Kòlosiyàns 1

1À nyak mu Bôl ŋwàklù yìna. Mu mô wut wu tum ha Klistù Jisòs, ma à chwok Fùyèn. Ghàh à Timotì a wâ nè ghàhnà a yi bimî toŋte ha ghàn.

2Ŋwàklù yina mò ha ghàn ghɨt a Fùyèn ghe a ghɨ mô a tèk yi Kòlosè, ma à ni ghàn wana ne ghe a ghàn mò ghàn à Klistù a shyə̀ à mòk, jûmtè wûn nâ a jûŋ.

Yènfù, Bì ha ghàhnà chwute təm a jûŋà a wuna ha ghàn, ma wù fo yutìnì ha ghàn.

Bôl fo àyòŋnà ha Yènfù

3Ghàh shihi jə̀m nâbi wùni yu, ghàh hì fo àyòŋnà ha Yènfù, Bì ha Bâba ghàhnà Jisòs Klistù kum ghàn, 4beka ghàh ti yû kum bime yani ha Klistù Jisòs, na ghàn fê kôŋà ghɨt a Fùyènà nâ à jɨ̀m. 5Ghàn nè ni beka ghàn khə mwə̀ me a Yènfù lèma ha ghàn a nyə̂. À hì mô te ghɨ be fokte tum yì jùŋ hamok ha ghàn ha shyə̂, ghàn yu yi gha kum mwə̀ me a ghàn yute. 6Tum yì jùŋ mi yîn ləma yê kə luk tù jɨ̀m a mbyî, nê na gha a jûŋà hi gânà a ghɨta su chyənà, ghɨna fê ləmâ yê kə shyə̂. Tum yì jùŋ mi yîn ti boŋ ben tan ha ghàn ni na gha a jûŋà gan a ghàn a fùtɨ̂n, yi boŋa ləma yê kə ashyə̂. Tum àtɨ̂n ni nè fêt mi yîn a ghàn a fùtɨ̂n kə hi yìmi wu tuk afa a ghàn tì ywo khɨle hamok kum təm a jûŋà ghɨ Fùyènà. 7À tì yiki Èbàfàlàs tum yì jùŋ mi yîn ha ghàn, ghàh kòŋà wûn nâ a jûŋ. Ghàh à wûn mô ghɨt a fetana ha Klistù. Wu lyê luk wahu ha wut wù fètana wù jùŋ ha Klistù. 8Wù ti fôktì ha ghàh te Yohnà Yulena nè ghàn kôŋà ghɨta.

9Gha mi yîn che nî na ghàh hi jə̂mà kə yi jə̂m ha ghàn kə wu tuk te ghàh ywo, lona na Yènfù fê fo tofu ma fu ni na ghàn hi ywo khɨle gha à jɨ̀m ghe a Yohnà Yulena nè na ghɨta khɨle shyəma ghàn khɨlè mihi gha ye a fu khɨŋa. 10Ghàn kəta hi tè chyə̂ chyənà ye a Bâba khɨŋa, a mô yê a yì nè wu saŋlê kə lum tù jɨ̀m, ma chyənà mi yîn ni na ghàn hi nê nki tu fèt tu jûŋ tù kə tù jɨ̀m fê tòkà khə Fùyèn. 11Mu jə̂mà na Yènfù fo jyaka wuna ghɨ kanana ha ghàn shyəma ghàn hi tâ, kwuta a təm nâ a jûŋ, fê wunhê, 12fo àyòŋnà ha Bì nì saŋlînì te wù ti ni ghàn, ghàn ti kpenâ hi tè boŋa kəta shyə ghe a wù lèma ha ghɨt a wuna wu lùk wu bananu. 13Wù ti bônhì ghàhnà atɨ̂n à jyak a finana, lyi ben nì ghàhnà wu lùk wu fə̀n wù Wâ wûn wù kòŋ. 14Wâ wûn mu we ti yun tu ghàhnà fî lehìfo besu ghàhnàsu.

Klistù mò a tû nâbi ha ghə

15Wùt wi hi yen a Fùyèn. Wâ Fùyèn mò a lɨ̂ŋhà Fùyènà. Wù ti chwûtì mihì te Yènfù mò. A mô wûn a tû ha mwə̀ me a Yènfù fate a mbyî nâ mù jɨ̀m, a Wan wù shyə̂ wù Yènfù. 16Ghê Yènfù tî fate nâbi ghə ghe a ghɨ mô a nyə̂ nì mwə̀ mù jɨ̀m me a mù mò a chyə̂. Ghê wûn tì fati mwə̀ me a ghɨ yena nì me a ghɨ yena wi. Ghê wûn tì fati yohnù we a wu kəta jyaka nì we a wu saka nì we a wu tihe. Yènfù tì fati mwə̀ mù jɨ̀m tohne a wûn. Wù fati kəbi mwə̀ mù tɨ̂n na mù hi ywo ha wûn. 17Klistù ndùku lâwû shyəma nâbi ghə hi mô. A mô wûn we a wù ne na nâbi ghə hi mô wu lùk afa ghɨ kəta hi tè mò atɨ̂n. 18Wu mô a tû ha ghɨt a bimena nâ à jɨ̀m ma à ya mò wu wun wu wunu. Wù mô yìmi, à mô wut wù shyə̂ we a ghɨ tì ne wù kahi lôtì a yi kpû, shyəma wù lyi luk wu shyə nâbi ha ghə. 19Yi mô ni beka Yènfù tì koŋ wûn lem wûn na wù hi mô kə yi ghəl te wûn nâbi afa. 20Wù ti lem nâ mwə̀ mù jɨ̀m me a mù mò a chyə̂ nì me a mù mò a nyə̂, kahà bakti chyəna ghê wûn tohne a wun a Wan afân, fî ni na yutìnì hi mô kum luŋ me a Wan àtɨ̂n tì sùha a kàkfùtàfù kpulò.

21Hi jìs yi gha kum yi baktî yi chyənà, ghàn khə na à ndùku mô ashyə̂, ghàn mô kə ha dà ghàn à Yènfù, bânà wûn, kəta yi kwâktì yi be, fê nê a gha a be, 22biyani Yènfù hì mô chin ma fu ti ni ghàn, ghàn ti kahi bakti chyəna ghana nì wûn kum kpu yi chyak a wùni ye a Wâ wûn tì kpo shyəma ghàn hi time a wun ashyə̂ yulê, mô a jûŋ, kəta wi njahi yile. 23Ghàn kəta kə nâ hi khɨte bimî yani na yi hi ta kə yi tâ. Kə ghàn de na gha nekhi kwâktì ye a ghàn kəta kum gha ghe a tum yì jùŋ hì mô ma yi ti chwunà, nâ ghàn boŋ yû. Nâ mu Bôl mô wut wù fètana, fôktè kə tum mi yìna, a mô yì yîn ye a ghɨ hì mô ma ghɨ ti fôktì nâ ha ghɨt à jɨ̀m a mbyî.

Fêt yi Bôl a ndâ Fùyèn

24Mu saŋlelò chîn te mu yena ngə̂k kum ghàn. Ngə̂k mi yîn mô a mu wu wùn ni beka mu khɨŋa hi nè mihè gha ye a Klistù ndùku yena ngə̂k hi nì ha ghɨt a bimena a mô wu wun wu wunu. 25Yènfù chwok mu ha wùt wù fètana a ghɨna nòn. Fêt mi yîn mô na mu fôktè mihi tum à Fùyèn mi yîn ha ghàn. 26Gha ye a Yènfù tì bakti ndùku mô ma fu ti lêt ha ghɨt ashyə nâ à jɨ̀m, biyani chwûtì chin ha ghɨt a wuna. 27Yènfù ndùku khɨŋa na ghɨt mɨ ghɨ̂n hi khə nâ gha yi leteni ye a fu bakte lema a mô yi gha yi kanani, a mô yi gha hi gàmtè kə ghɨt a tu lak tu mbyî tu kə tù jɨ̀m. Gha mi yîn mô na Klistù mò kə nâ a ghàn a təm, yi chwûtè na ghàn khə hamok na ghàn bè chyə lò ghàn a wûn a wun atɨ̂n à yi ghak. 28A ni mò gha ye a ghàh fòktè tum kum wûn, fo tobhînì, fê yike ghɨt à jɨ̀m nì tof wù jɨ̀m, shyəma ghàh ni ma ghɨna hi mô ghê Klistù Jisòs amok, bênà a Yènfù ashyə̂ te ghɨt a kpenana. 29A mô kum gha mɨ ghɨ̂n a mu ghàŋnè, fêtà nì jyak ghe a wù fo ha mu nâ à jɨ̀m.

Currently Selected:

Kòlosiyàns 1: bmv

Highlight

Copy

Compare