Fêt 28

Gha ye yi gana ha Bôl yi lak yi Maltà

1À hì mô te ghàh fwo mihe a jwô, baha mô kə nâ wun wu tâ, ghàh yu ha ghɨt ghe ghɨ ndùku mô afû na ghɨ toŋte lak mi ye na Maltà. 2Ghɨt atɨ̂na tî gâmtì ghàh nâ jûŋ fati wu wus ha ghàh beka à ndùku mô ya ma wuli ti yîmì hi tè nà tònènà hì mô a bɨn nâ haŋaŋ. 3Bôl yûŋtì mu kâk hì kpâ yênà nì wusu atɨ̂n, fwə fwu atɨ̂n à mu kàk afû te wusu lùmà be lɨm a wo wuna faŋ kə yi fâŋ. 4Ghɨta yi lak afû yen fwə atɨ̂na te ghɨ lɨma wo wuna jis na, “Wùt wunâ làhi tè mò ni ywe à ghɨ̂t. Nâbi te wù teta fwo a jwô biyani lòn mô a wuna tû, wu mô kə hi kpû.” 5Biyani Bôl jîkhì a wo wuna fwə atɨ̂na chem wu wùs teka ghɨ ləmhi wûn nâ hakoh. 6Ghɨna hì kwâktè kə na wun wu wunu ti mutàlò, bu yani ma wù fen à kpu. Ghɨ yutî nâ ha ghaf biyani te yena jə̀ gha yile te yi gana ha wûn. Ghɨna ki kwuna yi kwâktì ghɨna hì jîsà na, “Wù mò ni mô Fùyèn fu lefu!”

7Bì yì lak afû ndùku kətalò fùkmù a ngwùŋ à lùk afû yet yi wuni mô Bùbiyùs. Wù fyi ghàh nâ a jûŋ, yəhi ghàh a mù tuk mù tât. 8À mô ni, bè Bùbiyùs mô wu khɨ̀ kəta a guta, kutì fê chwoka wûn. Bôl lyi yen atɨ̂n à ndâ afa wù ti nìŋe atɨ̂n jəm lò, lem a wo a wun a tû, yaf yi tɨni mî. 9À hì mô te gha mi yîn gàna ni, nâ ghɨt a yablena nâ à jɨ̀m a yi lak afû fwu ben, Bôl boŋ chwuk ghɨna. 10Ghɨta yi lak afû fo mwə̀ ha ghàh mu dô kə ni. À hì mô te ghàh khɨŋa hi lò, ghɨna lem nâbi ghə a ngwùk te ghàh khɨŋa, ghàh lyi lo nì munù.

Bôl lo a Maltà yen a Lûm

11Ghàh chyə afû njoŋsù tât shihi lò lye a ngwùk ma yì tì lo a Àlèksandiliyà, ghɨ toŋte ngwùk àtɨ̂n na, “Maŋhù Mùyènù,” ben timi afû beka a ndùku mô mbɨ̀ŋ fufa ta chyâlà. 12Ghàh ben chyəti kwok yi tèk yi Sìlakùs a mu tuk mù tât. 13Lo yi tèk afû yen chyə yi tèk yi Lejùm. Tuku yû, fufa yîmì hi tè chyà, bê lumu a bàh à nchwô, ghàh gbi a mu tuk mù bà ben fwu yi tèk yi Bùtolì. 14Te ghàh lye bena afû ni yen a ghɨt a bimena afû, ghɨna jis na ghàh à ghɨna chyə. Ghàh à ghɨna chyəti kwok afû metì ngàm yì fùblù ghàh ki chyâ yèn a Lûm. 15Ma à hì mô ma ghɨt a bimena a Lûm ti yu na ghàh bènàlò lo ben hi yena ghàh wu wən a Àbiyùs, ghɨta ben timi hi yen a ghàh wu lùk afa ghɨta gbena ndùku bênà chyə, ghɨ toŋte na ndasu tât. Bôl yen ben nì ghɨta ni, fo àyòŋnà ha Yènfù khɨte təm a ta.

Bôl fôktì tum yì jùŋ ha ghɨt a Jûs a Lûm

16À hì mô te ghàh bè tana a Lûm, ghɨ de na Bôl hi chyə̂ a wun a ngɨŋ, fî fo sojà na yì hi chînà wûn.

17Te tuk mù chya mù tât, Bôl toŋa wu tu we wu ndùku tihe ghɨt a Jûs na ghɨna bê yen wûn. Ghɨna bên, Bôl jis ha ghɨna na, “Wana noma, ghɨt a Jûs che kwo mu ni ghɨ fa mu a Jèlusalèm fî fo mu ha ghɨt a Lumà nâbi te mu chehì mô teka mu ni gha be yile ha ghɨt a ghàhnà, teka mu jîsà bobhi gha kum lum te be ghàhnà ndùku chyə atɨ̂n. 18Ghɨta sak mɨ ghɨ̂n bufti a gha ha mu hì khɨŋa hi dè mu beka ghɨna ndùku mô ma ghɨna ti yen na mu tà ni jə̂ gha shyəma ghɨ ywi mu. 19Biyani ghɨt a Jûs tunhî na kə ghɨ de mu, mu hì kəta hi bèn a Lûm na fə̀n wù chìk yu sak à mì nâbi te mu yê hì kəta wi gha yile hi jìs kum ghɨt a ma na hakoh. 20À mò gha ye yi ne na mu yen ghàn, ma ghàhnà biti gha. Mu mò atɨ̂n à sù chyak ni beka mu ti bimi ha wùt we ghɨt a Isalì tì lèma kwâktì ghɨna ha wûn.” 21Ghɨna fîsì jis ha wun na, “Ghàh tà yen jə ŋwàklù te yì lo bena a Jùdiyà kum wò. Nâ wana ne ghaha ghe ghɨna lo bena afû tà jis jə gha be yile kum wò. 22Biyani ghàh khɨŋa hi ywo yi kwâktì ya beka ghàh khə na nâbi afa ghɨt a Jûs jîsà lò gha be kum nki nòn ghɨ̂n a wò mò atɨ̂n ni.” 23Ghɨna lem wu tuk hi bè yen a Bôl. Tuk wu tɨnu kpên, ghɨna fwu ben wu lùk afa wù ndùku chyə atɨ̂n nâ hidù. Wù bis yîmì hi tè jìs ha ghɨna jis kə ni yen tan wu yu kolô, fati fòktì banhi gha ye wù ndùku kəta hi fòktì ha ghɨna kum fə̂n wù Fùyènù, kəbi kum Jisòs. Wù fî taŋ a gha ghe ghɨ fwo ŋwàklù yì sak ye Musìs tì be nì yinì kəbi nì ŋwàklù su fòktìsu chiksu hi chwùtì na gha ye wù jîsà na yi mô hamok. 24Ghɨt ale bimî na wù jîsà kə nâ hamok, ghɨ le tunhî na ghɨna bime wi. 25Ghɨna jyâhì kə nì gùfna te Bôl jìsa gha mi yîn ha ghɨna na, Yohnà Yulena tî nî kə nâ chilichili hi tuma fòktì Ìsayà ha be ghàhnà ghɨ shyə. Wù tì jis na, 26“Ndù jis ha ghɨt ghɨ̂n na ghàn bè hì ywo kəbi yi yû gha, khɨle wi na ghɨ jis na ghə agha, ke kəbi yi kî luktu biyani yena wi nâ hakoh, 27beka tu ghɨt mɨ ghɨ̂n ta, ma ghɨna ti fə̂ntì tûŋlunu, fî baŋti a sê, bu ni ma ghɨna yenalò luktu fê ywo khɨle a ghâ kahi ben ha mu ma mu chwuk ghɨna.” 28-29Bôl jis hi yè mihì jis na, “Yi ni chwùtè na ghàn kəta hi khɨli na tum yì jùŋ te Yènfù kəta hi bònhì à ghɨ̂t, ghɨ mò ma ghɨ ti tum ha tumu, ghɨna mô hi yû.”#28.28-29 Ŋwàklù su mwu su lesu kpenhe yi gha wu lùk afan na “Te wù tì jìsa gha ghɨ̂n ni, ghɨt a Jûs yîmì yi njaŋ kə ghɨna ngɨŋ, yi bəma kə ni, jyâhìlò.” 30Bôl chyə kwôk afû wu lɨ̂m wù bà a lâkà kə nâ wûn ndâ à wûn. Wù hì fye nâbi nde we wù ndùku bê ha wûn nì saŋlînì. 31Fôktè a ghâ kum fə̂n wù Fùyènù, yike kum Bâba Jisòs Klistù. Wù ndùku jîsà nâ nì təm a ta, shyə ale tâhè wi wûn.

Currently Selected:

Fêt 28: bmv

Highlight

Copy

Compare