2 Kòlitiyàns 10

Bôl jis kum yi fêt yi wuni

1À chyate kə nâ mu Bôl ghàn chîn. Mu khəlò na ghɨt ale jìsà na mu shihi nyàk yi gha, bu a ghàn a fùtɨ̂n, mu hi jîsà kə nâ nì təm a ta, biyani ben tan a ghàn ashyə̂, mu hi bone jîsà kə yi jîs. Mu wu hì chyate ghàn kə nâ a Klistù yi yet te wù tòknè fê bonê. 2Mu chyate ghàn na kə ghàn ni, ma mu nê ben ma mu hi kântè ghàn. Mu khə na mu bènà ma mu hi kântè kə nâ yi kântì ghɨt ghe a ghɨ jîsà na ghàh chyə te ghɨt a mbye. 3Yi mô kə nâ hamok na ghàh chyə a mbyî biyani nô wi a gha afa a ghɨt a mbye nò atɨ̂n. 4Mwə̀ mù wòŋ mâhù ni mò, a fate wi wùt, à fo Fùyèn na ghàh hi tuma woŋi atɨ̂n, bobhi jyak wu sù bànà. 5Ghàh bobhe gùfna ye ghɨta fihe hi chwùtè wu wun, ghɨ tâmtè na kə ghɨta khɨli Yènfù. Ghàh tihe kwâktì tu ghɨ̂tù, nê na ghɨta hi kwâktè gha a wu lum afa a Klistù khɨŋa na ghɨ hi kwàktè atɨ̂n. 6Ghàn ki chwûtì ha ghàh nâbi wùni yu na ghàn ywolò, ma ghàh ki fo ngə̂k ha ghɨt ghe a ghàn a fùtɨ̂n a ghɨ ywo wi.

7Ghàn yen kə gha ye a yi gânà a ghàn ashyə̂. Wùt shìki jîs na yi mò wut wù Klistù, wu tok kwâktìlò wu hi khə na ghàh boŋa mô kəbi ghɨt a Klistù te wûn. 8Bâba ti fo jyaka ha mu a ghàn a tû, ma mu shìki jal kəbi yi jâl kum a jyak atɨna, ma mu hi wume wi beka wù fo na mu fati ghàn nì ghɨna, wù tà fo jə na mu bobhi yi bobhî ghàn nì jyak atɨna. 9Nâbi te mu kòŋà wi na ghàn hi kwâktè na mu fànhè yi fânhì ghàn nì ŋwàklù samsu. 10Ba ghɨt ale jìsà na mu shihi nyàk à ŋwàklù, yi hi tâ, fune a shyə hi chwùtè a jyak biyani mu ne bɨlì ben a ghàn ashyə̂ mu bonalò hi fê khə wi hi jìs a ghɨta fùtɨ̂n.

11Mu kòŋàlò na nki yi ghɨt mɨ ghɨ̂n hi khə na gha ye a ghàh ndòkò nyâkà ghɨ chinhilò ni mò kə ye a ghàh bènà nâbi a ghàn a fùtɨ̂n, ma ghàh ni.

12Ghàh jìsà wi na ghàh mò atɨ̂n à ghɨt ghe a ghɨ jîsà kum ngɨŋsu ghɨna su. Ghàh jìsà na, ghɨna lem fə̂kà kə a ghɨna sù ngɨŋ ma hi fə̂kà ngɨŋsu ghɨna su atɨ̂n. Ghɨna nè yi gha yi kəta wi tofu. 13Ghàh wi hi tè jâl kum gha ghàh bu hi nì. Ghàh ni jala kə yi gha afa a Yènfù fo ha ghàh na ghɨ hi nê, fêt ye a ghàh nè a ghàn a fùtɨ̂n yi bakhe kəbi atɨ̂n. 14Ghàh tà jal jə chya leŋa te ghàh ndùku baha mô teka ghɨ bê tan ha ghàn nì tum yì jùŋ kum Klistù. Ghàh hì mô ma ghɨ ti ben tan ha ghàn. 15Ghàh tà dâŋhì jə kpi hi tè jâl kum fêt yi ghɨt ale. Ghàh khɨŋa kə na ghàn ləma a ghàn yi bimî shyəma fêt ye a ghàh nè a ghàn a fùtɨ̂n boŋà ləma. 16Yi shìki hì mô ni, ma ghàh fê fôktè yen nì tum yì jùŋ a tu lak tu letu, ma bê tè jâl tuk wule kum yi fêt ma à ni ghɨt ale.

17Ghɨ ti nyak a ŋwàklù Fùyèn na, “À hì jala nâbi nde, wu hi jala kə kum gha ye a Bâba tì ne.” 18Yi mô ni beka Bâba yena wùt na wù mô a jûŋ, wù shìki kpenâ, a bu na à lyi wut ngɨŋ à wûn na yi kpenalò, ma wù hi kpenê.

Currently Selected:

2 Kòlitiyàns 10: bmv

Highlight

Copy

Compare