2 Kòlitiyàns 11

1Mu hì jìsà chin kə te à ngwò, chyate ghàn na mu shihi jìs, ghàn hi fate yute kə yi yutî. Ghàn yuti! 2Ghàn hi khə na mu kə̀ktè ghàn nâ haŋaŋ kəbi yi ghəl te Yènfù kə̀ktè. Mu hì mô ma mu ti chwûnà hi fo ghàn ha lɨm wù mòk, a mô Klistù, khɨŋa na kə ghàn nê hi kəta njahi nâ hakoh wu yu afa mu fo ghàn ha wûn. 3Mu jìsà ni fânà na ghɨta làhi bèn hi lehe ghàn ma ghàn hi fê ywo wi ha Klistù kə nì təm à jɨ̀m kəbi yi ghəl te Satàn tì bèna nì mùnàŋ mù wûn lehi Îf. 4Mu fànà ni beka mu ti yen na chichàsu su fəmsu yike ghàn kum Jisòs wùlè, a bu we a ghàh che yike ghàn kum wûn, ghàn de kə yi dê. Wùt bènàlò, ghàn fyi yohnà ha wûn, a bu Yohnà Yulena ghe a ghàh tì be fo ha ghàn, fî bimî kə yi bimî tum ye a wù fòktè, a bu tum yì jùŋ ye a ghàh tì fòkte ha ghàn.

5Ghɨt a tum mɨ ghɨ̂n a ghàn lèma na à mò nâ ghɨt a tuma a ta chyâ wijə mu nâ yi gha yile. 6Mu khəlò kə nâ na mu khə wi hi jìs a ghɨta ashyə̂ biyani, khə yi gha ye a mu jìsà. Ghàh hì mô ma ghɨ ti chwûtì yìna ha ghàn kə lum tù jɨ̀m.

7Ba yi ni mò na mu che chwohi ngɨŋ à mì ni ghàn ghɨ hì kokne fôktì tum yì jùŋ yì Yènfù ha ghàn, bufa wi shyə ale, a mô be ma? 8Mu fètà ha ghàn, kə̂kà te mu chwoŋa yi chwôŋ ndasu Fùyèn su lesu beka mu ndùku fêtà ha ghàn, a bɨlà lâkà ghɨna nì mu. 9Mu hì mô ghàhnà, yu wule ben kpên, mu hì kəta wi shyə ale nâ hakoh biyani mu hi fo wi ngək ha wùt. À tì bɨlì tum kə wana ne ghàhnà a Màsìdoniyà mwə̀lû ha mu. Mu tà tì buf jə shyə ale ha ghàn nâ wu tuk wule, bu hi bè bûf. 10Mu jala na mu fye wi shyə ale ha ghàn, mô hi tè jâl kə ni a bàh yi lak yi Àkayà nì ghàn mɨ ghɨ̂n à jɨ̀m. Mu jìsà kə hamok, Klistù khə ni, shyə ale wi hi tàmtè mu. 11Ghàn kwakti na mu jìsà ni beka mu kòŋà wijə ghàn ma? Mu kòŋàlò ghàn, Yènfù khə ni!

12Mu nè faŋa kə ni ma mu hi nê kə gha ye a mu nè chîn, ma mu baŋ jwo ghɨt ghe a ghɨ jîsà na ghɨna mò ghɨt a tuma a Klistù yâ, kə ghɨna hi ghaŋhe wunu jîsà na ghàh à ghɨna fètà kə lum wù mòk. 13Ghɨt mɨ ghɨ̂n wamalò na ghɨna mò ghɨt a tuma, ghɨna mò ghɨt a fetana ghɨ lehena, kama chwûtè na ghɨna mò ghɨt a tuma a Klistù. 14Nâbi ha nkàn, kə ghàn hi mô nì kani na nâbi Satàn nì ngɨŋ à wûn nè wu hi kama chwûtè kəbi na yi mò anjèl yì Yènfù yì banana. 15Yi ni chwùtè na ghàn kəta wi hi tè mò nì kani na ghɨt a fetana a Satàn boŋa kama chwûtèlò kəbi na ghɨna mò kə nâ ghɨt a fetana a Fùyènà ghɨ jûŋà. Ngək ye a Yènfù bè fo ha ghɨna a gòkhi bè kpenelò a ghɨna yi fèt afân.

Bôl jis kum ngək se a wù yena te wut à tum

16Mu baha kûmtèlò na kə ghàn hi kwâktè na mu mò à ngwò, biyani ghàn hì mô hi lyè mu a ngwò, ghàn de ma mu boŋà jis te à ngwò a fu yulâ ni. 17Mu ghaŋhe jîsà yênà nì gha afân kə te a ngwò, jîsà ni kə a mu a ngɨŋ. A tà jis jə Bâba na mu hi jîsà ni. 18Mu hì boŋa jîsà, ghaŋhe yênà nì wunu kəbi te ghɨt a dona a mbyî. Ba ghɨna ghaŋhe wunu kum mwə̀ mù mbyî? 19Ba ghàn jìsà na ghàn tofalò nâ a jûŋ, ghàn yen wù ngwò, ghàn nyamti de na wu hi jîsà ha ghàn! 20Ghàn ti de ghɨta, ghɨ hì lyê ghàn a wu kwòs, nyâblè nì ghàn. Ghàn ti de ghɨna lehe ghàn, yikte ghàn fê sûlè ghàn. 21Mu wume hi jìs na ghàh chehì nê gha mɨ ghɨ̂n ha ghàn. Ghɨ lyê na ghàh chehì yole yi yolî!

Mu hì jîsà chin kə nâ te à ngwò, biyani ma ghɨt ale shìki hì ghaŋhe wu wun kum nâbi ghə, ma mu hi boŋa tahe nê kəbi yâ. 22Ghɨna kokhe wu wun jîsà na ghɨna mò ghɨt a Hibùlùs. Mu mò kəbi wut à Hibùlùs. Ghɨna jìsà na ghɨna mò ghɨt a Isalì. Mu mô kəbi wut à Isalì. Ghɨna ghɨ le ni jîsà kəbi na ghɨna mò ghɨt a yi sah yi nda Ablàhâm. Mu mô kəbi wut a yi sah yi nda Ablàhâm. 23Ghɨna jìsà na ghɨna mò ghɨt a fetana ha Klistù. Mu boŋa fêtà kəbi ha Klistù, nè yi fêt yi tɨni chyâ nâ ghɨna. Mu hì jîsà yênà kə nâ te mu jyaka a yi jyâk. Mu ti fet chya ghɨna. Ghɨ ti fa mu a ndâ chyâk a ghan hi dù chyâ te ghɨ fa ghɨna. Ghɨ ti sam mu a ghan hi dù fî lanti hi ywe mu a ghan hi dù. 24Ghɨt a Jûs ti sam mu ghan à tân, a mô nâbi wùni yu te ghɨ sama, ghɨ sam wànsù mtât njwò bulamòk. 25Ghɨ ti sam mu nì bàŋsù ghan à tât, tumle mu nì te wu yu wù mòk. Ngwùk tì bɨ̂nlì nì mu a jwô a ghan à tât. Jwò lyi mu, mu yus wu tuk wu fublùnù. 26Kwuŋa lanti hi lyè mu nâ ghan hi dù te mu yènà gbî, mu fî lanti hi kpû a ghɨt a chwoŋana wô. Mu lanti hi kpû a ghɨt ghaha yi laka wô, tumu lanti kəbi hi ywe mu. Mu ti lanti hi kpû a tèk tu chiktu, lanti kəbi a lak tu ghə̀ntu. Mu ti lanti hi kpû a jwosu chiksu, lanti hi kpû a ghɨta a wo ghe ghɨ kama chwûtè na ghɨ ti bimî. 27Mu ti fet chyâhì ghan a dona chyə kə nì kə̂kì, mu ben yu wule, mu chyə teka mu yə shyə ale teka mu nyo nâbi mòlû. Mu faŋa wi hi tè mò, kəta wi nâ shyə ale hi yə̂, kəta wi ndâ hi chyə atɨ̂n, kəta wi nâbi njusu hi màk. 28Lumtu dò kə ni a mu yena ngək atɨ̂n biyani baha bu hi tè tâŋ. À mò kə yi gha yì mòk a yi mô a mu yi kwàktì kə yu mù jɨ̀m, a mô gha nda chintisu ghɨt a bimena, kə sù jɨ̀m. 29Mu yen wùt wu bota kum gha Fùyènì, gha tɨni hi fo ngək ha mu, a hi mô kə ni te à mò mu. Ghɨ nê wùt fen atɨ̂n à be, gha tɨni hi fo ngək ha mu nâ haŋaŋ.

30Mu shìki mô hi tè ghaŋhe wu wun, ma mu hi ghaŋhe kum gha ghe a ghɨ chwûtè na mu botalò. 31Bè Bâba Jisòs, Yèn fe a fu kəta kokhînì a yu mù jɨ̀m khəlò na mu wama wi. 32À ndùku mô te mu mò a yi tèk yi Dàmaskùs, wùt we a fə̀n Àletàs lèma na wù hi saka tèk mi yê jis ghɨta timè baŋ luktu gbûtè hi khɨte mu, 33biyani ghɨ lem mu a kəm tesi fihi mu a bùk a wu wùn wu mbàn a bɨn afû chwohi mu, mu têt, wù tê kwo mu.

Currently Selected:

2 Kòlitiyàns 11: bmv

Highlight

Copy

Compare