Lumàns 1

1À nyak mu Bôl ŋwàklù yina. Mu mô wut wù fètana ha Jisòs Klistù ma à chwok Fùyèn mu ha wut wù tum, lem na mu hi fôktè tum yì jùŋ à wûn. 2Tum yì jùŋ mi yina ni mò ma Yènfù tì chwûnà hi tum nâ wu yu dâ, jis fòktì su chik su wunsu nyak chwùna tɨnu a ŋwàklù Fùyèn. 3Tum yì jùŋ mi yìna jìsà kum Wâ Fùyèn, Bâba ghàhnà Jisòs Klistù. Wù tì shihi bèn a mbyî ha wût, ghɨ bwɨ wun a Defìt yi sah yi nda. 4Yènfù tî lôhì Bâba ghàhnà Jisòs Klistù mu wuna a yi kpû wu lum wu kananu nì jyak a Yòhnà Yulena chwûtì na wù mò kə nâ Wâ Fùyèn. 5Yènfù khɨti təm a jûŋà ha mu lem mu ha wut à tum na mu hi gbê fôktè tum yì jùŋ kokhe Klistù shyəma ghɨta yu ma ghɨ bimi kə tu lak tù jɨ̀m, fu ni ni tohne a Jisòs Klistù. 6Ghɨ ti boŋ toŋa kəbi ghàn ghe ghàn mò a Lûm na ghàn fwo ben ma ghɨ hi mô à ghɨ̂t ha Jisòs Klistù.

7Mu nyak ŋwàklù yìna ha ghàn ghɨt a kòŋà a Fùyèn ghe a ghɨ chyə a yi tèk yi Lûm nâ à jɨ̀m. Yènfù ti toŋa fihe ghàn na ghàn hi mô ghɨt a wuna.

Yènfù, Bì ha ghàhnà ghê Bâba Jisòs Klistù chwuti təm a jûŋà ha ghàn, ma wù fo yutìnì ha ghàn.

Bôl fo àyòŋnà ha Yènfù

8Mu lyè luk wu shyə, fo àyòŋnà ha Yènfù a mu kokhe tohne a Jisòs Klistù te ghɨta jìsà kum yi bimî yani kə mbyî yì jɨ̀m. 9Mu jə̂mà ha ghàn kə yû mù jɨ̀m, nâ Yèn fe a mu fètà ha funfu kə nì təm a ma à jɨ̀m, fôktè tum yì jùŋ kum Wâ wûn khəlò. 10Mu jə̂mà na lumu nê gan, a mô kôŋì Fùyènì na mu ni nâbi yàni, ma mu bê jikti ghàn. 11Mu jə̂mà ni beka mu kòŋà nâ haŋaŋ hi bèn hi yen a ghàn, hi jìs kum yutì ye a Yènfù fo ha ghɨta nì Yohnà a wuna. Mu bênà hi jìs ni shyəma ghàn hi tòkà tâ a yòhnà. 12Gha ye a mu jìsà mò na mu bènàlò, ma ghàhnà à jɨ̀m chinti. Mu bênà, ma mu shihi lùmhè ghàn a ghàn a yi bimî, ma ghàn boŋà lumhi mu atɨ̂n à yami. 13Mu khɨŋa na ghàn hi khə a wana noma na mu ti baktî hi bèn ha ghàn nâ ghan hidù, biyani bakte kəbi yini, gha yile ben yi tâhìlò. Mu khɨŋa hi bèn hi yike ghɨta na ghɨ hi jûmtè Jisòs kəbi yi ghəl te mu tì yike tum wule. 14Mu mò wùt wù fètana ha Yènfù, kəta wi gha mi yi ngɨŋi. Mu kəta hi tè fòktì tum yì jùŋ ha ghɨt ghe a ghɨ fate chyə nì ghê a ghɨ chînà chyə. Mu fètà ha ghɨt ghe a ghɨ yena na à mò ghɨt a tofana, fêtà kəbi ha ngwònu. 15A ni gha ye a mu kòŋà nâ haŋaŋ hi boŋa fòktè tum yì jùŋ ha ghàn ghe a ghàn chyə a Lûm.

Tum yì Jùŋ kətalò jyaka

16Mu jala kum tum yì jùŋ mi yìna te yì chwùtè jyak ghe a Yènfù bònhè ghɨt a bimena atɨ̂n nâ à jɨ̀m. Fu bônhè ghɨt a bimena, yîmè nì ghɨt a Jûs, a kûmtè a wu tûm. 17Tum yì jùŋ ni chwùtè banhe lum we a Yènfù lyè ghɨta ha ghɨt a chilichili atɨ̂n, fu nê ni tohne kə yi bimî yi ghàhnà, gha yile fê bakhe wi atɨ̂n, kə yi ghəl te ghɨ nyàka a ŋwàklù Fùyèn na, “Ghɨt ghe a ghɨ mô chilichili kum yi bimî yi ghɨna bè khɨtelò chyənà ye a yì bè mê wi.”

Nâ ghɨt à jɨ̀m ti ni be a Yènfù ashyə̂

18Yènfù ti chwûtì lâ wunu baŋanu ha ghɨt ghe ghɨ chyə a chyə̂, khə wi wûn, nê yê kə nì be, be mi yìna tâmtè na kə ghɨta hi khə gha ye a yi mô hamok kum Fùyèn. 19Yènfù bâŋhè wu lâ ha ghɨna beka fu ti chwûtì nâ gha à jɨ̀m ghe a ghɨna kəta hi tè khə kum funfu kə a ndan. 20Ghɨta hì mô ma ghɨ ti yen na Yènfù mò kə nâ Fùyèn hi yìmì wu tuk afa wù tì fate mbyî. Ghɨna ti yen na jyak a Fùyènà bè mê wi. Ghɨ̂n mò a gha ghɨ yena wi nì se, biyani khə kum mwə̀ me a fu tì fate. À ni mò gha ye a wùt bè jìsà wi hi yə sak na wù ndùku khə wi gha kum Fùyèn. 21Ghɨna khəlò Yènfù, biyani kokhe wi wun te ghɨ kəta hi tè kokhî, fo nâbi wi yòŋnà ha wun. Kwâktì tu ghɨna tu mô kə kwâktì tu ngwo tu, ghɨna fê kwâktè wi gha chilichili, yɨŋa kə yi yɨŋâ. 22Ghɨna kwàktè kə na ghɨna tofalò biyani ma ghɨna ti kahi a wu ngwò. 23Ghɨna ti lyi kokhî ye a ghɨ kəta hi tè kokhe Fùyèn a fu faŋa hamok hì bɨlà fo ha mosòmù ma ghɨ fate nì wo, mu fune à ghɨ̂t, bu hi bè faŋ; fune nyɨ̀mû nì nyamsu nì mwə̀ mù ŋàŋlemù.

24A ni mò gha ye a yi ne na Yènfù khɨna ghɨna a ghɨna tɨ̂n à tù kwàktì tu betu, ghɨna hì nê a gha a wumena a ghɨna sù ngɨŋ, bobhe wu wun wu ghɨna. 25Ghɨna ti bimi fəmi bɨlì tunhi gha ye a yi mô hamok kum Yènfù, hì kokhe yèn mù yì fə̂m. Ghɨna ti de Yèn fe a fu mô hamok hì bɨlà kokhe fê ngumle mwə̀lû ma à fati Fùyèn biyani kokhe wi Yèn fe a fu fate mwə̀ mù tɨ̂n, a mô fùfɨ̂n fe a ghɨ kəta hi tè kokhî hi bè tàn nâbi yini! Àmèn.

26A ni gha ye a yi ne na Yènfù khɨnà de ghɨna atɨ̂n à gha a wumena mɨ ghɨ̂n a ghɨna kòŋà hi tè nì ni. Ywena ghɨna ti kahi hi chyə̂ nì ghɨ le, yi kəta wi hi tè mò ni. 27Lɨmànà ghɨna ti boŋ de hi tè chyə nì ywena ghɨna, yi foma yê kə na ghɨna kahà hi bɨlà chyə nì lɨmànà ale, a mô yi ghâ, wume nâ a be. Ghɨna ti ni kə gha a wumena ni kwoti maktu ghɨna wu be.

28Ghɨna ti tunhî hi bime Yènfù, fu ti de ghɨna a ghɨna tɨ̂n à tù kwàktì tu ngwo tu, ghɨna ghɨ hì chînà chyə kə yi chyə̂, nê a gha ghɨ kpene wi hi tè nì. 29Ghɨna nê nki tu gha tu betu kə tù jɨ̀m. Ghɨna chyə kə a be, kəta a se a fwona nì təm a be, ghə̂kà ghɨta nâ haŋaŋ. Ghɨna ywelò, nô, lehe ghɨta, kəta kwâktì yi be, lêmà kowòŋ, 30jîsà a gha a be kum ghɨta, bânà Fùyèn, yikte ghɨta, ghaŋhe wu wun, jîsà yi jîs yi ghaŋheni wùni, khɨŋa kə wu lum hi tè nè be, ywo wi ha be ghɨna. 31Ghɨna jìŋtèlò, fo chwùna tu fəm tu, kôŋà wi ghɨta, kwohe wi seni ha wùt. 32Ghɨna ni nè gha mɨ ghɨ̂n, fê tôkà ghɨt ale ghe a ghɨ nê gha atɨna nâbi te ghɨna khə sak yi Fùyènì ye a yi jîsà na ghɨt ghe a ghɨ chyə wu lum afân ni kəta hi kpû.

Currently Selected:

Lumàns 1: bmv

Highlight

Copy

Compare