2 Kòlitiyàns 13
13
Tobhînì nì toŋtî yi gokheni
1Mu hì bênà hi yena ghàn ni na à hi mô ghan à tât. Ŋwàklù Fùyèn jìsà na, wùt hì mô hi jìs na wùt ti ni bobhi gha, bɨ̀n à sak su wunsu hi mô ghɨt à bà makə ghɨt à tât. 2À ndùku mô te mu be gokhe hi yena ghàn na à hì mô ghan à bà, mu fo tobhînì ha ghɨt ghe a ghɨ chehì nê gha a be, fî fo nâbi ha nde. Mu fô tobhî tɨni chin, bu nâbi a ghàn a ngwùŋ. Mu jìsà na mu ki fê kahà bèn, ma mu fo ngə̂k nâbi ha nde we a wù ne bobhe gha. 3Mu bênà hi chwùtì ha ghàn na mu jìsà nâbi ghə, a mô ma à jis Klistù beka à mò yi gha ye a ghàn khɨŋa hi yû. Mu chwùtè ha ghàn na Klistù bota wi, na wù bɨlà chwùtè kə nâ jyak a wuna a ghàn a fùtɨ̂n. 4Yi mô hamok na wù ndùku kəta wi jyaka wu yu afa ghɨ tì banti wun a kàkfùtàfù biyani, wù kaha lôtì hì chyə kum jyak a Fùyènà. Yi ni chwùtè na à mò a chyəna ghe a ghàh chyə ha ghàn, ghàh gha kəbi jyaka te wûn biyani boŋa chyə kə atɨ̂n à ghe a Yènfù fo ha wûn.
5Ghàn fate kina ngɨŋ sanisu ma yen nâ, a ghàn chyə lò kə nâ te ghɨt a bimena agha. Ghàn fate kina ngɨŋ sanisu. Ba yi ni mò na ghàn yena na Jisòs Klistù chyə lò kə nâ a ghàn a fùtɨ̂n ma? Ghàn kəta hi tè yên, a bu kə na ghàn chyə wi chyənà ghɨt a bimena. 6Mu khə na à hì mô ha ghàh ma ghàh ti chwûtì na ghàh mò kə nâ ghɨt a tuma Jisòs. Ba ghàn khəlò ni? 7Ghàh jə̀mà na ghàn hi chyə̂ chyənà su jûŋ sù, nê wi be. Ghàh jìsà wi ni shyəma ghàn shihi chyə̂, ma ghàn hi chwûtè na ghàh mò kə nâ ghɨt a tuma a jûŋà. Ghàh bɨlà khɨŋa kə na ghàn hi nê gha ye a yi mô chilichili nâbi wu yu afa ghàn chwùtè na ghàh nè wi fêt yahi a jûŋ. 8Ghàh wi hi tè fòktè yi gha, ghàh kòŋà kə yi gha ye a yi mô hamok. 9Ghàn shìki ta yi gha Fùyènì, ma ghàh hi saŋlê nâbi wu yu afa ghɨ yena wi jyak ghe a ghàh kəta. Ghàh jə̀mà kə na ghàn hi ləma yi gha Fùyènì. 10Mu nyàkà ŋwàklù yìna na yì ben ha ghàn ashyə̂ shyəma mu ben, shyəma mu shihi bèn ma ghàn ti kwunâ, ma mu faŋ hi fè chwùtè jyak a ma ha ghàn. Ghàn khə na jyak ghe a Yènfù fo ha mu mò na mu hi ləmhe ghàn yi ləmhî nì ghɨna, wù tà fo jə na mu hi bobhe yi bobhî ghàn atɨ̂n.
11Hi gòkhì a wana noma, mu wu hì jîsà na, ghàn faŋ à kə a jûŋ. Ghàn fati chyənà sanisu. Ghàn fate khɨti gha ye a mu jìsa. Ghàn hi chyə kə a shyə̀ à mòk, chyə nì yutìnì shyəma Yèn fe a fu kòŋà ghɨta fê fo yutìnì ha ghàn, hi mô ghàn à ghɨna.
12Ghàn toŋti ngɨŋ sanisu kə nâ wu lum hi chwùtè kôŋ yi ghɨt a bimena.
13Ghɨt a bimena afân nâ à jɨ̀m toŋte ha ghàn.
14Bâba Jisòs Klistù chwuti təm a jûŋà ha ghàn, ma Yènfù chwuti kôŋì ha ghàn, ma Yohnà Yulena faŋ ha ghàn à jɨ̀m.
Currently Selected:
2 Kòlitiyàns 13: bmv
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc.
