2 Kòlitiyàns 5

Ndâ à chyak nì ndâ yòhnà

1Ghàhnà khə kəbi na ghɨ ki bobhe ndalà fu chyak fu wùn fûn a ghàhnà chyə atɨ̂n a mbye afân ni, ma Yènfù fo ndâ yòhnà ha ghàhnà a nyə̂ teka ghɨ ba nì wo, yi mô hi chyə fâŋ. 2Ghàhnà chyə a mbye afân, gha fo ngə̂k ha ghàhnà, ghàhnà jyê njwo ghɨ kôŋà na Yènfù nyâŋhè fo ndâ yì fê na ghàhnà baŋ wun wu ghàhnà atɨ̂n, yi mô a nyə̂. 3Ghàhnà kòŋà hi nyàŋhè khɨte wun wu fe mu wûn shyəma ghàhnà bê faŋ hi fè gha wunu nâ tuk wule. 4Ghàhnà chyə wu wùn afân, jyê kə yi jî njwo ngək ye a ghàhnà yena. A bu na ghàhnà jìsà na Yènfù chyakhi wun wu ghàhnà we ghɨ chyə atɨ̂n, ma ghàhnà faŋ nì wun wu yimu. Ghàhnà bɨlà khɨŋa kə na fu fo wun wu fe ha ghàhnà we a wu bu hi kpû, shyəma wu lyi luk wu wùn wunâ.

5À ni Fùyèn na yi hi mô a lum a afân, fo Yohnà a wuna ha ghàhnà hi chwùtì hamok na ghàhnà bè kwotelò wun wu fe mu wûn.

6A ni gha ye a ghàhnà ta a ghàhnà yi bimî nâbi te ghàhnà khə na ghàhnà shìki kəta wun wuna, ma yu hi dâfà wi shyəma ghàhnà hi mô a Bâba ngwùŋ. 7Yi mô ni beka ghàhnà chyə kum yi bimî ye a ghàhnà kəta, a bu kum te ghɨ ke yênà gha. 8Hamok, ghàhnà bota wi a ghàhnà yi bimî, bɨlà kôŋà kə hi dè wun wuna hi yèn hi tè chyə̂ a Bâba ngwùŋ. 9A ni gha ye a ghàhnà mòmhè nâ haŋaŋ hi tè nè gha ghe a ghɨ jwôfà ha Bâba, makə ghàhnà mò wu wùn afân, makə ghàhnà mò wu wùn wu fe. 10Yi mô ni njwo nâ ghàhnà à jɨ̀m bè timelò a Klistù ashyə̂, ma wù sak ghàhnà. Wù bè lâkà nâbi nde kə gha afa a wù chehì nê a mbyî, makə à chehì mô gha a be, makə à chehì mô a jûŋà.

Klistù tì kpû fati chyənà su ghɨ̂tsù

11Ghàh fànà Bâba njwo ghɨ khə na yi jwôfàlò hi tè fànà wûn. A ni gha ye a ghàh chyate ghɨta na ghɨ ben ha wûn. Yènfù khəlò nâbi ghə kum ghàh, mu lèmà na à mò a ghàn a təm ghàn boŋa fate khə ghàh. 12Kə ghàn hi kwâktè na ghàh khɨŋa hi chwùtì ha fê na ghàh kpenelò hi tè mò ghɨt a tuma. Ghàh khɨŋa na ghàn hi khə gha ye a ghàn kəta hi tè saŋle kum ghàh shyəma ghàn khɨli hi tè fìsè ghɨt ghe a ghɨ kûnà ngàŋtànà kə kum lum we a ghɨ yena wùt atɨ̂n, khə wi nâbi təm a wuna. 13Tof yahi tà fwu jə̂ te ghɨt ale jìsà. Yi shìki mô ma yi ti fwu kəbi yi fwû, ma à hi mô njwo ghàh fo ngɨŋ yahì ha Yènfù kə yì jɨ̀m. Biyani ghàh mò kə nâ a ghàh wu tof, mô a ghàn a jùŋ. 14Ghàh nè fêt yîn ma ghàh wi hi faŋ beka Klistù kòŋàlò ghàh nâ haŋaŋ. Ghàh khə na wù tî kpû kə ha ghɨt à jɨ̀m, yi chwûtè na ghɨt à jɨ̀m ti kpû bakha ha wûn. 15Klistù tì kpu kə ha ghɨt à jɨ̀m shyəma ghɨt ghe a ghɨ chyə ma ghɨ hi fê chyə wi a lum afa a ghɨna kòŋà, biyani chyə kə kum Klistù. Yi mô ni beka Klistù tì kpû kum ghɨna kahi lôtìlò.

16Hi yìmì chîn, ghàh nè fè lyê wi wùt a wu lum afa a ghɨt a mbye lyè. Yi mô kə nâ hamok na, ghàh tì lyi Klistù a wu lum afân, biyani bu hi lyì yâ. 17Wùt shìki mô ghê Klistù, wu hi mô wut wù fê, ma chyənà wun yi mwu ti chyâ, yì fe bên. 18Gha mɨ ghɨ̂n à jɨ̀m ni mò ma à ni Fùyèn ha ghàhnà, kahi bakti chyəna ghàhnà nì wûn. Fu ni ni tohne a Klistù. Fu ti fo kəbi fêt mi yîn hi tè bakti chyənà sù ha ghàh. 19Gha ye a ghàh jìsà ni mò na Yènfù tî bakti chyənà wûn ghê ghɨt a mbye kum gha ye a Klistù tì ne. Fu ti lehìfo besu ghɨ̂tsù fî fo tum ha ghàh ghɨt a tuma, na ghɨ hi fôktè na fu khɨŋalò na ghɨt à jɨ̀m bakti chyəna ghɨna ghê wûn. 20A ni lum we, ghàh lyè luk wu Klistù, Yènfù jîsà tohne a ghàh. Ghàh chyate ghàn a Klistù yi yet na ghàn bakti chyənà sanisu ghàn à Yènfù. 21Nâ Klistù a wun a ngɨŋ tà tì ni jə be biyani Yènfù lyi wun ha wut wù be shyəma ghàhnà tohna a wun ma ghɨ hi mô chilichili a Yènfù ashyə̂.

Currently Selected:

2 Kòlitiyàns 5: bmv

Highlight

Copy

Compare