2 Kòlitiyàns 1

Toŋtînì

1À nyak mu Bôl a wut wù tum ha Klistù Jisòs ma à chwok Fùyèn. Mu nyàkà ŋwàklù yìna ghàh à wâ nè ghàhnà Timotì, ha ghàn chìntê ghɨt a Fùyèn ghe à jɨ̀m a ghɨ chyə a tèk yi Kolèn, kəbi nì ha ghàn ghɨt a Fùyèn ghe a ghàn chyə a bàh a Àkayà nâ à jɨ̀m. 2Yènfù, Bì ha ghàhnà ghê Bâba Jisòs Klistù chwuti təm a jûŋà ha ghàn, ma wù fo yutìnì ha ghàn.

Bôl fo àyòŋnà ha Yènfù

3Ghàhnà hi kokhe Yènfù a Bè Bâba ghàhnà Jisòs Klistù. A Bì kwohe yì sên, A Yèn fe a fu fo gâmtìnì yì jɨ̀m, kə lum tù jɨ̀m. 4Wù gàmtèlò ghàhnà a ghàhnà a sù ngə̂k nâ sù jɨ̀m, shyəma ghàhnà boŋà khɨli hi tè gàmtè ghɨt ale wu yu afa ghɨna yena ngəksu. Ghàhnà làhi gàmtè ghɨna beka Yènfù ti gâmtì ghàhnà. 5Ghàn khə na, Jisòs Klistù tî yen ngə̂k nâ haŋaŋ, ghàhnà ghɨ hì mô ma ghɨ ti boŋ lyi kəbi atɨ̂n à ngək à wûn mi yê, ghɨ hì boŋa kəta kəbi saŋlî yi chiki ye a wù fo. 6Ghàhnà shìki yen a ngək nâbi wùni yu, à hi mô jùŋ, fê mô hi gàmtè ghàn na ghàn bon. Yènfù gàmtèlò ghàhnà nâbi wùni yu, yi hi mô hi nì na ghàh hi lûmhè ghàn. Ni, ma ghàn ta kpen hi tè wunhe nki tu ngək te a ghàhnà à jɨ̀m yena. 7Ghàh khə hamok na bimî yani ta kə yi tâ. Ghàh khə ni beka ghàn ti lyi kəbi atɨ̂n à ngək afa a ghàh ndùku mô atɨ̂n, Yènfù gâmtè ghàn kəbi te fu gamte ghàh.

8Ghàh khɨŋa na ghàn hi khə ngək se a ghàh che yena a Esiyà a wana nì ghaha. Ghàh tì yen ngə̂k afû nâ haŋaŋ hì fânà nâ na ghàh nè kputelò. 9Ghàh chehì khə wi na ghàh nè bônàlò. Biyani yìna che gan ni shyəma ghàh hi chyə wi a ghàh a jyak biyani bɨlà yikte kə Yènfù wù wùn. A mô a wun we a wù lòhè ghɨta a yi kpû. 10Fu ti bônhì ghàh a yi kpu, mô hi bè fè bònhè ghàh. Ghàh khə kə nâ hamok na fu bè bônhèlò ghàh. 11Yènfù gàmtè ghàh a lum afân ni beka ghàn jə̀mà ha ghàh. Fu gâmtè ghàh, ghɨta yen ghɨ hi fo àyòŋnà ha wûn, dô kə ni.

Bôl kwuna gha ye a wù ndùku khɨŋa hi nì

12Ghàh jala nâ haŋaŋ beka təm ghaha fòktè ha ghàh na nâbi ghə te ghàh nè a mbyî mò ma ghɨ nê kə nì təm a jûŋà ghe a Yènfù fo, a bu kum gha yile. Yìna chwûtè a ndan wu lum afa a ghàhnà chyə atɨ̂n. Ghàh jala, biyani nê nâbi ghə, nê kə kum təm a jûŋà Fùyènà, a bu kum tof wu mbyi. 13-14Yi ni chwùtè na ghàh ni nyàkà kə yi gha ha ghàn kə ye ghàn mò hi taŋ hi khɨlî. Mu khə na ghàn fate khə wi chyənà mì chîn biyani, mô hi nè khɨlî shyəma à bê hi mô wu tuk afa a Bâba ghàhnà Jisòs kaha bênà, ma ghàn hi jala kum ghàh kəbi yi ghəl te ghàh jala kum ghàn.

15-16Mu chehì khə kə na ghàn khəlò mu a wu lum afân. À mò yi gha ye a mu che lema na mu yità jikti ghàn shyəma mu yen a Màsìdoniyà shyəma mu bê shihi kaha bèn hi fè yen a ghàn ma ghàn hi tôkà saŋlê. Mu che lem ni shyəma mu bê shihi kaha bèn ma ghàhnà fê yena, ma ghàn gamti mu, ma mu yen a Jùdiyà. 17Yi hì mô na mu che shihi lèm na mu bènàlò hi jikte ghàn, tof wu mu bu ma? À mò na mu bakte yi gha te ghɨt a mbye ma? Ghɨna bime yi gha ghɨ shihi yutî ghɨna fî tunhilò. 18Yènfù yê jîsà kə hamok. Mu jîsà ha ghàn kəbi yi ghəl na, mu chehì jîsà wi jyə sù bà ha ghàn. 19Ghàn khə na Wâ Fùyèn, a Jisòs Klistù we a ghàh à Timotì nì Silàs chehì fôktè gha yi wuni ha ghàn yê jîsà wi jyə sù bà. Wù yè jîsà kə yi gha ye a yi mô hamok te Wâ Fùyèn. 20A mô wun a wù nè chwuna tu Fùyèn tù jɨ̀m kpenê. A ni gha ye a ghàhnà jìsà na, “Àmèn” tohne a wun yi yet, kokhe Fùyèn. 21A nè kə nâ Fùyèn na ghàhnà à jɨ̀m hi mô jùmtìsùbàmsu Jisòs Klistù, tâ. A chwokte funfu ghàh. 22Fu ti tihe ghàhnà wu lum na fu ti fo Yohnà wuna ghɨ Yulena ha ghàhnà a təm hi chwùtì hamok na fu bè fo mihèlò mwə̀ me a fu chwune ha ghàhnà.

23Mu che faŋ hi fè bèn a Kòlitiyàns beka mu chehì kôŋà wi hi bèn hi khɨte ghàn a yi ghâ. Yènfù khəlò təm a ma khə na mu jìsà kə hamok. 24Ghàh khəlò kə nâ hamok na bimi yani talò, kôŋà wi hi tè chin a wût na wù ni gha kum yi bimî yi wuni. Ghàh bɨlà kôŋà kə hi bèn na ghàhnà chintê ni gha, yi bênà kə nì saŋlînì ha ghàn.

Currently Selected:

2 Kòlitiyàns 1: bmv

Highlight

Copy

Compare