1 Timotì 2

Bôl fôktì lum we a ghɨta kəta hi tè kokhe Fùyèn atɨ̂n

1Gha yi ta atɨ̂n à gha afân a mu jìsà ni mò na, ghàn hi jə̂mà ha ghɨt à jɨ̀m, jə̂mà na Yènfù gamti ma wù fo mwə̀ me a ghɨna khɨŋa. Ghàn hi fo kəbi yòŋnà ha wûn kum a gha a jûŋ ghe a wù nè ha ghɨta. 2Ghàn hi jə̂mà ha fə̂ntù nì ghɨt ghe a ghɨ tihe ghɨta shyəma ghàhnà hi chyə kə nâ nì yutìnì fê gbê kə a lumtu jûŋ tù jɨ̀m afa a Yènfù khɨŋa na ghɨ hi gbê atɨ̂n, chyə̂ chyənà yì jùŋ a ghɨta ashyə̂. 3Ghàn shìki jə̂m ha ghɨta ni, ma gha tɨni hi jwôfà fê nê na Yènfù, Bònhè ghàhnà hi saŋlê. 4Yènfù khɨŋa na ghɨt à jɨ̀m bon fê khɨŋa kəbi na ghɨt à jɨ̀m khɨli gha ye a yi mô hamok. 5Yi mô ni beka Yènfù mò kə fù mòk, wùt fê mô kə wù mòk a ghɨta tohne a wûn yênà ha Yènfù. Wùt wunâ mô Klistù Jisòs, a mô kəbi wut te ghàhnà. 6Wù ti fo ngɨŋ à wûn hi kpu hi yun a tu ghɨt à jɨ̀m. Yènfù tì ni gha mi yîn kə wu yu afa a fu ndùku khɨŋa hi chwùtè a chwena na fu kôŋàlò hi bònhè ghɨt à jɨ̀m. 7Ghɨ tì chwok mu ha wùt à wûn wù tum kum gha mi yîn na mu fokti gha Fùyènì ma mu fê yiki tumu nì gha ye a yi mô hamok. Gha yîn a mu jìsà ni mò kə nâ hamok. Mu wama wi.

8Mu khɨŋa na ghàn hi yûŋtè nâbi afa hi jə̀m, lɨmànà hi jə̂mà, kəta təm a yulena, kəta wi bâŋhì wu la nì gùfna ha wùt.

9Mu khɨŋa kəbi na ywena hi fate lafâ, a bu yi laf ye a yi mô hi fo ngək a ghɨta. Kə ghɨna hi fate chyâhè tu, tuŋa chyâhè chyaksu makə fwatu njentetu. Kə ghɨna hi labhe ngɨŋsu ghɨna su nì nju se su ta chyâhè wu kâ. 10Ghɨna hi bɨlà fati ngɨŋsu ghɨna su nì gha jûŋà ghe a ghɨna nè ha ghɨta hi chwùtì na ghɨna mò a ywena bimena. 11Ywena kəta hi tè yute gha ghe a ghɨ yike ha ghɨna mô moŋ nì ngumlînì. 12Mu ti tunhi na kə ywena hi time wu lùk, yike à lɨmà makə kəta a jyak hi tè sak a ghɨna. Ghɨna kəta hi tè mò kə moŋ. 13Yi mô ni beka Yènfù tì bwəm Adàm ashyə̂ ki bwəma Îf 14Ghɨ tà tì jɨ̂ŋhì jə Adàm. Ghɨ tì jɨ̀ŋhi kə wùt ywên, wù khɨm yi sak yi Fùyènì. 15Biyani Yènfù bônhì nâbi wùni wùt wù ywên te wù bwɨ mwəlà, a wu yu afa wù kwuta təmi faŋ hì ta a wun a yi bimî, fê kôŋà ghɨt ale, fê chyə̂ chyənà ye a yì kəta wi njahi. Wù kəta hi tè nè gha mɨ ghɨ̂n nì tofu.

Currently Selected:

1 Timotì 2: bmv

Highlight

Copy

Compare