2 Kòlitiyàns 2

1A ni gha ye a mu tì lèma na, mu nè fè kaha bênà wi hi jikte ghàn, kə mu ni ma ghàn hi saŋle wi. 2À nè kə ghàn mu, mu saŋlê. Mu chehì bênà hi nè ghàn na ghàn hi saŋle wi, ma à fê ni nde na mu hi saŋlê gha? 3A ni gha ye a mu chehì bɨlà nyâkà ŋwàklù. Mu ndùku bênà hi yen a ghàn, ma ghàn ni kə na mu hi saŋle wi, a bɨlà mô kə ghàn hi nì na mu hi saŋlê. Mu khə hamok na mu shihi saŋlî, ghàn hi boŋa saŋlê. 4Mu chehì nyâkà ŋwàklù ha ghàn, gha fo ngək ha mu nâ haŋaŋ, mu saŋle wi, a chwo a kə mu sê a mu a sê. Mu chehì khɨŋa hi bobhe təm ghana, mu chehì khɨŋa hi chwùtì na mu kòŋàlò ghàn nâ haŋaŋ.

Ghɨ kəta hi lèhèfo wut wu yu afa wù ne bobhe

5Yi mô kə nâ hamok na wùt che ni gha, ghàhnà saŋle wi. Wù tà che tok ni gha mi yina kə ha mu, wù tì ni kə ha ghàn à jɨ̀m, gha tɨni yi hì yafa ghɨt ale chyâ te yi yafa ghɨ le. Mu jìsà kə ni beka mu kòŋà wi hi jìs à chyàhì gha mi yîn. Mu jìsà ni ghakhe wi yi ghâkhî. 6Ghɨt a dona hì mô ma ghɨ ti sak wûn fo ngə̂k ha wûn, yi jwôfà na yi kpen kə yâ 7Ghàn lehêfo wûn chîn ma ghɨ fê fo təm a ta ha wûn à bu ya, ma wù kwaktê chyahi gha ma ghɨ bobhi wûn. 8A ni gha ye a mu chyate ghàn na ghàn kaha ni ma wù hi khə na ghàn baha kôŋàlò wûn. 9Mu che nyak ŋwàklù ye ha ghàn kə nâ hi yen na, ghàn ywolò mu kə gha à jɨ̀m agha. 10Ghàn lèhèfo wùt a yi gha te wù ne bobhe, yi hi chwûtè na mu ti boŋ lehìfo wûn. Mu lehêfo wùt wule te ghàn mò hi lèhìfo, ma hi mô na mu lehifo a ghàn a jùŋ, kə yi ghəl te Klistù khɨŋa. 11Mu nè ni beka mu kòŋà wi na Satàn khɨti jyaka a ghàn tû yi gha mi yîn. Ghàhnà hì khəlò mùnàŋ mù wûn.

Bôl yen hi tàn a Tɨ̀luwàs, lâ wunu hì lûmà

12À ndùku mô te mu be tana a Tɨ̀luwàs hi fòktè tum yì jùŋ yì Klistù, mu yen na Yènfù hì mô ma fu ti lem na mu fokti, 13biyani mu tê yena jə̀ wâ nè ghàhnà Taytùs afû, gha tɨni hì fo ngək ha mu, mu ki toŋte ghɨta afû, lo hi dàŋ a Màsìdoniyà.

14Biyani, yòŋnà yênà ha Yènfù. Wu tihe ghàh kə yu mù jɨ̀m shyəma ghàh hi jûmtè wûn ma ghɨ ti shik tum yə̂, Klistù yênà a ghàh ashyə̂ ghàh bênà a wun a yi bàm. Fu nê, ghàh jyâtè tum à Klistù, ghɨta khɨle wûn, tum àtɨ̂n gbê yênà kə luktu jɨ̀m ni te lɨ̂mà yi leŋi jûŋì. 15Yi mô hamok na ghàh mò ni te leŋi te Klistù nyòka ha Yènfù a lum afa ghàh fòktè tum yì jùŋ yì Klistù ha ghɨta ghe a Yènfù bònhe, fôktè kəbi ha ghê a ghɨ ləha. 16A mô ha ghɨt ghe a ghɨ ləha, lɨ̂mà yi leŋi tɨni befâ, bênà nì kpu ha ghɨna. Biyani a mô ha ghê a Yènfù bònhe, lɨ̂mà yi tɨni fomâ, fo chyə ye a yì bè mê wi. Yi ni mò ni, à kpene nâ nde hi nè nki fèt mi yîn agha? 17Ghàh wi te ghɨt a dona ale a ghɨ lyê gha Fùyènì ha shyə̀ hi bəkle a wu kâ. À tum Fùyèn ghàh na ghɨ hi nê fêt mi yîn, ghàh fòktè kə nâ hamok te ghɨt a fetana a Klistù, Yènfù ke ghàh.

Currently Selected:

2 Kòlitiyàns 2: bmv

Highlight

Copy

Compare