2 Kòlitiyàns 4

Ghaki atɨ̂n à khɨ̀ŋ yi chyaki

1Te Yènfù ti kwohi seni ha ghàh fo fêt yina na ghàh hi nê, yi ni chwùtè na ghàh wi hi bot hi tè nì. 2Ghàh ti tunhi nâ gha a wumena à jɨ̀m ghe a ghɨ nyama nê. Ghàh lehe wi wùt, fwəka wi gha Fùyènì. Ghàh bɨlà jîsà kə gha ye a yi mô hamok a Yènfù ashyə̂, chwûtè hamok ha ghɨta na ghàh mò kə nâ ghɨt a jûŋà. 3Yi ni chwùtè na shyə ki baŋa nâbi tof wu nde na kə wù ywo khɨli tum yì jùŋ ye a ghàh fòktè, ma à hi mô kə wut te wù ləhà yênà. 4Ghɨt mɨ ghɨ̂n ywo khɨle wi gha beka Satàn we wù saka mbyi yìna ti baŋ kwâktì yi ghɨna na kə ghɨna bimi. Wu nê ni na kə ghɨna yen ban ye a tum yì jùŋ à Klistù bènà nì yini. Ghɨna wi hi yena ban mi yîn a tum yì jùŋ bènà nì yini, yi chwûtè jyak a Klistù, Klistù mu wuna mô kə shyə à mòk ghê Yènfù. 5Ghàn hi khə na, ghàh shihi fòktè tum yì jùŋ mi yìna, ghàh hi fôktè wi kum ngɨŋ yahì. Ghàh fòktè kə na Jisòs Klistù mò Bâba, ghàh lyê kə ngɨŋ sahisu ha ghɨt a fetana ha ghàn kum Jisòs. 6Yènfù tì fati mbyî jis na, “Bani ben atɨ̂n à bɨn a finana.” Yèn fûn ti ni na bani ben a ghàhnà a təm, ma wù ya chwùti ban yi wuni ha ghàhnà, a mô ye a ghàhnà yena kə̂k yi Klistù.

7Biyani ghàh ghe a ghɨ kəta ghak yi yohnà mi yîn mò kə ni te a khɨŋ a chyaka, hi chwùtè na jyak a chika kəta Fùyèn, a bu ghàh. 8Ngəksu bènà ha ghàh kə a tu lum a tu lûm biyani, ma su wi hi ta chyà ghàh, à bênà yu lefu ghàh hi kəta à fumhì nâ haŋaŋ biyani ma ghàh wi hi màkà fêt yahi. 9Ghɨta chwoka wulu wahu biyani Yènfù wi hi màkà ghàh. Ghɨna nyâblè nì ghàh biyani ma ghɨ wi hi ywe ghàh. 10Ghàh gbùtè hi kpu nâbi yini, kəbi yi ghəl te Jisòs tì kpo, shyəma ghɨta yen na ghàh kətalò chyənà à Jisòs. 11Ghàh chyə nâbi yi chyə̂, mô kə a yi jwô yì kpû kum Jisòs. Yènfù de na yi hi mô a lum afân shyəma ghɨta hi yena chyənà Jisòs a chyak a wùna ghàhnà afân a wu kəta hi kpu ni. 12A ni mò te ghàh mò nâbi yini, mô kə yi jwô yi kpû shyəma ghàn hi kəta chyənà Klistù.

13Ghɨ ti nyak a ŋwàklù Fùyèn na, “Te mu bime, mu kəta hi fòktì.” Ghàh ti boŋ bimî kəbi yâ ha Yènfù, boŋa kəta hi fòktì gha yi wuni. 14Ghàh kəta hi fòktì beka ghàh khəlò na Yènfù ti lôhì Bâba Jisòs a yi kpû, wù bè boŋa lôhèlò kəbi ghàhnà ghe a ghɨ mò ghɨt a Jisòs ma wù lyê chìntê lem ghàhnà a wun ashyə̂. 15Ghàh bime hi yen a ngə̂k mi yìna a ghàn a jùŋ shyəma Yènfù chwuti təm a jûŋà ha ghɨta kə hi dù hi dù, ma ghɨta kahà hi fo àyòŋnà kokhe wûn, dô kə ni.

Ghàh chyə kə kum yi bimî

16A ni gha ye a ghàh bota wi hi tè nè fêt mi yîn. Nâbi te njyàsu wùnsu sahisu bota yênà, Yènfù nè folò jyaka a ghàh a təm kə yu mù jɨ̀m. 17Ngək se a ghàh yena chin ni buma bonelò, a mò kə afu yula ni. Ngək mi sîn fati ghàh a jùŋ yì chìk afa a yì bènà, bu hi bè mì, ma ghɨ wi hi fə̀knà ngək mi sîn nì jùŋ àtɨ̂n. 18Ghàh ni ke wi mwə̀ me a ghɨ yena nì se. Ghàh bɨlà ke yênà nì mwə̀ me mù baha mô teka ghɨ yen. Ghàn khə na mwə̀ me a ghàh ke yena bè mêlò biyani, mwə̀ me a ghàh ke yena wi bu hi bè mì.

Currently Selected:

2 Kòlitiyàns 4: bmv

Highlight

Copy

Compare