2 Kòlitiyàns 12

Gha ghe a Yènfù tì chwùte ha Bôl

1Mu hì jala kə yi jâl nâbi te mbì bu atɨ̂n. Mu fòktè gha ha ghàn chin te Bâba ne, ghɨ ben ha mu ni te à chyə jem mu, nì ghe a wù chwùte banhe ha mu a mu yi kwàktì. 2Mu khəlò wùt wù bimena wùlè a Yènfù tì lye kwoka a nyə̂ nâ wu lùk afa a wu tì ngaŋte kpene. Mu laha khə wi nâ, wù tì kwok kə nâ nì wun wu wunu ma à tì kwok a yohnà. À tòkà khə kə Fùyèn. Chîn mô lɨ̂m njwòsù kìk te gha yina gàna. 3Mu khə kə te mu tì jìsa na Yènfù ti lyi wùt wuna, wù kwok a nyə̂ wu lùk afa a wù mò atɨ̂n biyani laha khə wi nâ, wù tì kwok kə nâ nì wun wu wunu ma, wù tì kwok a yòhnà agha. À tòkà khə kə Fùyèn. 4Wù yen tan afû yu gha jwo yumana ale, wùt bu hi fòktì nì jwo. 5Mu chehì jala kum wùt mu wuna, bu hi jâl kum ngɨŋ à mì. Gha ye a mu bu hi jal kum ngɨŋ à mì atɨ̂n mò kə na mu botalò. 6Mu hì jala kum ngɨŋ à mì, ma mu hi bu te à ngwò, njwo mu yè jìsà kə gha ye a yi mô hamok. Nâbi yâ, mu nè jala wi, bu ya ma wùt ne lyi mu wu lùk wu chyâ gha ghe a mu nè, nì ghe a mu jìsà.

7Yènfù tà che koŋ jə na mu hi jala chyâhè kum gha a kanana ghe a fu chwute ha mu, ghɨ dô kə ni. A ni gha ye a fu tì de yafi yi ben lye a mu wu wùn hì fo ngək ha mu nâ haŋaŋ. Yaf yi tɨni tì fwo kə nâ ha wùt wù tum te Satàn tuma na wù bê hi fo ngə̂k ha mu, kə mu hi ghaŋhe chyâhè wunu. 8Mu chyati ha Bâba ghan à tât na wù fihi yaf mi yina a mu wu wùn, 9chyate nâbi yini, wu jis kə ha mu na, “À Kpen kə yi tôknà ye a mu tòknè nì wò, njwo wùt shìki tè bôt, wu shìki yen te jyak a ma fate fêtà a wun wu wùn.” Yi ni chwùtè na mu jala nâ haŋaŋ kum gha ghe a mu bota atɨ̂n shyəma jyak a Klistù hi baŋa mu. 10Mu nè mu hi saŋlê wu yu afa mu bota, ghɨta sûlè mu, gha ta ha mu, ghɨ chwoka wulu mu, ngəksu lesu fê bênà ha mu kə kum Klistù. Yi mô ni beka à bènà wu yu afa a mu bota, mu hi bɨlà kəta a jyak.

Bôl chwûtì na yi kòŋàlò ghɨt a Kolèn

11Mu jìsà te à ngwò ma à ni ghàn na mu hi jîsà ni. Mu ti bəmhe ngɨŋ à mì, a mô luk wanu hi tè bəmhe mu, ghàn faŋ hi bəmhî. Mu kpene wi nâbi yi gha biyani ghɨt a tum ghɨ̂n a ghàn lyè na ghɨ koknelò nâ haŋaŋ chyâ wijə mu nâ hakoh. 12Mu tì bonhi lyi yu hi chwùtè chwènasu gha su ha ghàn nì nki tu gha kanana ale nì fêt tu kana tu, tu chwûtè na mu mò kə nâ wùt wù tum. 13À mò yìni gha yi jûŋì a mu che ne ha nôn a ghɨt a bimena ale faŋ hi nì ha ghàn agha? Gha ye a mu che faŋa hi nì ha ghàn chehì mô kə na mu tà tì fo jə ngək ha ghàn. A hì mô yi gha yi be te mu che ne, ghàn lehìfo mu!

14Ghàn hi khə na chin hì mô ghan à tât te mu bèna hi yen a ghàn, mô hi bèn bu hi buf a shyə ale ha ghàn beka mu khɨŋa kə ghàn, a bu mwə mânù. À bɨlà kəta bè wan hi tè tòknà nì wana ghɨna, a bu wana hi tè tòknà nì ghɨna. 15Mu saŋle hi bobhi nâbi ghə hi fè fo ngɨŋ à mì hi gàmtè ghàn. Njwô ghə mu kòŋà chyâhè ghàn ni, ghàn kôŋà kə mu fùjiti?

16Ghàn ti yen kə nâ hamok na mu chehì bufa wi shyə le ha ghàn, biyani a fê jîsà kəbi ghàn na mu che lehi ghàn wam yi fə̂m ha ghàn. 17Mu che lehi yàni ghàn? Wùt wùlè atɨ̂n à ghɨt afa a mu che tuma ha ghàn che lehilô ghàn agha? 18Mu che chyati Taytùs na wù bê yen ghàn, mu tum kəbi wâ nì wùlè ghê wûn. Yi ni mò na Taytùs che ben fi shyə le ha ghàn ma? Ba ghàh à Taytùs mò kə a tô yi gha yì mòk, chyə kə chyənà yì mòk?

19Ghàn kwàktè na ghàh nyàkà gha ghɨ̂n njwo ghàh khɨŋa hi yə sak a ghàn ashyə ma? Ngàŋ! Ghàh jìsà te ghɨt a Klistù a Yènfù ashyə̂. Ghàh jìsà gha mɨ ghɨ̂n ha ghàn nâ à jɨ̀m ni kə njwo ghàh kòŋà ghàn, khɨŋa na ghàn ləma a wu lum afa a Yènfù khɨŋa. 20Mu fànà na mu nè bênà, ghàn bu te mu khɨŋa na ghàn hi mô, ma ghàn boŋà yen mu, mu bu te ghàn khɨŋa na mu hi mô. Mu làhi shihi bèn, mu yu njaŋi a ghàn a fùtɨ̂n, nì ghə̀k, nì là mù bàŋamù, nì mu, nì jîs yi be, nì kowòŋ nì ghaŋhi yi wùni, ma mu fê yen ghàn buma chyə kə yi chyə̂. 21Mu fànà na mu nè bênà, ma Yènfù fê ni, ma mu hi wumê kum ghàn, na mu bênà hi yen ghɨta teka ghɨ kwuna chyənà ghɨna yì be ye a ghɨna chehì chyə, ghɨta ghɨ jûmtè ywena nâ haŋaŋ nì ywena ghɨ gbê nâ haŋaŋ, nâbi nde chyə yênà kə te bû. Mu fànà na mu nè bênà, ma gha mɨ ghɨ̂n ni ma mu ji.

Currently Selected:

2 Kòlitiyàns 12: bmv

Highlight

Copy

Compare