2 Kòlitiyàns 3

Ghɨt a fetana a mu kàn mù fê

1Ghàn kwàktè na ghàh kahi ma hi ywo a ngɨŋ sahisu te ghɨt ale ma? Ngàŋ. Ghàh kəta wi nâbi hi fo ŋwàklù sù ha ghàn te ghɨt ale, hi chwùtì na ghàh mò ghɨt a tuma, khɨŋa wi nâbi na ghàn nyak ŋwàklù sù, ghàh hì gbê nì sinsu. 2Nâ ghàn mò ŋwàklù ye a ghàh kəta ma ghɨ nyak a ghàh a təm shyəma nâbi nde hi taŋâ, ywo khɨle gha ye a yì jîsà. 3Ghàn mô ŋwàklù te Klistù nyàka kə nâ a wun a ngɨŋ, yì chya a ghàh a wô. Wù tà nyak ŋwàklù yìna nì leŋì yi ŋwàklù, wù bɨ̀li nyak nì Yohnà Fùyèn fe fu chyə. Wu tà nyak a tô yi ti, wù nyak a ghɨt a təm.

4Ghàh khə na gha mɨ ghɨ̂n ni mò kə nâ hamok beka ghàh samhe Yènfù, a mô fêt yi Klistù. 5Ghàh jìsà wi na ghàh kpenelò a ghàh a sù ngɨŋ beka gha yile wijə a yi ne na ghàh hi kwâktè na ghàh kpenelò hi tè nè fêt mi yîn. A ni Fùyèn na ghàh hi kpenê. 6À ni wûn na ghàh hi kpenê hi tè fòktè gha kum kàn mù fê me a wù yə ghê ghɨta. Kàn mu muna wijə sak ye a ghɨ tì nyàka, à mô kàn mù Yohnà Yulena. Sak ye a ghɨ tì nyàka ywelò, Yohnà Yulena nê na ghɨta hi chyə̂.

7Ghàn khə na Saki ndùku mô ashyə̂ a ŋwàklù ma ghɨ nyak a tô yi ti biyani, yi chwûtè jyak a Fùyènà. Saki tì nî kə̂k yi Musìs hì bana nâ haŋaŋ, ghɨt a Isalì bu hi kî, nâbi te yi ndùku bana yâ, lima yênà yi yên. Saki shìki mô ma yi ti chwûtì nki jyak mi yîn ni, bênà kə nì kpu, 8nâ Yohnà Yulena te ghɨ bênà nì chyənà ma faŋ hi tè chwùtè jyaka a Fùyènà, ghɨ chyâ nâ ni agha? 9Saki shìki mô hi nì na ghɨ hi saka bobhi ghɨta biyani kəta nki jyak ni, gha ye a yi nê na ghɨta hi mô chilichili a Yènfù ashyə̂ faŋ yàni hi khɨte chyâ agha? 10Yi ni chwùtè na jyaka kàn mu fê ti ben ta chyâ jyak a yi saka, ghɨ tê hì fê kpene wijə yi gha yile. 11Saki ndùku chwûtè jyak a Fùyènà biyani mê yênà yi yên. Yi ni chwùtè na jyak ghe a ghɨ mô a Yohnà Yulena chyàlò ghɨ saka beka Yohnà Yulena bè mê wi.

12Ghàh khə hamok na gha yi kàn mù fê chyàlò yi kàn mu mwu. A ni gha ye a ghàh fòktè tum yìna, fânà wi. 13Ghàh wijə te Musìs a wù ndùku baŋa kə̂k yi wuni na kə ghɨt a Isalì yen te ban yi Fùyènì mè mihè yênà atɨ̂n. 14Nâbi ha nkàn, ghɨna hì yena khɨle wi gha, à hì mô nâbi lân yi baha mò kə yâ. Ghɨna taŋa ŋwàklù mù kàn mù mwu, ywo khɨle wi. Yi mô ni beka shyə baha baŋalò tof wu ghɨna, a mô kə Klistù a wù mò hi chyàhè shyə atɨna. 15Yi mô kə nâ hamok na à mò hi bè tàn lân, ghɨna taŋa ŋwàklù Musìs yì Sak, ywo khɨle wi beka shyə baha baŋa tof wu ghɨna. 16Biyani, a bênà nâbi wùni yu te wùt bɨ̀nli kaha ben ha Bâba, ghɨ chyâhì shyə atɨna. 17Yi mô ni beka Bâba ghê Yohnà Yulena mò kə a shyə̀ à mòk. Yohnà a Bâba mô nâbi afa, ghɨta hi bu wu kwôs a shyə̀ ale. 18Ghàhnà ghe a ghɨ bime ha Klistù baŋa wi kə̂kì nì shyə. Kum ni, ghɨ yena jyak a Bâba ghàhnà wu wùn kə yû mù jɨ̀m, ghɨ nê na ghàhnà hi kpenê te Bâba, chwûtè kpenhe yênà kə yi yên nì jyak a wun mu ghê. À mò fêt yi Bâba we a wù mò a Yohnà.

Currently Selected:

2 Kòlitiyàns 3: bmv

Highlight

Copy

Compare