofu ma hi fê yena khɨle gha. Tof mi yîn jwôfà kpenê.

4Mu nyàkà a gha mɨ ghɨ̂n ha ghàn, shyəma ghɨ ni ma nâ wùt bê tê lehe jə̀ ghàn nì jîs yi fomani. 5Mu mô yû mù jɨ̀m kwâktè ghàn nâbi te mu wijə ghàhnà amok. Mu saŋlelò te ghàn fate chyə fê saŋle kum lum we a ghàn tòkà khɨte bimî yani atɨ̂n ha Klistù.

Chyə ye a ghàhnà kəta hi tè chyə̂ ghàhnà Klistù

6Te ghàn hì mô ma ghàn ti fî Klistù Jisòs na à mò Bâba wânù, ghàn hi chyə̂ lê te ghɨt ghe a ghɨ mô nì wûn ha shyə̀ à mòk. 7Ghàn faŋ nì wûn ma ghɨ hi tâ kə yi tâ, kə te kâkfù ta beka fu kəta ghaŋtu. Ghàn ba chyə yani a wun wù wùn kə te ghɨ ba ndâ a tô chyə a ndâ a jûŋà, ghàn fatè khɨti bimî yani a ye ghɨ tì yike ghàn, ma yi hi ta yê kə a shyə̂. Ghàn hi fo yòŋnà ha Yènfù nâ haŋaŋ.

8Ghàn hi tôknè kə wùt nê lehi ghàn nì tof yi yimi ma wù lyi ghàn ha wu kwòs. Nki tof mi yîn kəta gha kum kə chyənà à ghɨna yì lak nì yohnù we a wu saka mbyî. Tof wu tɨnu kəta wi gha kum Klistù. 9Yènfù mò a Klistù wù wùn kə lum tù jɨ̀m. 10Ghàn à Klistù mô kə à shyə̀ à mòk, a ni mò gha ye a ghàn kəta chyənà ye a yì kpene. Wu mô a tû ha yohnù wù jɨ̀m we a wu saka fê kəta a jyak. 11Ghɨ ti boŋ se nam wanu te ghàn hì mô ha shyə̀ à mòk ghàn à wûn. Yi se nam mi yîn wijə nki ye a ghɨta se. À mò ye a Klistù tì se, hi fihi təm a be a ghàn wu wùn. 12À ndùku mô te ghàn fye mòlû, ghɨ gûmà ghàn, ghàn à Klistù, ghàn à wûn kahi lôtì a yi kpû kə amok. À tì ni yi bimî ye ghàn kəta kum jyak a Fùyènà na ghàn kahà loti. A mô kəbi jyak a Fùyèn mi ghe a ghɨ tì lòhe Klistù a yi kpû. 13À ndùku mô ashyə̂, ghàn mô ma ghàn ti kputî a ghàn a sùbe, fê mô teka ma ghɨ fihi təm a be afa a ghàn ndùku kəta. Yènfù nî ghàn à Klistù kahi lôtì hì chyə̂. Fu ti lehìfo gha ghàhnà ghɨ be kə à jɨ̀m, 14fî chikhi fô ye a ghàhnà chehì kəta hi làk. À ndùku mô te ghàhnà khɨma saki, yi hì mô na ghàhnà kəta yi fô hi làk. Chin hì mô ma Yènfù ti lyi fôlì tɨni banti a kàkfùtàfù. 15À ndùku mô te Klistù kpo a kàkfùtàfù, Yènfù ni shyəma yohnù we a wu saka nì we a wu tihe na wu hi fê kəta wi jyaka, wumhi yohnù wù tɨnu wù jɨ̀m a mbye ashyə̂. A ni mò wu lum we a fu tì tuma yə yohnù mu wûn atɨ̂n.

16Yi ni chwùtè na kə ghàn de wùt time te wut wù sakana hi tè fo saktu ha ghàn kum shyə ghe a ghàn yə makə ghe a ghàn nyo. Kə ghàn de wùt hi khɨte ghàn na ghàn hi ngumle Yènfù hanɨ̂ŋ a mu tuk mù chìk mùlè a lɨ̂m makə a njoŋ su lesu makə a mu tuk mù lak mùlè. 17Mwə̀ muna mò kə wu lɨ̂ŋhù gha te ghɨ ndùku kəta hi bè bèn; biyani hamok ye a yì mò atɨ̂n à gha afân mô kə Klistù. 18Kə ghàn de wùt jis ha ghàn na ghàn hi chwohe ngɨŋ sanisu a chyə̂ fê ngumle anjèlsu Fùyènsu, a bu ya ma ghàn gha maktu wanu. Ghɨna kama jîsà na gha fwo ha ghɨna ni te à chyə su jem, ghaŋhe wu wun kə halô, kwâktì ghɨna mô kə kwâktì yi mbyi. 19Ghɨna fè chîntè wi ghê Klistù we a wù mò a tû. A mô wun we a wù fo jyaka ha wunu wù jɨ̀m na wu hi ləma a lum afa a Yènfù ne na wu hi ləma atɨ̂n. Klistù khɨte wun wu wunu mu wûn wù jɨ̀m kə yi ghəl te ghàŋû yùŋtè chîntè khɨte wunu wûtù a shyə̀ à mòk.

Hi kpû hi tè mò ghàn à Klistù

20Ghàn hì mô kə ni te ghàn à Klistù ti kpû amok kum yohnù we a wu saka mbyî. Yi ni mò ni, ghàn hi baha lêmà kə saktu ghɨta mbyî tu kum ghə? Njwo ghə te ghàn lèmà sak te a ghɨta jìsà na ghàn hi lêmà agha? 21Ghɨna jìsà kə na, kə ghàn khɨti shyə ghɨ̂n, kə ghàn mom shyə a yəna ghɨ̂n, kə ghàn kum shyə ghɨ̂n. 22Sak mi tɨ̂n jìsà kum kə mwə, mu mô hi bêf. A mô kə a gha a ghɨ̂tà te ghɨ fate hì gbê yikê. 23Ghɨta ti fate lumu hi kokhe Fùyèn atɨ̂n. Ghɨna kama chwûtè kəbi na ghɨ chwohe ngɨŋsu ghɨna su a chyə̂ fê fo ngə̂k ha wunu ghɨna. Nâ gha mɨ ghɨ̂n à jɨ̀m fune kə yi funâ na tofu làwû atɨ̂n biyani kəta wi nâ gha yile hi gàmtè wût na wù hi khɨte ngɨŋ à wûn kum a gha a njyàsu wùnsu.

Currently Selected:

Kòlosiyàns 2: bmv

Highlight

Copy

Compare